Mount Maunganui, 13 नोव्हेंबर: माउंट माउंगानुई येथील बे ओव्हल मैदानावर पार पडलेल्या चौथ्या एकदिवसीय सामन्यात न्यूझीलंडने भारताचा २४४ धावांनी धुव्वा उडवला. १३ नोव्हेंबर रोजी झालेल्या या सामन्यात ३३४ धावांच्या लक्ष्याचा पाठलाग करताना श्रेयस अय्यरच्या नेतृत्वाखालील भारतीय संघ २६.४ षटकांत अवघ्या ८९ धावांवर गारद झाला. धावांच्या फरकाने एकदिवसीय क्रिकेटच्या इतिहासात भारताचा हा दुसरा सर्वात मोठा पराभव ठरला आहे. या विजयासह यजमान न्यूझीलंडने पाच सामन्यांच्या मालिकेत आपले आव्हान जिवंत ठेवले आहे.
या पराभवामुळे भारत आपल्या आजवरच्या सर्वात मोठ्या पराभवापासून अवघ्या एका धावेने बचावला. भारताला सर्वात मोठा पराभव २९ ऑक्टोबर २००० रोजी शारजाह येथे श्रीलंकेविरुद्ध (२४५ धावा) पत्करावा लागला होता; जिथे २९९ धावांचा बचाव करताना श्रीलंकेने भारताला ५४ धावांवर गुंडाळले होते. एकदिवसीय क्रिकेटमधील भारताच्या पाच सर्वात मोठ्या पराभवांमध्ये न्यूझीलंडनंतर दक्षिण आफ्रिका (२१४ धावा, मुंबई-२५ ऑक्टोबर २०१५), ऑस्ट्रेलिया (२०८ धावा, सिडनी-८ फेब्रुवारी २००४) आणि इंग्लंड (२०२ धावा, लॉर्ड्स-७ जून १९७५) यांचा क्रमांक लागतो.
याव्यतिरिक्त एकदिवसीय क्रिकेटमधील भारताच्या इतर मोठ्या पराभवांमध्ये न्यूझीलंड (२०० धावा, डंबुला-१० ऑगस्ट २०१०), पाकिस्तान (१८० धावा, द ओव्हल-१८ जून २०१७ व १५९ धावा, दिल्ली-१७ एप्रिल २००५), ऑस्ट्रेलिया (१६२ धावा, नॉटिंगहॅम-१३ जून १९८३), श्रीलंका (१६१ धावा, किंग्स्टन-२ जुलै २०१३) आणि दक्षिण आफ्रिका (१५७ धावा, डर्बन-२२ नोव्हेंबर २००६) यांचा समावेश आहे.
प्रथम फलंदाजी करताना न्यूझीलंडने ५० षटकांत सर्वबाद ३३३ धावांची मजल मारली. सलामीवीर टिम सेफर्टने ५८ धावांचे योगदान देत संघाला भक्कम पाया रचून दिला. त्यानंतर विल यंगने १४ चौकार आणि ४ षटकारांच्या मदतीने १०८ चेंडूत आपल्या कारकिर्दीतील सर्वोत्तम १२५ धावांची खेळी केली. वैयक्तिक ५ धावांवर असताना त्याला सलग दोन जीवदान मिळाले होते.
भारताकडून आकिब नबी, अक्षर पटेल आणि गुरनूर ब्रार यांनी प्रत्येकी दोन बळी घेतले. डावाच्या शेवटच्या चेंडूवर न्यूझीलंडचा संपूर्ण संघ तंबूत परतला. मात्र ३३४ धावांच्या डोंगराएवढ्या लक्ष्याचा पाठलाग करताना नोव्हेंबर २०२५ नंतर पहिला एकदिवसीय सामना खेळणाऱ्या मॅट हेन्रीने पहिल्याच षटकात भारताचे कंबरडे मोडले. त्याने या षटकात एकही धाव न देता ३ बळी घेतले.
पहिल्याच चेंडूवर रोहित शर्माला बाद केल्यानंतर पाचव्या चेंडूवर त्याने विराट कोहलीला (४ चेंडूत शून्य धावा) त्रिफळाचीत केले. तसेच कर्णधार म्हणून आपला पहिला एकदिवसीय सामना खेळणारा श्रेयस अय्यरही खातं न उघडताच माघारी परतला. त्यानंतर काइल जेमीसनने ऋतुराज गायकवाडला बाद करत भारताची अवस्था ९ बाद ४ अशी केली. या पडझडीमुळे २०१९ च्या विश्वचषक उपांत्य फेरीतील न्यूझीलंडविरुद्धच्या सामन्याच्या आठवणी ताज्या झाल्या.
पाचव्या क्रमांकावर आलेल्या इशान किशनने ५३ चेंडूत २७ धावा करत डाव सावरण्याचा प्रयत्न केला. अक्षर पटेल आणि नमन धीर यांनी प्रत्येकी २१ धावांचे योगदान दिले. नमन धीरने शेवटी मारलेले षटकार आणि काही अवांतर धावांमुळे भारत आपल्या सर्वात नीचांकी धावसंख्येपासून आणि आणखी मोठ्या पराभवापासून थोडक्यात बचावला. न्यूझीलंडकडून मॅट हेन्रीने सर्वाधिक ६, मॅट फिशरने ३ तर जेमीसनने १ बळी मिळवला.
📌 महत्वाच्या बातम्या
- माझा फोन टॅप होतोय, पंतप्रधान मोदींवर राहुल गांधींचा गंभीर आरोप; पृथ्वीराज चव्हाणांचे मोठे विधान
- सहकारमंत्री बाबासाहेब पाटील यांच्याच अपहरणाचा कट होता, अमित देशमुखांचा खळबळजनक आरोप
- रोहित शर्माच्या नावावर नकोसा विक्रम, २०५ डावांनंतर पहिल्यांदाच ठरला ‘गोल्डन डक’चा शिकार
