हैदराबाद, 15 ऑक्टोबर: हैदराबादच्या राजीव गांधी आंतरराष्ट्रीय क्रिकेट स्टेडियमवर सुरू असलेल्या चौथ्या टी-२० सामन्यात वेस्ट इंडिजच्या फलंदाजांनी भारतीय गोलंदाजांची जोरदार धुलाई केली आहे. भारतीय कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला होता. मात्र, फलंदाजीची संधी मिळालेल्या वेस्ट इंडिजने सुरुवातीपासूनच आक्रमक पवित्रा घेत अय्यरचा हा निर्णय पूर्णपणे चुकीचा ठरवला. वेस्ट इंडिजने २० षटकांत २४७ धावांचा डोंगर उभारत भारतासमोर विजयासाठी २४८ धावांचे मोठे आव्हान ठेवले आहे.
वेस्ट इंडिजचा कर्णधार शाई होपने या सामन्यात उत्कृष्ट फॉर्म दाखवत भारतीय गोलंदाजांवर हल्ला चढवला. त्याने अवघ्या ५० चेंडूंमध्ये आपले धडाकेबाज शतक पूर्ण केले. होपने ५० चेंडूंचा सामना करताना ४ चौकार आणि ९ उत्तुंग षटकारांच्या मदतीने नाबाद १०२ धावांची खेळी केली. या मालिकेतील त्याचे हे दुसरे, तर टी-२० कारकिर्दीतील तिसरे शतक ठरले आहे. या खेळीसह त्याने वेस्ट इंडिजसाठी सर्वाधिक टी-२० आंतरराष्ट्रीय शतके झळकावण्याचा नवा विक्रमही प्रस्थापित केला आहे.
शाई होपला शेर्फेन रदरफोर्डची उत्तम साथ मिळाली. रदरफोर्डनेही आक्रमक फलंदाजी करत २६ चेंडूंत ४ चौकार आणि ३ षटकारांच्या साहाय्याने नाबाद ४९ धावा कुटल्या. या दोघांनी मिळून चौथ्या विकेटसाठी अवघ्या ४३ चेंडूंमध्ये ९१ धावांची भक्कम भागीदारी रचली.
या सामन्यात सर्वच भारतीय गोलंदाज खूप महागडे ठरले. भारताकडून मयंक आणि अर्शदीप सिंग यांनी प्रत्येकी ४ षटकांत ५२ धावा खर्च केल्या. अक्षर पटेलने ४ षटकांत ४५, प्रिन्स यादवने ४ षटकांत ३६, तर नितीश रेड्डीने ३ षटकांत ३९ धावा दिल्या. गोलंदाजीमध्ये केवळ अर्शदीप सिंग, प्रिन्स यादव आणि अक्षर पटेल यांना प्रत्येकी एक बळी मिळवण्यात यश आले.
या सामन्यात विजय मिळवण्यासाठी भारताला आता २४८ धावांची गरज आहे. टी-२० फॉरमॅटमध्ये भारताचा आतापर्यंतचा सर्वात मोठा यशस्वी पाठलाग २०९ धावांचा राहिला आहे. त्यामुळे हा सामना जिंकण्यासाठी भारतीय संघाला एक नवा विक्रम प्रस्थापित करावा लागणार आहे.
📌 महत्वाच्या बातम्या
- ६ वर्ष लिव्ह-इन, अन् ३ महिन्यात घटस्फोट! अभिनेते आनंद काळेंनी सांगितला मित्राच्या मुलीचा किस्सा
- राजगडावर गिर्यारोहकाचा मृत्यू; मालकाच्या मृतदेहासोबत गडावरून उतरत पाळीव कुत्र्याने निभावली स्वामीनिष्ठा
- नाना पाटेकर फटकळ स्वभावाचे होते, त्याचा अनुभव मलाही आला…; शोकसभेत वर्षा उसगांवकर भावूक
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
