प्रतिनिधी, 17 नोव्हेंबर: राष्ट्रवादी काँग्रेसच्या शरद पवार गटाचे नेते एकनाथ खडसे यांनी अजित पवार यांच्या मृत्यूच्या तपासाबाबत चिंता व्यक्त केली आहे. या घटनेला आठ महिने उलटून गेल्यानंतरही तपासाचा कोणताही निष्कर्ष समोर आलेला नाही. त्यामुळे समाजाच्या मनात संभ्रम आणि संशयाचे वातावरण असून, ते दूर करण्यासाठी या प्रकरणाचा तपास सीबीआयकडे (CBI) सोपवण्यात यावा, अशी मागणी खडसे यांनी केली आहे.
अजितदादांचा मृत्यू हा अपघात होता, घातपात की खून, याबाबत आजही लोकांच्या मनात शंका असल्याचे खडसे यांनी नमूद केले. यापूर्वी एसआयटी (SIT) आणि सीबीआय चौकशीची मागणी वारंवार करण्यात आली आहे. सरकार केवळ चौकशी सुरू असल्याचे सांगत आहे, मात्र आठ महिन्यांत काहीच निष्पन्न झालेले नाही. त्यामुळे सरकारने स्वतःहून सीबीआय चौकशीची घोषणा का केली नाही, असा सवालही त्यांनी उपस्थित केला.
दुसरीकडे, आमदार रोहित पवार यांनी या मुद्द्यावरून मुख्यमंत्री देवेंद्र फडणवीस यांच्यावर गंभीर आरोप करत महाराष्ट्रातील राजकीय वातावरण अधिक तापवले आहे. ‘मफलर मॅन’च्या ओळखीबाबत एक दावा करत त्यांनी अजितदादांच्या कथित मारेकऱ्यांना कोणाचे संरक्षण मिळत आहे, असा थेट प्रश्न विचारला. न्याय मिळेपर्यंत आपला लढा सुरूच ठेवणार असल्याचा निर्धार व्यक्त करत, त्यांनी सीबीआय चौकशीसाठी सरकारला स्मरणपत्रही दिले आहे.
अजितदादांच्या आठवणीने भावूक झालेल्या रोहित पवार यांनी व्हीएसआर (VSR) या विमान कंपनीचे मालक व्ही. के. सिंग यांच्या कथित व्यावसायिक संबंधांवरही प्रश्नचिन्ह निर्माण केले. अजित पवार यांच्या मृत्यूनंतर अवघ्या दोनच दिवसांत सिंग यांनी फ्लोरिडामध्ये एक आलिशान बंगला खरेदी केल्याचा खळबळजनक दावा रोहित पवार यांनी केला आहे.
📌 महत्वाच्या बातम्या
- ‘भविष्यात आमदारही होणार नाही…’, भाजप आमदार राजेंद्र राऊतांचा रोहित पवारांना थेट इशारा
- नवी मुंबईत बनावट FDA अधिकाऱ्यांचा पर्दाफाश; पानटपरी चालकांना लुटणाऱ्या ६ जणांना अटक
- राज्य कामगार विमा योजनेच्या अधिकाऱ्याला ५० हजारांची लाच घेताना अटक








