प्रतिनिधी, 13 नोव्हेंबर: भारतीय क्रिकेट नियामक मंडळाने (BCCI) आपला निर्णय बदलत बांगलादेशच्या क्रिकेटपटूंसाठी आयपीएलचे दरवाजे पुन्हा उघडले आहेत. आगामी ‘आयपीएल २०२७’ च्या मिनी लिलावासाठी बांगलादेशी खेळाडूंना नोंदणी करण्याची परवानगी बीसीसीआयने दिली आहे. १६ डिसेंबर रोजी गोव्यात हा लिलाव होणार असून, या प्रक्रियेचा भाग म्हणून बीसीसीआयने बांगलादेश क्रिकेट बोर्डाला (BCB) अधिकृत पत्रव्यवहारही केला आहे.
‘इंडिया टुडे’च्या वृत्तानुसार, लिलावासाठी नोंदणी करणाऱ्या खेळाडूंमध्ये मुस्तफिजुर रहमानचा समावेश आहे. त्याच्यासोबतच नाहिद राणा, रिशाद हुसेन, हसन महमूद, तौहीद हृदोय, तस्किन अहमद आणि शोरीफुल इस्लाम हे खेळाडूही नोंदणी करतील अशी अपेक्षा आहे. बीसीसीआयच्या या निर्णयामुळे भारत आणि बांगलादेशमधील क्रिकेट संबंध पुन्हा सुधारण्याची आशा निर्माण झाली आहे.
या वर्षाच्या सुरुवातीला दोन्ही देशांतील तणावामुळे बीसीसीआय आणि बीसीबीमध्ये वाद निर्माण झाला होता. डिसेंबर २०२५ मध्ये बांगलादेशातील हिंदू समुदायावरील हिंसेच्या वृत्तानंतर, बीसीसीआयच्या सूचनेवरून जानेवारी २०२६ मध्ये कोलकाता नाईट रायडर्सने (KKR) मुस्तफिजुरला संघातून मुक्त केले होते. केकेआरने चेन्नई सुपर किंग्स आणि दिल्ली कॅपिटल्सला मागे टाकत त्याला ९.२० कोटी रुपयांच्या बोलीवर (मूळ किंमत २ कोटी) विकत घेतले होते. यामुळे तो आयपीएलच्या इतिहासातील सर्वात महागडा बांगलादेशी ठरला होता. नंतर केकेआरला त्याच्या जागी दुसरा खेळाडू घेण्याची परवानगी देण्यात आली होती.
मुस्तफिजुरच्या या प्रकरणानंतर मोठा वाद निर्माण झाला होता. सुरक्षेचे कारण देत बीसीबीने २०२६ च्या आयसीसी टी-२० विश्वचषकासाठी आपला संघ भारतात पाठवण्यास नकार दिला होता. बांगलादेशचे सामने भारताऐवजी सह-यजमान श्रीलंकेत खेळवण्याची मागणी बीसीबीने आयसीसीकडे केली होती. मात्र, आयसीसीने ही मागणी फेटाळल्याने बांगलादेशने स्पर्धेतून माघार घेतली व त्यांच्या जागी स्कॉटलंडला विश्वचषकात संधी मिळाली होती.
दरम्यान, हार्दिक पंड्या पंजाब किंग्समध्ये गेल्याने मुंबई इंडियन्स ‘आयपीएल २०२७’ साठी रोहित शर्माकडे पुन्हा कर्णधारपद सोपवण्याच्या तयारीत असल्याची माहिती समोर आली आहे. २०२४ मध्ये रोहितला कर्णधारपदावरून अचानक हटवण्यात आले होते. भविष्यात टिळक वर्माकडे नेतृत्व सोपवण्यापूर्वी, रोहित त्याच्या संभाव्य शेवटच्या आयपीएल हंगामात मुंबईचे नेतृत्व करण्यासाठी परतू शकतो.
रोहितने २०१३ च्या हंगामात मध्यंतरी मुंबई इंडियन्सची धुरा हाती घेतली आणि संघाला पहिले विजेतेपद मिळवून दिले. त्यानंतर त्याच्या नेतृत्वाखाली संघाने २०१३, २०१५, २०१७, २०१९ आणि २०२० मध्ये विजेतेपद पटकावले. शांत स्वभाव आणि उत्तम व्यवस्थापनामुळे तो महेंद्रसिंग धोनीसोबत आयपीएलमधील सर्वात यशस्वी कर्णधार ठरला आहे. रोहितच्या नावावर २८१ सामन्यांमध्ये १३२.९१ च्या स्ट्राईक रेटने ७३२९ धावांची नोंद आहे.
📌 महत्वाच्या बातम्या
- दिवाळीत सुनेत्रा पवारांची शेतकऱ्यांच्या बांधावर हजेरी; पिठलं-भाकरी खात जाणून घेतल्या अडचणी
- माझा भाऊ मंत्री होऊ दे, परळीला सत्ताकेंद्र असण्याची सवय; सुषमा अंधारेंच्या धनंजय मुंडेंना शुभेच्छा
- रब्बी हंगामासाठी खतांवर ६२,३७० कोटींचे अनुदान; मुद्रा योजनेसाठी ५ हजार कोटी मंजूर
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
