प्रतिनिधी, 11 नोव्हेंबर: दाक्षिणात्य चित्रपटसृष्टीतील प्रसिद्ध संगीतकार अनिरुद्ध रविचंदर आणि सनरायझर्स हैदराबादची सहमालक काव्या मारन (Kavya Maran) हे विवाहबंधनात अडकले आहेत. गेल्या अनेक दिवसांपासून त्यांच्या लग्नाची चर्चा सुरू होती. अखेर ११ नोव्हेंबर रोजी ग्रीसमध्ये या दोघांनी लग्नगाठ बांधली असून, स्वतः अनिरुद्धने सोशल मीडियावर या शाही सोहळ्याचे फोटो चाहत्यांसोबत शेअर केले आहेत.
अनिरुद्धने इन्स्टाग्रामवर लग्नाचे काही खास फोटो शेअर करत आनंद व्यक्त केला आहे. या फोटोंसोबत त्याने, ‘माझ्या आयुष्यातील एकमेव आणि आयुष्यभरासाठीचा क्षण… 11.11’ असे कॅप्शन दिले आहे. हे फोटो समोर आल्यानंतर मनोरंजन विश्वातील अनेक कलाकारांसह चाहत्यांकडून या नवदाम्पत्यावर शुभेच्छांचा वर्षाव होत आहे.
ग्रीसमध्ये अत्यंत खासगी आणि आलिशान पद्धतीने हा विवाहसोहळा पार पडला. या लग्नाला दोन्ही कुटुंबांतील सदस्य आणि जवळच्या मित्रांनी हजेरी लावली. तसेच, सुपरस्टार रजनीकांत आणि तामिळनाडूचे माजी मुख्यमंत्री एम. के. स्टॅलिन यांसारख्या दिग्गजांचीही या सोहळ्याला उपस्थिती असल्याची माहिती समोर आली आहे.
ग्रीसमधील विवाहसोहळ्यानंतर आता २१ नोव्हेंबरला चेन्नईमध्ये एका भव्य रिसेप्शनचे आयोजन करण्यात आले आहे. या सोहळ्यासाठी राजकीय, क्रीडा आणि चित्रपटसृष्टीतील अनेक मान्यवरांना निमंत्रित करण्यात आल्याचे सांगितले जात असून सर्वांचे लक्ष या रिसेप्शनकडे लागले आहे.
काव्या मारन या प्रसिद्ध उद्योगपती कलानिधी मारन यांच्या कन्या असून त्या ‘सन टीव्ही नेटवर्क’च्या एक्झिक्युटिव्ह डायरेक्टर आहेत. तसेच आयपीएलमधील ‘सनरायझर्स हैदराबाद’ संघातही त्यांची महत्त्वाची भूमिका आहे. दुसरीकडे, ‘व्हाय दिस कोलावेरी डी’ या गाण्यामुळे प्रसिद्धीझोतात आलेला अनिरुद्ध हा अत्यंत लोकप्रिय संगीतकार आहे. त्याने ‘विक्रम’, ‘जेलर’, ‘लिओ’, ‘मास्टर’, ‘कथ्थी’ आणि ‘कुली’ यांसारख्या चित्रपटांना संगीत दिले आहे. गेल्या काही वर्षांपासून त्यांच्या नात्याची चर्चा होती, मात्र सार्वजनिकरीत्या त्यावर भाष्य न करता त्यांनी थेट लग्नाचे फोटो शेअर करून नव्या प्रवासाची सुरुवात केली आहे.
📌 महत्वाच्या बातम्या
- ओमराजे निंबाळकरांना चिमुकल्याचा थेट फोन; ‘मामाची गाडी घासली, रस्ते कधी नीट करणार?’, ऑडिओ क्लिप व्हायरल
- स्टुअर्ट मॅकगिलचा मोठा गौप्यस्फोट; ऑस्ट्रेलियन क्रिकेटमधील बॉल टॅम्परिंगबाबत केली धक्कादायक कबुली
- HDFC बँकेचा कर्जदारांना धक्का; MCLR दरांमध्ये वाढ, EMI महागणार
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
