विराट कोहली माझा ‘सर्वात महागडा मित्र’; फॅफ डु प्लेसिसचा घड्याळांच्या कलेक्शनवरून खुलासा

प्रतिनिधी, 24 ऑक्टोबर: दक्षिण आफ्रिकेचा माजी कर्णधार फॅफ डु प्लेसिस याने विराट कोहलीच्या (Virat Kohli) लक्झरी घड्याळांच्या आवडीबद्दल एक मनोरंजक खुलासा केला आहे. कोहलीच्या घड्याळांच्या शानदार कलेक्शनमुळे आपल्यालाही घड्याळांवर अधिक पैसे खर्च करावे लागले, असे सांगत डु प्लेसिसने गमतीने विराटला आपला ‘सर्वात महागडा मित्र’ म्हटले आहे.

भारतीय पॉडकास्टर प्रखर गुप्ता याच्या यूट्यूब चॅनलवर बोलताना डु प्लेसिसने कोहलीच्या फॅशन आणि महागड्या घड्याळांच्या वेडाविषयी माहिती दिली. तो म्हणाला, “आम्हा दोघांनाही फॅशनची आवड आहे. त्याला घड्याळांचे प्रचंड वेड आहे. मी त्याला म्हटले आहे की, तू मला आजवर भेटलेला सर्वात महागडा मित्र आहेस. त्याने मला त्याच्या कलेक्शनमधील जी घड्याळे दाखवली, त्यामुळे घड्याळे खरेदी करण्यात माझे पाकीट बरेच हलके झाले. पण मैदानाबाहेरही, मग ती जिम असो वा त्याचा आहार, तो नेहमी १०० टक्के योगदान देतो.”

२०२२ ते २०२४ या काळात आयपीएलमध्ये रॉयल चॅलेंजर्स बंगळुरू (RCB) संघाचा कर्णधार म्हणून डु प्लेसिसने कोहलीसोबत ड्रेसिंग रूम शेअर केली होती. मैदानावरील आक्रमक वृत्तीसाठी ओळखला जाणारा कोहली मैदानाबाहेर खूप खेळकर आणि मजेत राहणारा माणूस असल्याचे डु प्लेसिसने सांगितले. “आरसीबीमध्ये मी त्याच्यासोबत होतो, तो त्याच्या कारकिर्दीचा नंतरचा टप्पा होता. जेव्हा तुम्हाला मुले असतात, विशेषतः मुलगी, तेव्हा तुम्ही आतून खूप मवाळ होता. त्यामुळे आरसीबीमध्ये आमच्या भेटीच्या वेळी त्याच्या स्वभावात एक सौम्यपणा आला होता, तरीही त्याचे मूळ व्यक्तिमत्त्व बदलले नव्हते,” असे डु प्लेसिसने नमूद केले.

कोहलीच्या नेतृत्वाखाली भारतीय संघाने मिळवलेल्या निडर वृत्तीचेही डु प्लेसिसने कौतुक केले. तो म्हणाला की, कोहलीच्या कर्णधारपदामुळे भारतीय संघात एक लढाऊ वृत्ती आणि निडरपणा आला. “कर्णधार म्हणून त्याच्या आक्रमकतेमुळे भारतीय संघाची तीव्रता वाढली. त्यांच्यात एक कणखरपणा आला आणि कोहली ज्या पद्धतीने खेळायचा, त्यामुळे कोणीही त्यांच्यावर दादागिरी करू शकत नव्हते.” दरम्यान, कोहली आता पुढील महिन्यात न्यूझीलंडविरुद्ध होणाऱ्या पाच सामन्यांच्या वनडे मालिकेत खेळताना दिसणार आहे. दुसरीकडे, तिलक वर्माने टी-२० आंतरराष्ट्रीय क्रिकेटमध्ये एका कॅलेंडर वर्षात सर्वाधिक झेल घेण्याचा विश्वविक्रम नुकताच मोडला आहे.

📌 महत्वाच्या बातम्या

• पीएम किसान योजनेचा २४ वा हप्ता ३० ऑक्टोबरला येणार, ई-केवायसी नसल्यास अडकणार पैसे
• मनोज जरांगे पाटलांना ५०० कोटी रुपये पोहोचवले? ऑडिओ क्लिपच्या दाव्यावर श्रीकांत शिंदेंची पहिली प्रतिक्रिया
• लाडकी बहीण योजनेनंतर आता एकल महिलांसाठी नवीन योजना; १२ लाख जणींना मिळणार आर्थिक आधार