‘गॅलेक्सी’च्या चर्चेत आणखी एक ट्विस्ट; सलमानने विकला स्वतःचा फ्लॅट

बॉलिवूड अभिनेता सलमान खानने मुंबईतील वांद्रे येथील ‘शिव-आस्था हाइट्स’मधील आपला फ्लॅट 3.50 कोटी रुपयांना विकल्याची माहिती समोर आली आहे.

by Diksha

Published On:

जुलै 14, 2026 1:12 PM

मुंबई: बॉलिवूडचा सुपरस्टार सलमान खान (Salman Khan) ज्याला प्रेमाने ‘भाईजान’ म्हटले जाते तो कोणत्या ना कोणत्या कारणानं सतत चर्चेत असतो. वयाची साठी गाठत असतानाही, तो अनेक तरुणींच्या गळ्यातील ताईत आणि असंख्य तरुणांसाठी ‘स्टाईल आयकॉन’ बनून राहिला आहे. अलीकडेच, वांद्रे (Bandra) येथील ‘गॅलेक्सी अपार्टमेंट्स’मधील (Galaxy Apartment) आपल्या दीर्घकाळापासूनच्या निवासस्थानातून बाहेर पडून नवीन घरात जाण्याबाबत त्याच्याविषयी बरीच चर्चा रंगली आहे. याच दरम्यान, ‘भाईजान’ने वांद्रे येथील स्वतःच्या मालकीचा एक आलिशान फ्लॅट विकल्याचे वृत्त समोर आलं आहे. प्रसारमाध्यमांच्या वृत्तानुसार, त्यानं हा फ्लॅट २०१५ मध्ये २.८८ कोटी रुपयांना खरेदी केला होता.

वांद्र्यातील फ्लॅटचा व्यवहार पूर्ण

‘हिंदुस्तान टाइम्स’च्या एका वृत्तानुसार, सलमान खानने वांद्रे येथील ‘शिव-आस्था हाइट्स’ इमारतीमधील आपला ७५८ चौरस फुटांचा फ्लॅट विकला आहे. त्यानं हा फ्लॅट जो मूळतः २.८८ कोटी रुपयांना खरेदी केला होता, सुमारे ३.५० कोटी रुपयांना विकला. या मालमत्तेसोबत दोन कार पार्किंगच्या जागांचाही समावेश आहे. नोंदणी कागदपत्रांवरून असं दिसून येतं की, या मालमत्तेचं मूल्य तिच्या कार्पेट एरियानुसार (प्रत्यक्ष वापरण्यायोग्य क्षेत्रफळ) प्रति चौरस फूट सुमारे ४६,००० रुपये इतके निश्चित करण्यात आलं होतं.

हा फ्लॅट मुनिरा अकबर अली दांडावाला, महदीयाली अकबर अली दांडावाला आणि झेहरा यांनी खरेदी केला आहे. कागदपत्रांनुसार, खरेदीदारांनी मुद्रांक शुल्क २१ लाख रुपये आणि नोंदणी शुल्क ३०,००० रुपये भरले आहेत. मात्र, या व्यवहाराबाबत सलमान किंवा नवीन मालक यांपैकी कोणीही अद्याप कोणतेही अधिकृत निवेदन जारी केलेले नाही.

सलमान खान ‘गॅलेक्सी’ सोडणार?

अलीकडील प्रसारमाध्यमांतील वृत्तांनुसार, लॉरेन्स बिश्नोईकडून मिळणाऱ्या सततच्या धमक्यांमुळे सलमान खान मुंबईतील वांद्रे येथे नवीन घर बांधण्याच्या तयारीत आहे. ‘गॅलेक्सी’पासून काही अंतरावरच समुद्रकिनारी (सी-फेसिंग) सहा मजली घर बांधणार आहे. या प्रकल्पाला ‘महाराष्ट्र कोस्टल झोन मॅनेजमेंट अथॉरिटी’ची मंजुरीही मिळाली आहे. तसेच, सलमान खाननं ही जमीन आपली आई सलमा खान यांच्या नावानं खरेदी केल्याची माहिती आहे.

सलमान खानच्या आगामी चित्रपटांबद्दल सांगायचं तर, तो लवकरच अपूर्व लाखिया यांच्या ‘मातृभूमी’ या चित्रपटात दिसणार आहे. याव्यतिरिक्त, दक्षिण भारतीय चित्रपट निर्माते वामशी पेडिपल्ली यांच्या दिग्दर्शनाखालील एका ॲक्शन-थ्रिलर चित्रपटातही तो मुख्य भूमिकेत झळकणार आहे. हा चित्रपट २०२७ मध्ये ईदच्या मुहूर्तावर प्रदर्शित होणार आहे.