प्रतिनिधी, 6 ऑक्टोबर: एमपीएससी विद्यार्थ्यांच्या प्रश्नावर तोडगा काढण्यासाठी आमदार रोहित पवार यांनी राज्य सरकारला दोन दिवसांचा अल्टीमेटम दिला आहे. मागण्या मान्य न झाल्यास विद्यार्थ्यांच्या आक्रमक भूमिकेमुळे संपूर्ण पुणे शहर ठप्प होऊ शकते, असा इशारा पवारांनी दिला. येत्या ७ किंवा ८ ऑक्टोबर रोजी काँग्रेस नेते राहुल गांधी पुण्यात येण्याची शक्यता आहे. या दौऱ्याच्या दिवशी जवळपास १ लाख विद्यार्थी रस्त्यावर उतरतील, असा दावा रोहित पवार यांनी केला आहे.
सीजेपीचे अभिजीत दिपके यांच्या आवाहनाला पाठिंबा देताना पवार म्हणाले की, आंदोलक विद्यार्थी एकतर पुणे शहर बंद करतील किंवा थेट मुंबईत मंत्रालयावर धडक देतील. राज्य सरकार स्वतःच वेगळे आंदोलन उभे करत असून, सत्ताधारी विद्यार्थ्यांच्या न्याय्य आंदोलनाला तडा देण्याचा प्रयत्न करत असल्याचा आरोप त्यांनी केला. एमपीएससी आयोग बर्खास्त करण्याऐवजी संशयित सदस्यांना निलंबित करून चांगले अधिकारी आणावेत, असा पर्याय त्यांनी सुचवला. ‘एमपीएससी यंत्रणेच्या शुद्धीकरणाची गरज असून मागण्या मान्य न झाल्यास आंदोलन आक्रमक होऊ शकते आणि शहर ठप्प होऊ शकते,’ असे पवार म्हणाले.
दरम्यान, रोहित पवार यांनी भाजप नेते आणि मंत्री नितेश राणे यांच्यावरही पलटवार केला. राणेंनी कॅबिनेट मंत्रिपदाची ऑफर देण्यापेक्षा आंदोलक विद्यार्थ्यांशी संवाद साधून त्यांचे प्रलंबित प्रश्न सोडवावेत, असा सल्ला पवारांनी दिला. नितेश राणे भविष्यात भाजप सोडतील आणि आमच्यासोबत आले तर आपण एकत्र मंत्री म्हणून राहू शकतो, असा दावाही रोहित पवार यांनी केला.
📌 महत्वाच्या बातम्या
- MPSC आंदोलन: नवनाथ बन यांची रोहित पवारांवर सडकून टीका, केले गंभीर आरोप
- पतीची एन्ट्री अन् प्रियकराला घट्ट मिठी; वाराणसी रेल्वे स्टेशनजवळ भररस्त्यात हाय-व्होल्टेज ड्रामा
- रणजी ट्रॉफीच्या पहिल्या सामन्यासाठी मुंबईचा युवा संघ जाहीर








