गुरुग्राम, 11 ऑक्टोबर: यूट्यूबर ध्रुव राठी याने गुरुग्राम पोलिसांवर अत्यंत गंभीर आरोप केले आहेत. आपल्याला अटक किंवा ताब्यात घेण्यात आले नसून, आपले थेट ‘अपहरण’ करण्यात आल्याचा खळबळजनक दावा त्याने केला आहे. शनिवारी रात्री उशिरा सुटका झाल्यानंतर रविवारी त्याने एका व्हिडिओद्वारे ही संपूर्ण घटना आणि आपली भूमिका स्पष्ट केली.
‘सीजेपी’ या संघटनेने मुख्य निवडणूक आयुक्त ज्ञानेश कुमार यांच्या विरोधात जंतरमंतरवर आंदोलनाची हाक दिली होती, मात्र प्रशासनाने त्याला परवानगी दिली नाही. या आंदोलनात सहभागी होण्यापूर्वीच राठीला (Dhruv Rathee) ताब्यात घेण्यात आले. अधिकाऱ्यांनी दिलेल्या माहितीनुसार, शनिवारी सकाळी साडेनवच्या सुमारास सेक्टर ५६ मधील केंद्रीय विहार सोसायटीतील घरातून त्याला ताब्यात घेण्यात आले व रविवारी पहाटे तीन वाजता त्याची सुटका करण्यात आली.
दुसरीकडे, राठीने या कारवाईचे वर्णन अपहरण असे केले आहे. त्याच्या दाव्यानुसार, १० ऑक्टोबर रोजी सकाळी सात वाजता तो झोपलेला असताना साध्या वेशातील सुमारे २० जण अचानक त्याच्या घरात घुसले. या लोकांनी खोलीतून फरफटत आणि जिन्यावरून ओढत नेल्याने शरीरावर अनेक जखमा झाल्याचे राठीने सांगितले. “मी आंदोलनाला गेलो असतो, तर मला ताब्यात घेतले असते, पण ही अटक नव्हती; मला उचलून नेण्यासाठी गुंडांना पाठवण्यात आले होते,” असा गंभीर आरोप त्याने केला आहे.
घरातील पालकांना मारहाण करण्यात आल्याचा आणि स्वतःला वकिलाला भेटू न दिल्याचा दावाही राठीने केला. आपण परदेशी नागरिक असल्याच्या चर्चांवर टीका करताना त्याने व्हिडिओमध्ये आपला भारतीय पासपोर्ट दाखवला. “मी भारतीय नागरिक असून इतर सामान्य नागरिकांप्रमाणेच मलाही अधिकार आहेत,” असे तो म्हणाला. तसेच, पोलिसांना कोणतेही हमीपत्र लिहून दिल्याचे वृत्त त्याने ‘एक्स’वरील पोस्टमधून फेटाळून लावले.
या संपूर्ण प्रकाराला ‘अघोषित आणीबाणी’ म्हणत राठीने थेट पंतप्रधान नरेंद्र मोदींवर देशाला हुकूमशाहीकडे नेत असल्याचा आरोप केला. “माझ्यासोबत असे होऊ शकते, तर तुमच्यासोबतही घडू शकते,” असा इशारा देत त्याने पाठिंब्याबद्दल सोनम वांगचुक यांचे आभार मानले. आपला आवाज दाबण्याचे कितीही प्रयत्न झाले, तरी देशासाठी आपण अशाच प्रकारे व्यक्त होत राहणार असल्याचे त्याने स्पष्ट केले.
📌 महत्वाच्या बातम्या
- कोणालाही न सांगता गुपचूप परदेशवारी करायचे नाना पाटेकर; सोनाली कुलकर्णीने उलगडले अज्ञात पैलू
- १३ कोटी मतदान चोरले, पण अभिजीतला अंत्यविधीला सोडले नाही: दीपके यांच्या आईचा संताप
- नाना पाटेकरांच्या निधनानंतर तनुश्री दत्ताचे आरोप; प्रसिद्धीसाठी स्टंटबाजी करत असल्याचा सुनील पाल यांचा संताप
Ask Maharashtra Desha
आधी महाराष्ट्र देशाच्या उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
