प्रतिनिधी, 18 नोव्हेंबर: न्यूझीलंड दौऱ्यात भारतीय संघाने पाच सामन्यांची एकदिवसीय मालिका ३-१ अशा फरकाने जिंकली. मात्र, या दौऱ्यातील फलंदाजांच्या सुमार कामगिरीने चिंता वाढवली आहे. आता भारताचे माजी मुख्य प्रशिक्षक रवी शास्त्री यांनीही विद्यमान प्रशिक्षक गौतम गंभीर यांच्या मताशी सहमती दर्शवली असून आगामी २०२७ च्या वनडे वर्ल्ड कपच्या दृष्टीने भारतीय फलंदाजांना सतर्क केले आहे.
माऊंट माउंगानुई येथील बे ओव्हल मैदानावर झालेल्या चौथ्या एकदिवसीय सामन्यात भारतीय संघ अवघ्या ८९ धावांत गारद झाला होता. स्विंग आणि मुव्हमेंटसमोर फलंदाजांनी अक्षरशः लोटांगण घातले. याच मैदानावर झालेल्या पाचव्या आणि अंतिम सामन्यातही तळाच्या फलंदाजांच्या मदतीने भारताला केवळ २०९ धावांपर्यंत मजल मारता आली. मात्र, गोलंदाजांच्या उत्कृष्ट कामगिरीमुळे भारताने हा सामना २२ धावांनी जिंकत मालिका खिशात घातली.
चौथ्या सामन्यातील पराभवानंतर मुख्य प्रशिक्षक गौतम गंभीर यांनी फलंदाजीबाबत उघडपणे चिंता व्यक्त केली होती. संघ अवघ्या २६-२७ षटकांत सर्वबाद झाल्याबद्दल आणि एकापाठोपाठ एक विकेट्स गमावल्याबद्दल त्यांनी नाराजी व्यक्त केली होती. शेवटच्या सामन्यात अवघ्या १११ धावांत ७ विकेट्स गमावल्याचेही त्यांनी म्हटले होते. सहजासहजी विकेट्स गमावण्याऐवजी चांगल्या गोलंदाजीचा सामना करण्याचे मार्ग शोधायला हवेत आणि कठीण परिस्थितीसाठी फलंदाजांनी मानसिक तसेच तांत्रिकदृष्ट्या तयार राहायला हवे, यावर गंभीर यांनी भर दिला होता.
२०२७ साली दक्षिण आफ्रिकेत होणाऱ्या आयसीसी वनडे वर्ल्ड कपमध्ये न्यूझीलंडसारखीच परिस्थिती असू शकते, असे गंभीर यांचे म्हणणे होते. त्यांच्या या भूमिकेला रवी शास्त्री यांनीही पाठिंबा दिला आहे. कठीण परिस्थितीत भारतीय फलंदाजांनी आपला दृष्टिकोन सुधारण्याची गरज असून त्यांना अधिक संयम दाखवत कधी धोका पत्करायचा हे समजून घेणे आवश्यक असल्याचे शास्त्री यांना वाटते.
अंतिम सामन्यानंतर बोलताना शास्त्री म्हणाले, “मागील पत्रकार परिषदेत गंभीर यांनी मांडलेले मत योग्य होते, जेव्हा ते म्हणाले होते की ‘दक्षिण आफ्रिकेशी मिळतीजुळती परिस्थिती इथे असल्याने मी सर्वात जास्त निराश आहे.’ भविष्यात तुम्ही अधिक चांगल्या कामगिरीची अपेक्षा करता, जिथे फलंदाजांचा दृष्टिकोन अधिक चांगला असायला हवा. काही वेळा परिस्थिती कठीण असेल; त्यावेळी तुम्हाला खेळपट्टीवर वेळ काढावा लागेल. तुम्ही कायम ३००-३२० धावांचे लक्ष्य ठेवू शकत नाही. काही खेळपट्ट्यांवर २६०-२७० धावा देखील सामना जिंकून देणाऱ्या ठरू शकतात.”
📌 महत्वाच्या बातम्या
- अजित पवारांच्या विमान दुर्घटनेला रोहित पवारांच्या कारखान्याचा धूर जबाबदार? भाजपचा गंभीर आरोप
- Winter Health Care: हिवाळ्यात निरोगी राहण्यासाठी बाजरी, गूळ, तुपासह आहारात करा ‘हे’ बदल
- अर्णब, मुरासूनंतर आता ‘अकवान’ चक्रीवादळाचे संकट; विदर्भासह ‘या’ राज्यांना मुसळधार पावसाचा इशारा








