पुणे, 21 नोव्हेंबर: माण-हिंजवडी ते शिवाजीनगर या मेट्रो मार्गावरील बाणेर गाव (पीएमआर-१५) आणि बाणेर-पाषाण लिंक रोड (पीएमआर-१६) या दोन स्थानकांचे बांधकाम पूर्ण झाले आहे. त्यामुळे ही दोन्ही स्थानके येत्या डिसेंबर महिन्यात प्रवाशांच्या सेवेत दाखल होण्याची दाट शक्यता निर्माण झाली आहे. मेट्रोच्या या विस्तारामुळे हिंजवडी आयटी पार्कमध्ये जाणाऱ्या कर्मचाऱ्यांचा प्रवास आणखी सुखकर होणार आहे.
स्थानकांचे बांधकाम पूर्ण झाले असले तरी, येथून प्रत्यक्ष प्रवासी वाहतूक सुरू करणे हे मेट्रो रेल्वे सुरक्षा आयुक्तांच्या (सीएमआरएस) पाहणीवर आणि त्यानंतरच्या तांत्रिक पूर्ततेवर अवलंबून आहे. सध्या या स्थानकांचे तपासणीपूर्व मूल्यमापन सुरू आहे. पायाभूत सुविधा सज्ज असल्या, तरी प्रवाशांच्या सुरक्षिततेसाठी प्रमाणपत्र मिळवणे अनिवार्य असते.
‘सीएमआरएस’चे पथक याच आठवड्यात या नव्या मार्गाची पाहणी करणार आहे. पाहणी झाल्यानंतर लगेचच मेट्रो सेवा सुरू होणार नाही. या पथकाने काही त्रुटी काढल्यास त्या दूर करण्यासाठी आणखी १० ते १२ दिवसांचा कालावधी लागू शकतो, अशी माहिती ‘पीएमआरडीए’च्या अधिकाऱ्यांनी दिली आहे. या सर्व प्रक्रिया वेळेत पूर्ण झाल्यास डिसेंबरमध्येच ही स्थानके खुली होतील.
सध्या पिंक लाइनवर १७ स्थानके सुरू असून, बाणेरमधील ही दोन नवी स्थानके सेवेत आल्यानंतर कार्यरत स्थानकांची एकूण संख्या १९ वर पोहोचेल. याव्यतिरिक्त, उर्वरित चार स्थानके (पीएमआर-१३, पीएमआर-१४, पीएमआर-२० आणि पीएमआर-२२) जानेवारी २०२७ पर्यंत प्रवाशांसाठी खुली करण्याचे उद्दिष्ट ठेवण्यात आले आहे.
प्रवाशांच्या सोयीसाठी मेट्रो स्थानकांच्या परिसरात पार्किंगची सुविधाही उपलब्ध करून दिली जात आहे. यासाठी तब्बल २० जागा निश्चित करण्यात आल्या असून, त्यापैकी पाच ठिकाणी वाहनतळाचे काम पूर्ण झाले आहे. उर्वरित जागांवर पार्किंग विकसित करण्याची प्रक्रिया सध्या सुरू असल्याने भविष्यात प्रवाशांना मोठा दिलासा मिळणार आहे.
📌 महत्वाच्या बातम्या
- ड्रेसिंग रूमच्या बातम्या फोडल्याच्या आरोपांवर सरफराज खानचे मौन भंग; म्हणाला, ‘गौतम गंभीरने मला…’
- न्यूझीलंडमध्ये शुभमन गिलची ऐतिहासिक कामगिरी, कसोटीत अर्धशतक ठोकत एमएस धोनीच्या विक्रमाशी बरोबरी
- पुण्यात UPSC विद्यार्थ्याची ‘श्रीराम्स IAS’ला धमकी; तक्रार मागे घेण्यासाठी १० लाखांची खंडणी, गुन्हा दाखल








