‘महिला आरक्षण 2034 पर्यंत ढकलण्याचा प्रयत्न’; फडणवीसांचा विरोधकांवर हल्लाबोल

महिला आरक्षण 2034 पर्यंत ढकलण्याचा प्रयत्न होत असल्याचा आरोप मुख्यमंत्री फडणवीसांनी केला.

Published On:

ऑगस्ट 25, 2026 9:12 AM

मुंबई : काही गट महिला आरक्षण (Women Reservation) २०३४ पर्यंत पुढे ढकलण्याचा प्रयत्न करत आहेत. २०२३ मध्ये या विधेयकाला पाठिंबा दिलेला असतानाही, आता ते २०२९ मध्ये महिला आरक्षण लागू करण्यास विरोध करत आहेत. विरोधी पक्ष जाणीवपूर्वक गोंधळ निर्माण करत असून महिलांना प्रत्यक्ष आरक्षण मिळण्यामध्ये अडथळे आणत आहे, असा आरोप मुख्यमंत्री देवेंद्र फडणवीस (CM Devendra Fadnavis) यांनी केला.

सोमवारी झालेल्या मंत्रिमंडळाच्या बैठकीनंतर प्रसारमाध्यमांशी बोलताना फडणवीस यांनी विरोधकांवर जोरदार टीका केली. काँग्रेसचे ज्येष्ठ नेते पी. चिदंबरम यांनी मतदारसंघांच्या पुनर्रचनेबाबत केंद्र सरकारवर टीका केली होती.

Devendra Fadnavis on women reservation

याला उत्तर देताना फडणवीस म्हणाले की, काँग्रेस आणि महाविकास आघाडीचे नेते सातत्याने जनतेची दिशाभूल करण्याचा प्रयत्न करत आहेत. २०२३ मध्ये पी. चिदंबरम यांच्यासह सर्वांनीच महिला आरक्षण विधेयकाच्या बाजूने मतदान केले होते. या विधेयकासाठी मतदारसंघांची पुनर्रचना आवश्यक असेल आणि नवीन जनगणनेची आकडेवारी जाहीर झाल्यानंतरच त्याची अंमलबजावणी केली जाईल, असे स्पष्टपणे नमूद करण्यात आले होते.

चिदंबरम यांच्यासह सर्वांनीच हे मान्य केले होते. मात्र, कोविड-१९ महामारीमुळे जनगणना पुढे ढकलण्यात आली. पंतप्रधान मोदींची इच्छा महिलांना २०२९ पर्यंत आरक्षण देण्याची आहे, जुन्या जनगणनेच्या आधारे आरक्षण लागू करता यावे, यासाठी विधेयकात एक छोटीशी सुधारणा प्रस्तावित करण्यात आली होती.

परंतु विरोधकांनी ती फेटाळून लावली. २०२३ मध्ये त्यांनी विधेयकाला पाठिंबा दिला होता, कारण त्यांना माहित होते की त्यांची भूमिका काहीही असली तरी ते विधेयक मंजूर होणारच होते. तरीही, आता जेव्हा आरक्षण प्रत्यक्ष लागू करण्याची वेळ आली आहे, तेव्हा ते त्याला विरोध करत आहेत.

‘मराठी भाषेच्या अटीसाठी मुदतवाढ’

रिक्षाचालकांना मराठी भाषेचे अभ्यासक बनवायचे नाही, तर त्यांना केवळ भाषेचे व्यावहारिक ज्ञान असावे एवढाच उद्देश आहे. यात कोणतीही सक्ती नाही. मराठी न बोलणाऱ्या रिक्षाचालकांना दिलासा देत, मुख्यमंत्री देवेंद्र फडणवीस यांनी या अटीच्या पूर्ततेसाठीची मुदत आणखी वाढवण्याची घोषणा केली.

तेलातील भेसळीविरोधात ‘एसओपी’ (SOP)

तेलाच्या गुणवत्तेवर नियंत्रण ठेवतानाच पारंपरिक व्यवसायांचे रक्षण करणेही आवश्यक आहे. तेलातील भेसळ रोखण्यासाठी समन्वय साधून ‘प्रमाणित कार्यपद्धती’ (SOP) तयार करण्याचे निर्देश अन्न व औषध प्रशासनाला (FDA) दिले जातील, असे फडणवीस यांनी सांगितले.