प्रतिनिधी, 11 नोव्हेंबर: मुंबई इंडियन्सचे कर्णधारपद पुन्हा एकदा रोहित शर्माकडे (Rohit Sharma) येणार असल्याची चर्चा रंगू लागली आहे. सोशल मीडियावर व्हायरल होत असलेल्या एका व्हिडिओतून ही बाब समोर आली असून, मुंबई इंडियन्सचाच खेळाडू असलेल्या मिचेल सँटनरने रोहितला दिलेल्या एका हाकेमुळे चाहत्यांची उत्सुकता ताणली गेली आहे.
भारतीय संघ सध्या न्यूझीलंडच्या दौऱ्यावर असून तिथे पाच एकदिवसीय सामन्यांची मालिका खेळवली जात आहे. हॅमिल्टन येथील तिसरा एकदिवसीय सामना पावसामुळे रद्द झाल्यानंतर, रोहित शर्माने न्यूझीलंडच्या खेळाडूंची भेट घेतली. या भेटीचा व्हिडिओ सध्या व्हायरल होत आहे. यात रोहितने न्यूझीलंडचा कर्णधार मिचेल सँटनरला “हॅलो मिची” अशी हाक मारली, ज्यावर सँटनरने “हॅलो, कॅप्टन” असे उत्तर दिले. रोहित सध्या भारताचा किंवा मुंबईचा कर्णधार नाही. सँटनर मुंबई इंडियन्सकडून खेळतो आणि तो पांड्याच्या नेतृत्वाखाली संघात दाखल झाला होता. सँटनरच्या या वक्तव्यामुळे आगामी हंगामात रोहित मुंबईचा कर्णधार होऊ शकतो, असा अंदाज सोशल मीडिया वापरकर्ते लावत आहेत.
बुधवारी मुंबई इंडियन्स आणि पंजाब किंग्स या दोन्ही संघांमधील खेळाडूंची ट्रेड अधिकृतपणे पूर्ण झाली. याअंतर्गत हार्दिक पांड्या पंजाब किंग्समध्ये सामील झाला, तर पंजाबकडून खेळणारा अर्शदीप सिंग पाच वेळा चॅम्पियन ठरलेल्या मुंबई इंडियन्सच्या ताफ्यात दाखल झाला. हार्दिक गेल्या तीन हंगामांपासून मुंबईचे कर्णधारपद भूषवत होता. आता त्याच्या जाण्याने संघाला नव्या कर्णधाराची गरज भासणार आहे. या पदासाठी तिलक वर्मा आणि सूर्यकुमार यादव हेदेखील शर्यतीत असू शकतात, मात्र सर्वांचे लक्ष या फ्रँचायझीचा दीर्घकाळचा कर्णधार राहिलेल्या आणि पाच विजेतेपदे मिळवून देणाऱ्या रोहित शर्माकडे लागले आहे.
हार्दिक पांड्या त्याच्या पूर्वीच्या १६.३५ कोटी रुपयांच्या मानधनाऐवजी आता १८ कोटी रुपयांना पंजाब किंग्समध्ये गेला आहे. २०१५ मध्ये तो मुंबईत सामील झाला होता आणि २०१५, २०१७, २०१९ व २०२० च्या विजेतेपदांमध्ये त्याचा मोठा वाटा होता. मुंबईसोबत सात हंगाम खेळल्यानंतर २०२२ च्या हंगामापूर्वी तो गुजरात टायटन्समध्ये गेला आणि पहिल्याच वर्षी त्या संघाला विजेतेपद मिळवून दिले. तसेच २०२३ मध्येही गुजरातने अंतिम फेरी गाठली होती. त्यानंतर २०२४ मध्ये तो मुंबईत परतला व त्याने संघाचे कर्णधारपद स्वीकारले. पांड्याने १६२ आयपीएल सामन्यांमध्ये १४६.२८ च्या स्ट्राईक रेटने २,९५५ धावा केल्या आहेत आणि ८२ बळी घेतले आहेत.
दुसरीकडे, अर्शदीप सिंग मुंबई इंडियन्समध्ये दाखल झाला असून, त्याने आयपीएलच्या इतिहासात पंजाबचा सर्वाधिक बळी घेणारा गोलंदाज म्हणून स्वतःला सिद्ध केले आहे. त्याने पंजाब किंग्ससाठी ९६ सामने खेळताना १११ बळी घेण्याची कामगिरी केली आहे.
📌 महत्वाच्या बातम्या
- रोहित शर्मा की जसप्रीत बुमराह? हार्दिक पांड्याच्या जागी कोण घेणार MI ची कमान, फ्रेंचायझीने दिले मोठे संकेत
- ५६ व्या वर्षी सैफ अली खानचे शर्टलेस सूर्यनमस्कार! पत्नी करीनाने सगळ्यांसमोरच दिले ओपन चॅलेंज
- राष्ट्रवादीच्या विलिनीकरणाच्या चर्चेदरम्यान सुनील तटकरेंनी घेतली मुख्यमंत्री फडणवीसांची भेट
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
