यवतमाळ: पावसाळ्याचे दिवस आहेत, पण सध्या यवतमाळमध्ये जे ढग फुटतायत ते अक्षरशः धडकी भरवणारे आहेत. सलग कोसळणाऱ्या मुसळधार पावसानं यवतमाळकरांची चांगलीच दाणादाण उडवलीय. अनेक ठिकाणी नद्या-नाले दुथडी भरून वाहत आहेत. पुलांवरून पाणी जात असल्यानं वाहतूक विस्कळीत झालीय. याच भीषण परिस्थितीच्या पार्श्वभूमीवर प्रशासनानं आता एक अत्यंत महत्त्वाचा निर्णय घेतलाय.
भारतीय हवामान विभागाने (IMD) शुक्रवार ३१ जुलै २०२६ रोजी यवतमाळ जिल्ह्यात अतिवृष्टीचा गंभीर इशारा दिला आहे. त्यामुळेच, संभाव्य पूरस्थिती आणि विद्यार्थ्यांच्या सुरक्षेचा विचार करून जिल्हाधिकारी विकास मीना यांनी मोठा निर्णय घेतला. जिल्ह्यातील सर्व प्राथमिक, माध्यमिक शाळा आणि महाविद्यालयांना उद्या एक दिवसाची सुट्टी जाहीर करण्यात आली आहे. हा आदेश सरकारी, अनुदानित आणि सर्व खासगी शिक्षण संस्थांना लागू असणार आहे.
Yavatmal IMD Rain Alert: परीक्षा मात्र वेळापत्रकानुसारच होणार
शाळांना सुट्टी जाहीर झाली असली तरी एक गोष्ट लक्षात ठेवणं गरजेचं आहे. ज्या विद्यार्थ्यांच्या उद्या पूर्वनियोजित परीक्षा आहेत, त्या ठरलेल्या वेळेतच पार पडतील. त्यात कोणताही बदल होणार नाही. परीक्षा केंद्रांनी विद्यार्थ्यांसाठी आवश्यक ती काळजी घेऊन कामकाज सुरळीत पार पाडण्याच्या कडक सूचना प्रशासनाने दिल्या आहेत.
दुसरीकडे, गुरुवारी दिवसभर झालेल्या पावसाने अनेक तालुक्यांमध्ये जनजीवन पूर्णपणे विस्कळीत केलंय. त्यामुळे प्रशासनाने नागरिकांसाठी एक अलर्ट जारी केलाय. अत्यंत महत्त्वाचं काम असल्याशिवाय कुणीही घराबाहेर पडू नका, असं स्पष्ट सांगण्यात आलंय. पाण्याने भरलेले रस्ते किंवा पूल ओलांडण्याची रिस्क अजिबात घेऊ नका. विजा चमकत असताना झाडाखाली थांबू नका.
थोडक्यात सांगायचं तर, निसर्गाचा रौद्रावतार पाहता काळजी घेण्याची वेळ आली आहे. शेतकरी बांधवांनी हवामान निवळल्यावरच शेतात जावं. लहान मुले आणि वृद्धांची विशेष काळजी घ्या. सोशल मीडियावरील अफवांवर विश्वास न ठेवता, केवळ प्रशासनाच्या अधिकृत सूचनांचेच पालन करा, असे आवाहन जिल्हा प्रशासनाने केले आहे.
📌 महत्वाच्या बातम्या
- राज्यपालांच्या नावे बनावट शिक्के; मुंबईत VIP रेल्वे तिकीट घोटाळ्याचा पर्दाफाश, आंतरराज्यीय टोळी गजाआड
- नीट पेपरफुटी आंदोलन: जंतर मंतरवरील आंदोलकांवरील गुन्हे मागे; पण ‘या’ विद्यार्थ्यांची सुटका नाही!
- लाडक्या बहिणींना झटका; 3 पेक्षा जास्त मुलं असणाऱ्या महिलांना मोठा धक्का
