प्रतिनिधी, 10 ऑक्टोबर: ज्येष्ठ अभिनेते नाना पाटेकर यांच्या निधनानंतर अभिनेत्री तनुश्री दत्ताने दिलेल्या प्रतिक्रियेवरून तिला सोशल मीडियावर प्रचंड ट्रोल केले जात आहे. या वादात आता प्रसिद्ध गायिका चिन्मयी श्रीपदा हिने तनुश्रीला (Tanushree Dutta) भक्कम पाठिंबा दिला असून, ‘केवळ कोणाचा मृत्यू झाला म्हणून तो माणूस देवदूत बनत नाही’, अशी सडेतोड भूमिका तिने मांडली आहे.
नाना पाटेकर यांचे ८ ऑक्टोबर रोजी निधन झाले. या घटनेनंतर तनुश्रीने ‘ईविल डेड’ अशी प्रतिक्रिया दिली होती. मृत्यूनंतरही अभिनेत्याबद्दल अपशब्द वापरल्याने नेटकऱ्यांनी तनुश्रीला लक्ष्य केले. यावर चिन्मयीने ९ ऑक्टोबर २०२६ रोजी सोशल मीडियावर पोस्ट शेअर करत तनुश्रीची बाजू घेतली. तिने विचारले की, तनुश्रीने अशा परिस्थितीत शांत आणि संयमी राहावे, अशी अपेक्षा का केली जात आहे? तिला एका कार्यक्रमात जायचे होते आणि तिथे छळ करणाऱ्याच्या मृत्यूबाबतच्या प्रश्नांना तिला सामोरे जायचे नव्हते, असे चिन्मयीने म्हटले आहे.
चिन्मयीने आपल्या पोस्टमध्ये आठवण करून दिली की, तनुश्रीने २०१८ मध्ये याविरोधात आवाज उठवला होता. त्यापूर्वी २०१७ मध्ये राया सरकारनेही भाष्य केले होते, पण त्याकडे सर्वांनी दुर्लक्ष केले. २००८ मधील चित्रपटाच्या सेटवरील खराब वातावरण आणि शूटिंगमधून बाहेर पडल्यानंतर तनुश्रीच्या गाडीवर झालेल्या हल्ल्याला तेथे उपस्थित असलेल्या एका पत्रकार आणि सहाय्यक दिग्दर्शकाने दुजोरा दिला होता. असे असतानाही देश छळ करणाऱ्याचे कौतुक करत असून तनुश्रीकडून मात्र सभ्यपणाची अपेक्षा केली जात असल्याची खंत तिने व्यक्त केली. “जर तुम्ही नाना पाटेकरांच्या कामामुळे प्रभावित झाला असाल तर ते योग्य आहे, पण तनुश्रीचा छळ झाला होता हेही तितकेच खरे आहे. मग ते बिरजू महाराज असोत किंवा नाना पाटेकर, मृत्यू कोणालाही देवदूत बनवत नाही,” असे चिन्मयीने स्पष्ट केले.
दुसरीकडे, ‘ईविल डेड’ म्हटल्यावरून होणाऱ्या ट्रोलिंगला तनुश्रीनेही एका व्हिडिओद्वारे उत्तर दिले आहे. “ज्या व्यक्तीने माझे आयुष्य उद्ध्वस्त केले, गुंड पाठवून माझा छळ केला आणि काम खराब केले, त्याला मी ‘ईविल डेड’ म्हटले तर एवढा गोंधळ का उडाला? मला का ट्रोल केले जात आहे हेच समजत नाही”, असा सवाल तिने उपस्थित केला आहे. #MeToo चळवळीदरम्यान तनुश्रीने नाना पाटेकर यांच्यावर लैंगिक छळाचे आरोप केले होते, मात्र त्यावेळी अभिनेत्याने हे सर्व आरोप फेटाळून लावले होते.
📌 महत्वाच्या बातम्या
- पंचनाम्यांचे नाटक थांबवून शेतकऱ्यांच्या खात्यात एक लाख रुपये जमा करा; हर्षवर्धन सपकाळांचा सरकारवर घणाघात
- तुषार गांधींना ताब्यात घेतल्याने तणाव वाढला; आदित्य ठाकरे, संजय राऊत पोलीस ठाण्यात दाखल
- जागतिक मानसिक आरोग्य दिन: सतत थकवा आणि कामात लक्ष लागत नाहीये? ‘वर्कप्लेस बर्नआउट’ची ही ५ लक्षणे वेळीच ओळखा
Ask Maharashtra Desha
आधी महाराष्ट्र देशाच्या उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
