प्रतिनिधी, 11 नोव्हेंबर: ऑस्ट्रेलियन क्रिकेट संघाचे २०२७ चे वेळापत्रक अत्यंत व्यग्र आहे. त्यामुळे आगामी आयपीएल (IPL) २०२७ मध्ये ऑस्ट्रेलियन खेळाडूंच्या उपलब्धतेबाबत शंका व्यक्त केली जात होती. मात्र, ३६ वर्षीय वेगवान गोलंदाज मिचेल स्टार्कने संपूर्ण आयपीएल हंगामासाठी दिल्ली कॅपिटल्सला (DC) उपलब्ध राहण्याची ग्वाही दिली आहे. मात्र, त्याचा हा सहभाग त्याच्या फिटनेसवर अवलंबून असणार आहे.
ऑस्ट्रेलियाच्या राष्ट्रीय संघाचे सामने आणि आयपीएल २०२७ च्या तारखा एकाच वेळी आल्यास, अनेक आयपीएल संघांना त्यांच्या प्रमुख ऑस्ट्रेलियन खेळाडूंना मुकावे लागण्याची दाट शक्यता आहे. मिचेल स्टार्क हा ऑस्ट्रेलिया आणि दिल्ली कॅपिटल्स या दोन्ही संघांसाठी महत्त्वाचा खेळाडू आहे. त्यामुळे तो जर आयपीएलमध्ये न खेळल्यास दिल्ली कॅपिटल्सच्या गोलंदाजीची धार काही अंशी कमी होऊ शकते.
ऑस्ट्रेलियाच्या २०२७ च्या वेळापत्रकानुसार, नवीन वर्षाच्या सुरुवातीला ते न्यूझीलंडविरुद्ध एक कसोटी सामना खेळतील आणि त्यानंतर भारताविरुद्ध पाच सामन्यांची कसोटी मालिका होईल. ११ ते १५ मार्च दरम्यान एक सामना खेळवला जाईल. यानंतर, १८ जून ते २ ऑगस्ट या कालावधीत इंग्लंडविरुद्ध पाच सामन्यांची बहुचर्चित ॲशेस मालिका पार पडेल. त्यानंतर विश्रांती घेऊन ऑक्टोबरच्या पहिल्या आठवड्यात वनडे वर्ल्ड कप सुरू होणार आहे. आयपीएल पूर्ण होण्यासाठी सुमारे तीन महिन्यांचा कालावधी लागतो, त्यामुळे बीसीसीआय ही स्पर्धा नेमकी कधी आयोजित करते, हे पाहणे औत्सुक्याचे ठरणार आहे.
मागील २०२६ च्या आयपीएल हंगामातही ऑस्ट्रेलियन खेळाडूंच्या उपलब्धतेचा प्रश्न निर्माण झाला होता. २०२६ चा टी-२० वर्ल्ड कप आणि आयपीएल यांच्यात फार कमी दिवसांचे अंतर होते. पाठोपाठ होणाऱ्या मोठ्या स्पर्धांमुळे खेळाडूंना दुखापती होण्याचा धोका होता. त्यामुळे आगामी आंतरराष्ट्रीय सामने आणि खेळाडूंचा फिटनेस लक्षात घेऊन क्रिकेट ऑस्ट्रेलियाने काही खेळाडूंना तातडीने ना हरकत प्रमाणपत्र देण्यास नकार दिला होता. परिणामी, पॅट कमिन्स, कॅमेरून ग्रीन आणि स्टार्कसारखे प्रमुख खेळाडू आयपीएलसाठी उशिरा दाखल झाले आणि त्यांनी काही सामनेही गमावले.
दिल्ली कॅपिटल्सकडून खेळताना स्टार्कने मागील २०२६ च्या हंगामातील ६ सामन्यांच्या ६ डावांत ११ बळी घेतले होते. यामध्ये ४० धावांत ४ बळी या त्याच्या सर्वोत्तम गोलंदाजीचा समावेश होता. मात्र, २०२७ च्या हंगामासाठी त्याची उपलब्धतेबाबत दिलेला शब्द हा पूर्णपणे त्याच्या शारीरिक तंदुरुस्तीवरच अवलंबून असेल, असेही स्पष्ट करण्यात आले आहे.
📌 महत्वाच्या बातम्या
- माझ्या बायकोची ९ लग्नं, मी सातवा नवरा! पती-पत्नीचे भांडण उच्च न्यायालयात, कोर्टाचा महत्त्वपूर्ण निकाल
- दिवाळीच्या फराळाने पोट बिघडलंय? गॅस आणि अपचनापासून आराम देणारे सोपे घरगुती उपाय
- आधार कार्डमध्ये घरबसल्या नोंदवा नवीन मोबाईल नंबर, जाणून घ्या १० मिनिटांची सोपी प्रक्रिया
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
