मुंबई: ‘नीट’ (NEET) परीक्षा पेपरफुटीच्या प्रकरणामुळे केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करत देशभरातील विद्यार्थी आंदोलन (Student Protest) करत आहेत. मुंबईतही मोठ्या संख्येने विद्यार्थी रस्त्यावर उतरले आहेत. मात्र, मुंबई पोलिसांनी (Mumbai Police) अशा आंदोलनांवर बंदी घालणारे आदेश लागू केले आहेत. असे असूनही, शहरातील विविध भागांत शेकडो विद्यार्थी दररोज आंदोलन करत आहेत आणि सरकारविरुद्ध आपला रोष व्यक्त करत आहेत. कालही मुंबईत धर्मेंद्र प्रधान यांच्या राजीनाम्याची मागणी करणारे आंदोलन झाले. परवानगीशिवाय आंदोलन केल्यामुळे पोलिसांनी आंदोलक विद्यार्थ्यांना ताब्यात घेतले आणि त्यांना एका वाहनात बसवले. मात्र, एका तरुणीने पोलिसांच्या वाहनासमोर ठामपणे उभे राहून पोलिसांना वाहन थांबवण्यास भाग पाडले. या घटनेने देशभर लक्ष वेधून घेतले असून, आता त्या तरुणीबद्दलची माहिती समोर आली आहे.
पोलिसांचे वाहन अडवणारी मुंबईतील ती तरुणी म्हणजे रिया अहिर (Riya Ahir) होय. रिया अहिर ही व्यवसायाने अभिनेत्री आणि मॉडेल आहे. गेल्या काही दिवसांपासून ती विद्यार्थ्यांच्या आंदोलनांमध्ये सक्रिय सहभाग घेत आहे. काल जेव्हा पोलिसांनी आंदोलक विद्यार्थ्यांना ताब्यात घेतले, तेव्हा तिचा संताप अनावर झाला. रियाने पुढे येऊन पोलिसांचे वाहन अडवताच, इतर नागरिकही मदतीसाठी पुढे आले आणि सर्वजण रस्त्यावर उतरले.
पोलिसांची कारवाई आणि सरकारबद्दल आपला संताप व्यक्त करताना रिया म्हणाली, “मला माहित आहे की पोलीस जे करत आहेत ते त्यांचे कर्तव्य आहे. पण ते त्यांचे कर्तव्य प्रामाणिकपणे पार पाडत नाहीत. जर ते आपल्या नागरिकांची जबाबदारी घेऊ शकत नसतील, तर ती जबाबदारी आम्ही स्वीकारू. म्हणूनच मी पोलिसांचे वाहन अडवले. माझे वडील शेतकरी नाहीत आणि मी स्वतः शेतकरी, दलित किंवा ओबीसी नाही. पण त्या दिवशी त्यांनी आपल्या विद्यार्थ्यांसोबत जे केले ते चुकीचे होते. या कृत्यासाठी त्यांना जबाबदार धरलेच पाहिजे. धर्मेंद्र प्रधान यांनी राजीनामा दिलाच पाहिजे.”
📌 महत्वाच्या बातम्या
- CJP ची देशव्यापी आंदोलनाची हाक; आंदोलन शांततापूर्ण मार्गाने करण्याचे आवाहन
- NEET Protest : मोदी-शहांचा कट्टर समर्थकच सरकारविरोधात; ‘विद्यार्थ्यांशी संवादाला उशीर का?’
- ‘सरकारला प्रश्न विचारा, मला नाही’; प्रियंका गांधी माध्यमांवर संतापल्या
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
