दिल्ली, 11 ऑक्टोबर: मुख्य निवडणूक आयुक्त ज्ञानेश कुमार यांना हटवण्याची आणि ‘SIR’ प्रक्रिया रद्द करण्याची काँग्रेस व ‘कॉकरोच जनता पार्टी’ची (CJP) मागणी एकच आहे. मात्र, सीजेपीने आज दिल्लीतील जंतर-मंतरवर आंदोलनाची हाक दिली असतानाही काँग्रेसने यापासून अंतर राखले आहे. सीजेपीचे नेते अभिजीत दीपके दिल्लीत असताना राहुल गांधी आंदोलनात सहभागी न होता ‘छात्रों की गूंज’ कार्यक्रमासाठी चेन्नईला रवाना झाले आहेत.
सीजेपीच्या या आंदोलनाला आम आदमी पार्टी, डावे पक्ष आणि तृणमूल काँग्रेसच्या (ममता गट) नेत्यांनी जाहीर पाठिंबा दिला आहे. आपचे राष्ट्रीय संयोजक अरविंद केजरीवाल कुटुंबासह या आंदोलनात उतरणार आहेत, तसेच डावे पक्षही सहभागी होणार आहेत. दुसरीकडे, शुक्रवारी रात्रीपर्यंत तृणमूलच्या सहभागाबाबत स्पष्टता नव्हती. दिल्लीत येण्यापूर्वी ममता बॅनर्जी यांनी आपण १० ऑक्टोबरला जंतर-मंतरवरील आंदोलनात सहभागी होऊ शकतो, मात्र अद्याप अंतिम निर्णय झाला नसल्याचे पत्रकारांना सांगितले.
यापूर्वी ‘NEET-UG’ पेपरफुटी प्रकरणात सीजेपीच्या नेतृत्वाखाली झालेल्या आंदोलनालाही आप आणि तृणमूलने साथ दिली होती. या आंदोलनामुळे धर्मेंद्र प्रधान यांना केंद्रीय शिक्षण मंत्री पदाचा राजीनामा द्यावा लागला होता. असे असतानाही काँग्रेस सीजेपीच्या सध्याच्या आंदोलनापासून दूर आहे.
काँग्रेसच्या या भूमिकेमागे प्रामुख्याने तीन कारणे आहेत. पहिले कारण म्हणजे, या आंदोलनात सहभागी झाल्यास त्याचे बहुतांश श्रेय सीजेपीला मिळेल, काँग्रेसला नाही. दुसरे कारण म्हणजे, ‘आप’च्या उदयामुळे दिल्लीत काँग्रेसच्या अस्तित्वाला कसा फटका बसला, याची पक्षाला जाणीव आहे. त्यामुळे सीजेपीचा ‘आप’सारखा उदय काँग्रेसला परवडणारा नाही.
तिसरे आणि अत्यंत महत्त्वाचे कारण म्हणजे, सीजेपीच्या आंदोलनात सहभागी झाल्यास अभिजीत दीपके यांचे महत्त्व अधिक वाढत जाईल. राहुल गांधी हे काँग्रेसचे भावी पंतप्रधानपदाचे उमेदवार आहेत. अशा स्थितीत दीपके यांच्या वाढत्या प्रभावामुळे राहुल गांधींच्या ‘इमेज बिल्डिंग’ला फटका बसू शकतो, या भीतीने काँग्रेसने आंदोलनाकडे पाठ फिरवली आहे.
📌 महत्वाच्या बातम्या
- पोलिसांच्या ताब्यात असलेल्या अभिजीत दिपकेंचा मानसिक छळ? सीजेपीच्या आरोपाने खळबळ
- राज ठाकरेंचा मोदी-शाहांवर घणाघात, म्हणाले- ‘या देशाने सगळ्यांचा माज उतरवलाय!’
- पांढऱ्या शर्टच्या कॉलरवरील पिवळे डाग कसे काढायचे? जाणून घ्या सोप्या ट्रिक्स
Ask Maharashtra Desha
आधी महाराष्ट्र देशाच्या उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
