प्रतिनिधी, 11 नोव्हेंबर: राष्ट्रवादी काँग्रेसच्या दोन्ही गटांच्या विलिनीकरणाबाबत येत्या दोन आठवड्यांत चित्र स्पष्ट होईल, असा मोठा दावा अजित पवार गटाच्या नेत्या रुपाली ठोंबरे (Rupali Thombare) यांनी केला आहे. शरद पवार आणि सुनेत्रा पवार विलिनीकरणाबाबत जो निर्णय घेतील, तो आम्हाला मान्य असेल, असे सांगत त्यांनी अजित पवारांच्या मनातील इच्छा पूर्ण होताना दिसेल, असे सूचक विधान माध्यमांशी बोलताना केले.
गेल्या आठवड्याभरापासून राज्यात विलिनीकरणाच्या चर्चांना वेग आला आहे. अजित पवार गटाचे प्रदेशाध्यक्ष सुनील तटकरे यांनी हा विषय काढल्यानंतर आणि नेत्यांनी शरद पवारांच्या भेटी घेतल्यावर या चर्चा रंगल्या आहेत. अजितदादा असतानाही या चर्चा सुरू होत्या आणि आता सात महिन्यांनंतर त्या पुन्हा सुरू झाल्याचे रुपाली ठोंबरे यांनी सांगितले.
यावेळी त्यांनी सुनील तटकरे यांच्यावर थेट निशाणा साधला. पूर्वी विलिनीकरणाच्या चर्चा फेटाळणाऱ्या तटकरे यांनी नऊ महिन्यांनंतर हा विषय पुन्हा का काढला? यामुळे कार्यकर्त्यांची जुनी परिस्थिती आणि दुःख पुन्हा समोर येणार का, असा सवाल त्यांनी उपस्थित केला. पक्षातील काही नेत्यांनी पदासाठी मौन बाळगले असले तरी, या सर्वाला तटकरे जबाबदार असून त्यांनीच उत्तर द्यावे, अशी मागणी त्यांनी केली. तटकरे यांच्याशी आपला कोणताही वैयक्तिक वाद नसल्याचे सांगत, अजित पवारांनी त्यांना प्रदेशाध्यक्ष केल्यापासून आपण त्यांचे कामकाज पाहत असल्याचे त्या म्हणाल्या.
आमदार महेश थोरवे आणि रामदास कदम यांची विधाने धक्कादायक असल्याचे सांगतानाच, दुसऱ्या पक्षात असूनही रामदास कदम यांनी अजित पवारांच्या अपघातावर भाष्य केल्याबद्दल ठोंबरे यांनी त्यांचे आभार मानले. संपूर्ण महाराष्ट्राच्या मनात या अपघाताबाबत प्रश्न असून, त्याची चौकशी होऊन अहवाल समोर आलाच पाहिजे, अशी ठाम भूमिका त्यांनी मांडली.
मंत्री संजय शिरसाट यांनी राष्ट्रवादीत तिसरा गट पडण्याच्या केलेल्या दाव्यावर बोलताना, सध्या याची कल्पना नसली तरी राजकारणात काहीही होऊ शकते, असे त्या म्हणाल्या. तसेच, गोकुळच्या निवडणुकीवर वकील म्हणून भूमिका मांडताना, सध्याचा चेअरमनपदाचा आनंद तात्पुरता असल्याचे त्या म्हणाल्या. प्रशासकांना मतदानाचा अधिकार नसून कायदेशीर विलंबाचा फायदा घेतलेली ही निवड कोर्टात टिकणार नाही, असा दावा त्यांनी केला.
जनतेचा कौल स्वीकारणे गरजेचे असून सध्या राजकारणाचा चिखल झाला आहे, अशी खंत त्यांनी व्यक्त केली. तसेच, सत्तेत राहून धमक्या देणे चुकीचे आहे, असे सांगत त्यांनी चंद्रकांतदादांच्या वक्तव्याबाबतही थेट नाराजी व्यक्त केली.
📌 महत्वाच्या बातम्या
- दोन्ही राष्ट्रवादीच्या विलिनीकरणाच्या चर्चेदरम्यान बीडमध्ये बजरंग सोनवणे आणि विजयसिंह पंडित एकत्र
- रोहित शर्मा की जसप्रीत बुमराह? हार्दिक पांड्याच्या जागी कोण घेणार MI ची कमान, फ्रेंचायझीने दिले मोठे संकेत
- ५६ व्या वर्षी सैफ अली खानचे शर्टलेस सूर्यनमस्कार! पत्नी करीनाने सगळ्यांसमोरच दिले ओपन चॅलेंज
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
