प्रतिनिधी, 26 ऑक्टोबर: पाकिस्तानचा सलामीवीर सईम अयुबला चालू वनडे तिरंगी मालिकेतून (tri-series) वगळण्यात आले आहे. फलंदाजीचा फॉर्म सुधारण्यासाठी आणि गमावलेला आत्मविश्वास परत मिळवण्यासाठी देशांतर्गत क्रिकेटमध्ये खेळण्याची इच्छा त्याने व्यक्त केली होती. त्याची ही विनंती पाकिस्तान क्रिकेट बोर्डाने (PCB) मान्य केली असून, उर्वरित मालिकेसाठी त्याच्या जागी साहिबजादा फरहानला संघात स्थान देण्यात आले आहे.
मुख्य प्रशिक्षक माईक हेसन यांच्याशी चर्चा केल्यानंतर अयुबला संघातून मुक्त करण्याचा निर्णय व्यवस्थापनाने घेतला. सईमने आपला फलंदाजीचा फॉर्म सुधारण्यासाठी आणि आत्मविश्वास परत मिळवण्यासाठी देशांतर्गत क्रिकेटमध्ये परतण्याची विनंती केली.
पीसीबीनेही या वृत्ताला दुजोरा दिला आहे. त्यांनी एका निवेदनात म्हटले आहे की, “सईमच्या निर्णयाचा आदर करत आणि त्याने स्वतःच्या सध्याच्या फॉर्मबद्दल केलेल्या प्रामाणिक मूल्यमापनाचे कौतुक करत, संघ व्यवस्थापन आणि राष्ट्रीय निवड समितीने परस्पर सहमतीने त्याची विनंती मान्य केली आहे.” तसेच, “राष्ट्रीय निवड समितीने तिरंगी मालिकेतील उर्वरित सामन्यांसाठी सईमचा बदली खेळाडू म्हणून साहिबजादा फरहानच्या नावाची घोषणा केली आहे,” असेही बोर्डाने स्पष्ट केले.
या मालिकेत फखर झमानसोबत सलामीला येणाऱ्या अयुबला मोठी धावसंख्या उभारण्यात अपयश आले. त्याने इंग्लंड आणि श्रीलंकेविरुद्धच्या तीन डावांत मिळून अवघ्या २१ धावा केल्या. १८ ऑक्टोबरला श्रीलंकेविरुद्ध त्याने ८ चेंडूत ७ धावा केल्या, जिथे डावखुरा वेगवान गोलंदाज दिलशान मदुशंकाने त्याला बाद केले. त्यानंतर इंग्लंडविरुद्धच्या लढतीत तो सनी बेकरच्या गोलंदाजीवर ६ चेंडूत ८ धावा करून बाद झाला. तर २५ ऑक्टोबरला पुन्हा इंग्लंडविरुद्ध खेळताना हेन्री क्रोकॉम्बेने त्याला बाद केले, त्यावेळी त्याने १२ चेंडूत केवळ ६ धावा केल्या होत्या.
दरम्यान, पाकिस्तानने या मालिकेत सलग तीन विजय मिळवत आधीच अंतिम फेरीत धडक मारली आहे. आता मंगळवारी, २७ ऑक्टोबर रोजी लाहोरच्या गद्दाफी स्टेडियमवर त्यांचा साखळी फेरीतील शेवटचा सामना श्रीलंकेशी होणार आहे. या सामन्यापूर्वी फरहान संघात सामील होईल. फरहानने आतापर्यंत ६ वनडे सामन्यांत १६.८३ च्या सरासरीने आणि ७५.९३ च्या स्ट्राईक रेटने १०१ धावा केल्या आहेत. तर लिस्ट ‘ए’ क्रिकेटमध्ये ८१ सामने खेळताना त्याने ४०.०६ च्या सरासरीने ३,१६५ धावा फटकावल्या आहेत, ज्यात ८ शतके आणि २० अर्धशतकांचा समावेश आहे.
अलीकडच्या काळातील खराब फॉर्म वगळता, सईम अयुबची वनडेतील एकूण कामगिरी चांगली राहिली आहे. त्याने २० वनडे सामन्यांत ४०.६३ च्या सरासरीने आणि ९९.३६ च्या स्ट्राईक रेटने ७७२ धावा केल्या आहेत, ज्यामध्ये तीन शतके आणि तीन अर्धशतके असून नाबाद ११३ ही त्याची सर्वोच्च धावसंख्या आहे. मात्र, इतर प्रकारांमध्ये त्याची आकडेवारी फारशी प्रभावी नाही. ९ कसोटी सामन्यांत त्याने २२.७५ च्या सरासरीने ३६४ धावा केल्या असून त्यात तीन अर्धशतके आहेत, पण एकही शतक नाही.
तसेच, ७१ टी-२० आंतरराष्ट्रीय सामन्यांतील ६७ डावांमध्ये सईमने २१.१९ च्या सरासरीने आणि १३६.४२ च्या स्ट्राईक रेटने एकूण १,३५६ धावा केल्या आहेत. या फॉरमॅटमध्ये त्याच्या नावावर सहा अर्धशतकांची नोंद आहे.
📌 महत्वाच्या बातम्या
- एकनाथ शिंदे यांचे नेत्यांना आदेश: ‘राजकारण थांबवा, थेट दुष्काळग्रस्त शेतकऱ्यांच्या बांधावर जा’
- आदित्य ठाकरे कर्जत वृक्षतोडीविरोधात आक्रमक; आज घेणार प्रकल्पाचा आढावा
- न्यूझीलंडविरुद्ध चौथ्या टी-२० सामन्यात इशान किशनचे पुनरागमन? वैभव सूर्यवंशीची घेणार जागा
Quick Answers
आपला फलंदाजीचा फॉर्म सुधारण्यासाठी आणि गमावलेला आत्मविश्वास परत मिळवण्यासाठी सईम अयुबने देशांतर्गत क्रिकेटमध्ये खेळण्याची इच्छा व्यक्त केली होती. त्याची ही विनंती पाकिस्तान क्रिकेट बोर्डाने मान्य केल्याने त्याला संघातून वगळण्यात आले.
उर्वरित वनडे तिरंगी मालिकेसाठी सईम अयुबच्या जागी साहिबजादा फरहानला संघात स्थान देण्यात आले आहे.
सईम अयुबने इंग्लंड आणि श्रीलंकेविरुद्धच्या तीन डावांत मिळून अवघ्या २१ धावा केल्या. यात त्याने एका सामन्यात ७ धावा, दुसऱ्या सामन्यात ८ धावा आणि तिसऱ्या सामन्यात केवळ ६ धावा केल्या.
पाकिस्तानचा साखळी फेरीतील शेवटचा सामना मंगळवारी, २७ ऑक्टोबर रोजी लाहोरच्या गद्दाफी स्टेडियमवर श्रीलंकेविरुद्ध होणार आहे.
टीप: खालील झटपट उत्तरे AI च्या सहाय्याने तयार करण्यात आली असून ती वरील मूळ बातमीतील माहितीनुसार आहेत. अधिक संदर्भासाठी संपूर्ण बातमी वाचा.
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
