प्रतिनिधी, 15 ऑक्टोबर: औषध उत्पादक आणि विक्रेत्यांच्या अनियमिततेवर महाराष्ट्र अन्न व औषध प्रशासनाने (FDA) मोठी कारवाई केली आहे. FDA आयुक्त तुकाराम मुंढे यांनी दिलेल्या माहितीनुसार, जून ते सप्टेंबर २०२६ या चार महिन्यांच्या कालावधीत तब्बल ४,२५६ तपासण्या करण्यात आल्या. या मोहिमेत १९.११ कोटी रुपयांचा औषधसाठा जप्त करण्यात आला असून ३३ गुन्हे (FIR) दाखल करत १४ जणांना अटक केली आहे.
या चार महिन्यांत प्रशासनाने औषध उत्पादन करणाऱ्या ९६५ आणि औषध विक्री करणाऱ्या ३,२९१ आस्थापनांची तपासणी केली. निर्धारित उद्दिष्टाच्या १३१ टक्के तपासण्या पूर्ण केल्याचे प्रशासनाने स्पष्ट केले आहे. या मोहिमेत नियमभंग आणि त्रुटी आढळल्याने एकूण १,४०२ आस्थापनांना नोटिसा बजावण्यात आल्या आहेत.
कठोर कारवाईचा भाग म्हणून औषध उत्पादन आणि विक्रीचे २८८ परवाने रद्द करण्यात आले आहेत, तर ८५६ परवाने निलंबित केले आहेत. अशा प्रकारे परवान्यांसंदर्भात एकूण १,१४४ कारवाया झाल्या आहेत. याव्यतिरिक्त छापे आणि जप्तीच्या ११५ कारवाया करून मोठ्या प्रमाणावर औषधसाठा ताब्यात घेण्यात आला आहे.
विनापरवाना औषधसाठा बाळगल्याप्रकरणी आणि विक्री केल्याप्रकरणी ४३ कारवाया करण्यात आल्या. तसेच आक्षेपार्ह जाहिरातींच्या ३१, बनावट औषधे व सौंदर्यप्रसाधनांच्या १४ आणि मिसब्रँडेड सौंदर्यप्रसाधनांच्या १० प्रकरणांवर कारवाई झाली. एनडीपीएस (NDPS) कायद्यांतर्गत गुंगीकारक औषधांचा गैरवापर केल्याबद्दल ९, वैद्यकीय उपकरणांशी संबंधित ३ आणि फसव्या ब्रँड नावे व लेबलिंगच्या उल्लंघनांवरही प्रशासनाने कारवाई केली आहे.
नागरिकांना सुरक्षित आणि दर्जेदार औषधे मिळावीत यासाठी प्रशासन प्रयत्नशील आहे. औषधांच्या उत्पादन आणि विक्रीतील नियमभंग रोखण्यासाठी आगामी काळात तपासणी आणि कारवाईची ही मोहीम अधिक व्यापक केली जाणार असल्याचे आयुक्त तुकाराम मुंढे यांनी स्पष्ट केले.
📌 महत्वाच्या बातम्या
- IND vs WI 4th T20: टीम इंडियाने रचला इतिहास! टी-20 मध्ये ठोकले सर्वात वेगवान अर्धशतक, संजू सॅमसनचेही मोठे रेकॉर्ड
- मुंबईतील शोकसभेत नाना पाटेकरांच्या आठवणींनी तुकाराम मुंढे भावूक; सांगितला पहिल्या भेटीचा प्रसंग
- उल्हासनगर हादरलं! रेल्वे स्टेशन परिसरात गोळीबार, एकाची थेट डोक्यात गोळ्या झाडून हत्या
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
