लॉस एंजेलिस ऑलिम्पिक २०२८ साठी आयसीसीची मोठी घोषणा; भारतीय महिला संघाला थेट प्रवेश

प्रतिनिधी, 24 ऑक्टोबर: आंतरराष्ट्रीय क्रिकेट परिषदेने (आयसीसी) २०२८ च्या लॉस एंजेलिस ऑलिम्पिकसाठी (LA28) मोठी घोषणा केली आहे. ऑक्टोबरमध्ये दुबईत झालेल्या बैठकीनंतर आयसीसीने क्रिकेटच्या पात्रता फेरीचे वेळापत्रक जाहीर केले असून, भारतीय महिला क्रिकेट संघाने ऑलिम्पिकमध्ये थेट प्रवेश निश्चित केला आहे.

याचबरोबर २०२७ च्या जागतिक कसोटी अजिंक्यपद (WTC) स्पर्धेचा अंतिम सामना इंग्लंडमध्ये ८ ते १२ जून दरम्यान खेळवला जाणार असल्याचे आयसीसीने स्पष्ट केले आहे. दुबईतील बैठकीनंतर सदस्य देशांना हे सुधारित वेळापत्रक देण्यात आले. २०२७ ते २०३१ च्या एकदिवसीय विश्वचषक स्पर्धांच्या कालावधीत १२ पुरुष, ७ महिला आणि ५ अंडर-१९ स्पर्धांचे (पात्रता फेरीसह) आयोजन केले जाणार असून या सर्वांच्या तारखा आता निश्चित करण्यात आल्या आहेत.

१९०४ नंतर पहिल्यांदाच ऑलिम्पिकमध्ये क्रिकेटचे पुनरागमन होत आहे. आयसीसीने जूनमध्येच सहा संघांच्या ऑलिम्पिक स्पर्धेचा फॉरमॅट जाहीर केला होता. सुरुवातीला २०२७ मध्ये ऑलिम्पिक पात्रता सामने घेण्याचे नियोजन होते, मात्र आता पुरुष आणि महिला क्रिकेटच्या पात्रता फेऱ्या जानेवारी आणि फेब्रुवारी २०२८ मध्ये घेतल्या जातील. त्यामुळे पात्रता फेरी आणि ऑलिम्पिक स्पर्धा यांत केवळ सहा महिन्यांचे अंतर असेल.

पात्रता फेरीच्या स्पर्धेत (पुरुष आणि महिला) प्रत्येकी ८ संघ सहभागी होतील. आंतरराष्ट्रीय क्रमवारीनुसार आयसीसी या संघांची निवड करेल. प्रत्येक पात्रता स्पर्धेत आधीच थेट पात्र न ठरलेले ७ अव्वल संघ आणि कॅरिबियन प्रादेशिक पात्रता फेरीतील एका विजेत्या संघाचा समावेश असेल. या पात्रता सामन्यांची ठिकाणे अद्याप जाहीर करण्यात आलेली नाहीत.

महिलांच्या ऑलिम्पिक क्रिकेट स्पर्धेसाठी भारत, ऑस्ट्रेलिया, दक्षिण आफ्रिका आणि ग्रेट ब्रिटन या संघांनी थेट प्रवेश मिळवला आहे. यावर्षी झालेल्या टी-२० विश्वचषकातील कामगिरीच्या आधारावर आपापल्या खंडातील अव्वल पात्र संघ म्हणून त्यांनी ही जागा निश्चित केली आहे.

पुरुषांच्या पात्रता प्रक्रियेचे नियम वेगळे आहेत. आफ्रिका, आशिया, युरोप आणि ओशनिया खंडांतील अव्वल पात्र संघांना ३१ डिसेंबर २०२६ च्या आयसीसी टी-२० क्रमवारीनुसार चार थेट जागा मिळतील.

यजमान देश म्हणून अमेरिकेलाही थेट प्रवेश मिळू शकतो. जूनमध्ये जाहीर झालेल्या नियमांनुसार, यजमान पदावर थेट प्रवेश मिळवण्यासाठी अमेरिकेच्या पुरुष आणि महिला संघांना ३० जून ते ३१ डिसेंबर २०२६ या कालावधीत टी-२० क्रमवारीत पहिल्या १५ मध्ये स्थान मिळवणे आवश्यक आहे. सध्या अमेरिकेचा पुरुष संघ क्रमवारीत १३ व्या स्थानावर असल्याने त्यांनी ही अट पूर्ण केली आहे. मात्र, त्यांचा महिला संघ १९ व्या स्थानावर असल्याने त्यांच्या प्रवेशावर टांगती तलवार आहे.

अमेरिकेचा महिला संघ ३१ डिसेंबर २०२६ पर्यंत क्रमवारीत स्थान मिळवू शकला नाही आणि थेट पात्र न ठरल्यास, उर्वरित एक जागा कोणाला द्यायची याच्या नियमांतही बदल करण्यात आला आहे. आधी १ मार्च २०२७ च्या क्रमवारीतील अव्वल संघाला ही जागा मिळणार होती. पण आता, फेब्रुवारी २०२७ मध्ये भारतात होणाऱ्या पहिल्यावहिल्या ‘आयसीसी महिला चॅम्पियन्स ट्रॉफी’च्या (ICC Women’s Champions Trophy) निकालावरून ही जागा निश्चित केली जाईल.

📌 महत्वाच्या बातम्या

• हॅमस्ट्रिंगच्या गंभीर दुखापतीमुळे आयुष म्हात्रेवर शस्त्रक्रिया; मुंबईच्या देशांतर्गत हंगामातून बाहेर जाण्याची शक्यता
• मतपेटीचे छिद्र छोटे, ३८ उमेदवारांची मतपत्रिका कशी जाणार? सुधीर मुनगंटीवारांचा निवडणूक प्रक्रियेवर संताप
• मनोज जरांगे ‘डुप्लिकेट मराठा’, त्यांच्या तोंडाला काळं फासणार; एकनाथ शिंदे गटाचा इशारा