वेस्ट इंडिजविरुद्धच्या या ऐतिहासिक विजयानंतर संजू सॅमसनला त्याच्या वादळी खेळीसाठी ‘प्लेअर ऑफ द मॅच’ (Player of the Match) पुरस्काराने गौरवण्यात आले आहे. दुसऱ्या बाजूने ठराविक अंतराने विकेट्स पडत असतानाही संजूने एका बाजूने खिंड लढवली आणि भारताच्या विजयाची आशा जिवंत ठेवली.
संजूने ९७ धावांच्या नाबाद खेळीने त्याने भारताला केवळ विजयच मिळवून दिला नाही, तर टी-२० विश्वचषकाच्या इतिहासातील एका सर्वात मोठ्या रनचेसची नोंद केली.
भारतीय संघाने मिळवलेल्या या थरारक विजयानंतर कर्णधार सूर्यकुमार यादवने आपल्या भावना व्यक्त केल्या आहेत. हा सामना आमच्यासाठी एखाद्या उपांत्यपूर्व फेरीसारखाच (Quarterfinal) होता आणि ज्या प्रकारे जिद्द दाखवली, ते कौतुकास्पद आहे, असे सूर्याने नमूद केले.
संजू सॅमसनच्या खेळीबद्दल बोलताना तो म्हणाला, “मी नेहमीच सांगतो की, जे वाट पाहतात अशा चांगल्या माणसांसोबत शेवटी चांगलंच घडतं. जेव्हा संजू खेळत नव्हता, तेव्हा त्याने घेतलेल्या मेहनतीचे हे फळ त्याला आज मिळाले आहे”.
आता भारतीय संघ मुंबईसाठी रवाना होणार असून, ५ मार्चला होणाऱ्या इंग्लंडविरुद्धच्या महामुकाबल्यासाठी सज्ज होणार आहे.
टीम इंडियाला ऐतिहासिक विजय मिळवून देणाऱ्या संजू सॅमसनने सामन्यानंतर आपल्या भावनांना मोकळी वाट करून दिली. ‘मॅन ऑफ द मॅच’चा पुरस्कार स्वीकारताना संजूने धोनी, विराट आणि रोहित शर्मा यांच्याबद्दल एक अत्यंत महत्त्वाची प्रतिक्रिया दिली आहे.
संजू अतिशय भावूक होत म्हणाला, “देशासाठी खेळण्याचं स्वप्न पाहिल्यापासून मी नेमक्या याच एका खेळीची वाट पाहत होतो. माझ्या या प्रवासात अनेक चढउतार आले. मी स्वतःवरच अनेकदा शंका घ्यायचो की मी खरंच इथवर पोहोचू शकेन का? पण आजच्या या दिवसासाठी मी देवाचा खूप आभारी आहे.”
या कठीण परिस्थितीतून सावरण्यासाठी दिग्गज खेळाडूंची मदत झाल्याचं त्याने आवर्जून सांगितलं. तो पुढे म्हणाला, “विराट कोहली, रोहित शर्मा आणि एमएस धोनी यांच्यासारख्या दिग्गजांकडून मी खूप काही शिकलो. परिस्थितीनुसार ते आपला खेळ कसा बदलतात, हे मी जवळून पाहिलं आणि त्याचा मला आज प्रचंड फायदा झाला.”
आजच्या संस्मरणीय खेळीबद्दल बोलताना संजूने स्पष्ट केलं की, आज परिस्थिती थोडी वेगळी होती. जेव्हाही तो मोठे फटके मारायला जायचा, तेव्हा दुसऱ्या बाजूने विकेट पडत होत्या. त्यामुळे आज त्याने वर्तमानात राहून फक्त ‘मेरिट’वर चेंडू खेळण्यावर भर दिला. संजूच्या मते, हा त्याच्या आयुष्यातील सर्वात महान आणि अविस्मरणीय दिवस आहे.
भारताने आज केवळ वेस्ट इंडिजलाच धूळ चारली नाही, तर टी-२० विश्वचषकात एक नवा इतिहास रचला आहे. आजचा हा विजय भारताचा विश्वचषकाच्या इतिहासातील सर्वात मोठा यशस्वी ‘रनचेस’ ठरला आहे.
विशेष म्हणजे, संपूर्ण टी-२० विश्वचषकाच्या इतिहासातील हा तिसरा सर्वात मोठा यशस्वी रनचेस ठरला आहे. या विक्रमी यादीत आता टीम इंडियाने दिमाखात एन्ट्री मारली आहे.
याआधी २०१६ च्या विश्वचषकात इंग्लंडने दक्षिण आफ्रिकेविरुद्ध तब्बल २३० धावांचे महाकाय लक्ष्य यशस्वीपणे गाठले होते. तर २००७ मध्ये दक्षिण आफ्रिकेने वेस्ट इंडिजविरुद्ध २०६ धावांचा यशस्वी पाठलाग केला होता.
आता या यादीत भारताने आपलं नाव कोरलं आहे. १९६ धावांचे कठीण आव्हान सहज पार करत भारताने आपली ताकद पुन्हा एकदा संपूर्ण जगाला दाखवून दिली आहे.
टीम इंडियाने दणदणीत विजयासह उपांत्य फेरीत धडक मारली असून, आता खऱ्या थराराला सुरुवात होणार आहे! २०२६ च्या टी-२० विश्वचषकाच्या सेमीफायनलचे वेळापत्रक आता अधिकृतपणे समोर आले आहे.
भारतीय चाहत्यांसाठी ही एक मोठी पर्वणी असणार आहे, कारण भारताचा हा महामुकाबला बलाढ्य इंग्लंडविरुद्ध थेट आपल्या मुंबईत ५ मार्चला (गुरुवारी) खेळवला जाणार आहे.
वेळापत्रक:
पहिली सेमीफायनल: दक्षिण आफ्रिका विरुद्ध न्यूझीलंड (४ मार्च, बुधवार – कोलकाता)
दुसरी सेमीफायनल: भारत विरुद्ध इंग्लंड (५ मार्च, गुरुवार – मुंबई)
आता वानखेडेवर टीम इंडिया इंग्लंडचा धुव्वा उडवून थेट फायनलचं तिकीट कन्फर्म करणार का, याचीच उत्सुकता सर्वांना लागली आहे. विश्वचषकाचा हा रणसंग्राम आता अंतिम टप्प्यात पोहोचला आहे!
अखेर तो सुवर्णक्षण आलाच! टीम इंडियाने टी-२० विश्वचषकात नवा इतिहास रचत वेस्ट इंडिजवर ५ गडी राखून दणदणीत विजय मिळवला आहे. १९६ धावांचं महाकाय आव्हान भारताने अवघ्या १९.२ षटकांत (४ चेंडू राखून) पूर्ण केलं आणि संपूर्ण देशात एकच जल्लोष सुरू झाला.
या ऐतिहासिक विजयाचा खरा शिल्पकार ठरला तो संजू सॅमसन! संजूने मैदानात अक्षरशः तुफान आणलं आणि ९७ धावांची मॅच विनिंग खेळी केली. अवघ्या ३ धावांसाठी त्याचं शतक हुकलं असलं, तरी त्याच्या या वादळी खेळीने इंडिजच्या गोलंदाजांना चारही मुंड्या चित केलं. शतक हुकल्याची हुरहुर असली तरी त्याने आज आपल्या खेळीने करोडो भारतीयांची मनं जिंकली आहेत.
शेवटच्या षटकात विजयासाठी ७ धावांची गरज असताना भारताने केवळ २ चेंडूंमध्येच हे लक्ष्य गाठलं आणि १९९ धावांचा टप्पा ओलांडून विजयावर शिक्कामोर्तब केलं. टी-२० विश्वचषकात एवढं मोठं लक्ष्य यशस्वीपणे पार करत टीम इंडियाने आज एका नव्या विक्रमाची नोंद केली आहे.
आता खऱ्या अर्थाने श्वास रोखून धरायची वेळ आली आहे! टीम इंडिया आणि ऐतिहासिक विजयाच्या मध्ये आता फक्त ६ चेंडू आणि ७ धावांचं अंतर उरलं आहे.
पण या अटीतटीच्या सामन्यात आता आणखी एक भन्नाट ट्विस्ट आलाय. वेस्ट इंडिजच्या गोलंदाजांना अक्षरशः रडवणारा संजू सॅमसन सध्या ८७ धावांवर खेळत आहे. त्याला आपलं धडाकेबाज शतक पूर्ण करण्यासाठी अजून १३ धावांची आवश्यकता आहे.
इथेच खऱ्या अर्थाने गोची झाली आहे! भारताला जिंकण्यासाठी फक्त ७ धावा हव्या असताना, संजू १३ धावा कशा कुटणार? हा प्रश्न आता प्रत्येक चाहत्याला पडलाय. हे शतक पूर्ण करण्यासाठी आता संजूला एखादा चमत्कारच करावा लागेल किंवा ‘नो-बॉल’ किंवा ‘वाईड’ची मदत मिळून त्याला मोठे फटके मारावे लागतील.
आता शेवटचं षटक कोण टाकतंय आणि पहिल्याच चेंडूवर संजू काय कमाल करतोय, याकडे संपूर्ण देशाचे डोळे लागले आहेत.
संजू सॅमसनच्या वादळी खेळीने वेस्ट इंडिजच्या गोलंदाजांना अक्षरशः घाम फोडलाय! आता टीम इंडिया विश्वचषकात नवा इतिहास रचण्याच्या अगदी जवळ पोहोचली आहे.
सध्या १७ षटकांअखेर भारताची धावसंख्या ४ बाद १७१ अशी झाली आहे. आता या ऐतिहासिक विजयासाठी शेवटच्या १८ चेंडूंत फक्त २५ धावांची गरज आहे. आवश्यक रनरेट आता ८.३३ वर आला असून सामन्यावरील भारताची पकड पूर्णपणे मजबूत झालीय.
मैदानावर संजू सॅमसन नावाचं वादळ घोंघावतंय. तो तब्बल ४५ चेंडूंत ८१ धावांवर नाबाद खेळत असून तो आता एका संस्मरणीय शतकाकडे वाटचाल करतोय. दुसरीकडे, जीवदान मिळालेला हार्दिक पांड्याही ९ चेंडूंत १५ धावा करत त्याला भक्कम साथ देतोय.
आता हे दोघे मिळून भारताला किती लवकर विजय मिळवून देतात आणि संजू शतक पूर्ण करतो का, हे पाहणं थरारक ठरणार आहे.
हा झेल सुटला की मॅच सुटली? वेस्ट इंडिजला आता ही मोठी चूक चांगलीच भोवू शकते. जेसन होल्डरने एक्स्ट्रा कव्हरवर हार्दिक पांड्याचा एक अतिशय सोपा झेल सोडला आणि त्याला अवघ्या ६ धावांवर मोठं जीवदान दिलं आहे.
आजच्या सामन्यात शिमरॉन हेटमायरने हवेत झेप घेत काही भन्नाट झेल टिपले आहेत आणि उत्तम क्षेत्ररक्षण केलंय. पण ऐन मोक्याच्या क्षणी होल्डरच्या हातून झालेली ही घोडचूक वेस्ट इंडिजच्या हातून थेट विश्वचषकाची ट्रॉफी हिरावून घेऊ शकते.
१६.१ षटकांअखेर भारताची धावसंख्या: ४ बाद १६१ (विजयासाठी २३ चेंडूंत ३५ धावांची गरज)
विजयाच्या अगदी जवळ पोहोचलेल्या टीम इंडियाला अचानक एक मोठा धक्का बसला आहे! आक्रमक ‘फिनिशिंग टच’ देण्यासाठी ओळखला जाणारा हार्दिक पांड्या ऐन मोक्याच्या क्षणी बाद झालाय. शमर जोसेफने हा अत्यंत महत्त्वाचा बळी घेत सामन्यात पुन्हा एकदा जीव ओतला आहे.
१८.२ षटकांअखेर भारताची धावसंख्या आता ५ बाद १७९ अशी झाली आहे. सामन्याची धाकधूक आता शिगेला पोहोचली असून, भारताला विजयासाठी शेवटच्या १० चेंडूंत १७ धावांची गरज आहे.
एका बाजूने संजू सॅमसन अजूनही खंबीरपणे उभा असून तो ४८ चेंडूंत ८७ धावांवर खेळत आहे. आता हार्दिकची जागा घेण्यासाठी शिवम दुबे मैदानात आला आहे. आता हे उर्वरित १० चेंडूच ठरवणार की संजूचं शतक पूर्ण होतं की नाही आणि भारत हा ऐतिहासिक विजय मिळवतो की नाही!
संजू सॅमसन आणि हार्दिक पांड्या मैदानावर असल्याने भारतीय संघाचा आत्मविश्वास चांगलाच वाढला आहे. सामना आता अंतिम आणि अतिशय रोमांचक टप्प्यात पोहोचला असून, सध्याच्या आकडेवारीनुसार भारताच्या विजयाची शक्यता ६६ टक्क्यांवर पोहोचली आहे.
थोडक्यात सांगायचं तर, आकडेवारी आणि परिस्थिती दोन्ही आता भारताच्या बाजूने झुकले आहेत. संजूचा भन्नाट फॉर्म आणि हार्दिकची आक्रमक शैली पाहता वेस्ट इंडिजचे गोलंदाज आता प्रचंड दबावाखाली आहेत. आता हे दोघे मिळून हा ऐतिहासिक विजय कसा साकारतात, याकडे सर्वांचं लक्ष लागून आहे.
तिलक वर्मा बाद झाल्यानंतर आता संजू सॅमसनला साथ देण्यासाठी हार्दिक पांड्या क्रीझवर आला आहे. १४.३ षटकांअखेर भारताची धावसंख्या ४ बाद १४१ अशी झाली आहे.
सामना आता अतिशय अटीतटीच्या वळणावर पोहोचलाय. टीम इंडियाला हा ऐतिहासिक विजय मिळवण्यासाठी उर्वरित ३३ चेंडूंत ५५ धावांची गरज आहे. एका बाजूने संजू सॅमसन भन्नाट फॉर्ममध्ये आहे, तर दुसरीकडे हार्दिक त्याच्या आक्रमक ‘फिनिशिंग टच’साठी जगभरात ओळखला जातो.
आता ही जोडी इंडिजच्या गोलंदाजांवर कसा हल्लाबोल करते आणि विजयाचा कळस चढवते का, हे पाहणं थरारक असणार आहे.
जेसन होल्डरने मोक्याच्या क्षणी भारताची ही धोकादायक ठरणारी जोडी फोडली आहे. मागील चेंडूवरच शानदार चौकार मारणाऱ्या तिलकने पुन्हा एकदा हवेत मोठा फटका मारण्याचा मोह आवरला नाही.
त्याने मिड-ऑफच्या वरून चेंडू टोलवण्याचा प्रयत्न केला, पण चेंडूला हवी तशी उंची मिळाली नाही. तिथेच उभ्या असलेल्या शिमरॉन हेटमायरने अचूक टायमिंग साधत हवेत झेप घेतली आणि एक कमालीचा झेल टिपला.
यासह संजू सॅमसन आणि तिलकमधील ४२ धावांची महत्त्वपूर्ण भागीदारी संपुष्टात आली आहे. तिलक ३२ धावांवर तंबूत परतला असून, आता सामन्यात खऱ्या अर्थाने रंगत वाढली आहे.
विजयाच्या दिशेने सुसाट सुटलेल्या भारतीय संघाला अचानक एक मोठा ब्रेक लागलाय! संजू सॅमसनला भक्कम साथ देणारा युवा तिलक वर्मा मोक्याच्या क्षणी बाद झाला आहे.
अवघ्या १४ चेंडूंत २७ धावांची अत्यंत महत्त्वाची आणि वेगवान खेळी करून तिलक माघारी परतला. १४.३ षटकांत भारताने १४१ धावांपर्यंत मजल मारली असली तरी, हा चौथा धक्का संघाची धाकधूक नक्कीच वाढवणारा आहे. आता विजयाचं बरंचसं ओझं एकट्या संजू सॅमसनच्या खांद्यावर आलं आहे.
१४.३ षटकांअखेर भारताची धावसंख्या: ४ बाद १४१
संजू सॅमसन आणि युवा तिलक वर्मा यांनी वेस्ट इंडिजच्या गोलंदाजांना अक्षरशः सळो की पळो करून सोडलं आहे. या दोघांच्या धडाकेबाज भागीदारीच्या जोरावर भारताने आता ३ बाद १३६ धावांचा टप्पा गाठला आहे.
मैदानात संजूचा रुद्रावतार पाहायला मिळत असून तो ३९ चेंडूंत ६९ धावांवर नाबाद खेळत आहे. दुसरीकडे त्याला तितकीच खंबीर साथ देत तिलक वर्मानेही अवघ्या १२ चेंडूंत २३ धावा कुटत इंडिजच्या गोलंदाजांवर प्रचंड दबाव वाढवला आहे.
१९६ धावांचं महाकाय लक्ष्य आता हळूहळू आवाक्यात येत असून, ही जोडी अशीच खेळत राहिली तर भारत हा सामना खिशात घालेल यात शंका नाही.
पहिल्या षटकात केवळ ३ धावा देणाऱ्या शमर जोसेफची दुसऱ्या षटकात चांगलीच धुलाई झाली आहे. या महत्त्वाच्या षटकात तब्बल १७ धावा वसूल करत भारताने विजयासाठी आवश्यक असलेला रनरेट ११ च्या खाली आणलाय.
संजू सॅमसनने पहिल्याच चेंडूवर सरळ रेषेत कडक चौकार लगावला. त्यानंतर स्ट्राईकवर आलेल्या युवा तिलक वर्माने आक्रमक रूप धारण करत सलग तीन चौकारांची हॅटट्रिक साधली! तिलकचा लॉंग ऑफचा फटका आणि रदरफोर्डच्या खराब क्षेत्ररक्षणाचा मिळालेला फायदा, यामुळे भारताला हे हवं असलेलं मोठं षटक मिळालं आहे.
१३ षटकांअखेर भारताची धावसंख्या: ३ बाद १२१ (विजयासाठी आता ४२ चेंडूंत ७५ धावांची गरज)
११ व्या षटकात गोलंदाजीला आलेल्या शमर जोसेफने आपल्या पहिल्याच स्पेलमध्ये कमाल केली आहे. त्याने भारताचा कर्णधार सूर्यकुमार यादवला (१६ चेंडूंत १८ धावा) तंबूत पाठवलं.
मागील षटकातच मोतीने सूर्याचा झेल सोडत त्याला १७ धावांवर एक मोठं जीवदान दिलं होतं. पण सूर्याला या मोक्याच्या संधीचा फायदा घेता आला नाही. जोसेफच्या चेंडूवर डीप कव्हरला रदरफोर्डने एक सुरेख लो-कॅच टिपला आणि सूर्याची खेळी संपुष्टात आणली.
१०.२ षटकांअखेर भारताची धावसंख्या: ३ बाद ९९
भारताने १०० धावांचा टप्पा ओलांडला असला तरी, संघाला एक मोठा धक्का बसला आहे. कर्णधार सूर्यकुमार यादव आज मोठी खेळी करण्यात अपयशी ठरला असून तो बाद झाला आहे.
एका बाजूने संजू सॅमसनने आपला धडाका सुरूच ठेवला असून तो खंबीरपणे उभा आहे. आता सूर्याची जागा घेण्यासाठी युवा फलंदाज तिलक वर्मा मैदानात आला आहे. विजयाचं लक्ष्य गाठण्यासाठी आता संजू आणि तिलकच्या एका भक्कम भागीदारीची नितांत गरज आहे.
संजू सॅमसनने मैदानात अक्षरशः आग ओकली आहे! त्याने अवघ्या २६ चेंडूंत ५३ धावांची शानदार खेळी करत आपलं अर्धशतक पूर्ण केलंय. या धडाकेबाज खेळीत त्याने ३ उत्तुंग षटकार आणि ६ खणखणीत चौकार लगावले आहेत.
विशेष म्हणजे, संजूने कोणताही नाहक धोका न पत्करता अत्यंत हुशारीने ही खेळी सजवली आहे. १० षटकांअखेर भारताची धावसंख्या २ बाद ९८ अशी झाली असून, आता टीम इंडियाने या मोठ्या रनचेसवर आपली मजबूत पकड निर्माण केली आहे.
पॉवरप्लेच्या पहिल्या ६ षटकांत सामन्यात चांगलीच रंगत पाहायला मिळाली. सुरुवातीच्या या षटकांवर नजर टाकल्यास खालील महत्त्वाचे क्षण समोर येतात:
पहिल्या ६ षटकांचा पॉवरप्ले संपला असून भारताने २ गड्यांच्या मोबदल्यात ५३ धावा केल्या आहेत. आता विजयासाठी ८४ चेंडूंत १४३ धावांची गरज आहे.
संजू सॅमसन (१३ चेंडूंत २४ धावा) आणि कर्णधार सूर्यकुमार यादव (३ धावा) सध्या मैदानावर आहेत. मॅथ्यू फोर्डच्या सलग तिसऱ्या षटकात सॅमसनने स्लोअर चेंडू अचूक ओळखत बॅकवर्ड पॉईंटवरून एक कडक चौकार वसूल केला. सॅमसनला मिळालेल्या या शानदार सुरुवातीचं आता एका मोठ्या खेळीत रूपांतर करावं लागणार आहे.
संजू सॅमसन एका बाजूने तुफानी फटकेबाजी करत असताना, भारताने आणखी एक महत्त्वपूर्ण विकेट गमावली आहे. जेसन होल्डरने आपल्या पहिल्याच षटकात कमाल करत फॉर्ममध्ये असलेल्या ईशान किशनला बाद केलं.
मोठा फटका मारण्याच्या नादात ईशान फसला आणि चेंडू थेट डीप स्क्वेअर लेगला गेला. शिमरॉन हेटमायरने कोणतीही चूक न करता आपला दुसरा अप्रतिम झेल टिपला.
३.३ षटकांत भारताची धावसंख्या: २ बाद ४१
अकिल हुसैनच्या तिसऱ्या षटकात संजू सॅमसनने २ षटकार आणि १ चौकार लगावत १६ धावा कुटल्या आणि धडाकेबाज सुरुवात केली. मात्र, याच षटकाच्या शेवटच्या चेंडूवर मोठा फटका मारण्याच्या नादात अभिषेक शर्मा फसला. हेटमायरने हवेत उडालेला चेंडू अचूक टिपला आणि अभिषेकला स्वस्तात माघारी परतावं लागलं.
IND vs WI सामन्यात वेस्ट इंडिजने २० षटकांत ४ बाद १९५ धावांचा डोंगर उभा केला आहे. सुरुवातीला भारतीय गोलंदाजांनी सामन्यावर उत्तम पकड मिळवली होती. १५ षटकांच्या अखेरीस वेस्ट इंडिजची अवस्था ४ बाद १२५ अशी होती, ज्यामुळे भारत हा सामना सहज नियंत्रणात ठेवेल असेच वाटत होते.
पण त्यानंतर रोव्हमन पॉवेल आणि जेसन होल्डर यांनी मैदानात अक्षरशः वादळ आणलं. या दोघांनी पाचव्या विकेटसाठी ७६ धावांची अभेद्य भागीदारी रचली आणि आपल्या संघाचा डाव सावरला. पॉवेल आणि होल्डरच्या या तुफानी फटकेबाजीने सामन्याचं संपूर्ण चित्रच पालटून टाकलं.