‘सँडपेपर-गेट’ प्रकरणाची पुन्हा चौकशी होणार नाही; उस्मान ख्वाजाच्या दाव्यांनंतर क्रिकेट ऑस्ट्रेलियाने मौन सोडले

प्रतिनिधी, 11 नोव्हेंबर: उस्मान ख्वाजाच्या ‘सब्र’ या आत्मचरित्रातील नव्या दाव्यांनंतर २०१८ च्या ‘सँडपेपर-गेट’ प्रकरणाची पुन्हा चौकशी करण्याची मागणी होत होती. मात्र, क्रिकेट ऑस्ट्रेलियाचे (CA) मुख्य कार्यकारी अधिकारी टॉड ग्रीनबर्ग यांनी या प्रकरणाची पुन्हा चौकशी करण्यास स्पष्ट नकार दिला आहे. मूळ चौकशीच्या निष्कर्षांवर मंडळ समाधानी असून या प्रकरणाच्या पुनर्लपासणीसाठी कोणतेही ठोस कारण दिसत नसल्याचे त्यांनी स्पष्ट केले.

दक्षिण आफ्रिका दौऱ्यातील चेंडू कुरतडण्याच्या (बॉल टॅम्परिंग) योजनेबद्दल संपूर्ण ऑस्ट्रेलियन संघाला माहिती होती, असा दावा ख्वाजाने केला आहे. डेव्हिड वॉर्नरनेही आपल्या माजी सहकाऱ्याच्या या दाव्याला दुजोरा देत जुन्या चौकशीवर प्रश्नचिन्ह उपस्थित केले आहे. मात्र, इतर अनेक खेळाडूंनी ख्वाजाचे हे दावे सातत्याने फेटाळून लावले आहेत.

‘एसईएन’ (SEN) रेडिओशी बोलताना ग्रीनबर्ग यांनी सांगितले की, केप टाऊन कसोटीनंतर झालेल्या चौकशीचा फेरविचार करण्याची क्रिकेट ऑस्ट्रेलियाची कोणतीही योजना नाही. ते म्हणाले, “आम्हाला मिळालेल्या माहितीच्या आधारे तपासाच्या निष्कर्षांवर आम्ही समाधानी आहोत. यात ख्वाजाकडून मिळालेल्या माहितीचाही समावेश आहे. या प्रकरणाची पुन्हा चौकशी करण्याचे कोणतेही ठोस कारण आम्हाला दिसत नाही, आणि यातून काहीही साध्य होणार नाही.”

ख्वाजाने पुस्तक प्रकाशनाच्या काही महिने आधीच आपल्याला याची कल्पना दिल्याचेही ग्रीनबर्ग यांनी उघड केले. ते म्हणाले, “मी अद्याप त्याचे पुस्तक वाचलेले नाही, पण वीकेंडला माध्यमांमधील त्याच्या प्रतिक्रिया मी वाचल्या. ख्वाजाने त्याची बाजू मांडली, याचा मला नक्कीच आदर आहे. मात्र, त्याच्या पुस्तकातील काही तपशील आणि इतर खेळाडूंनी दिलेल्या माहितीमध्ये तफावत आहे. त्यामुळे मी केवळ मथळे किंवा त्यावरील चर्चांवर प्रतिक्रिया न देण्याची काळजी घेईन.”

‘सब्र’ या पुस्तकात ख्वाजाने असा आरोप केला आहे की, चेंडू कुरतडण्याच्या योजनेची माहिती केवळ स्टीव्ह स्मिथ, डेव्हिड वॉर्नर आणि कॅमेरॉन बॅनक्रॉफ्ट यांनाच नव्हती. पोर्ट एलिझाबेथ येथील दुसऱ्या कसोटीतही संघाने सँडपेपरचा वापर केल्याचा दावा त्याने केला आहे. केपटाऊन कसोटीत बॅनक्रॉफ्टच्या शेजारी बसूनही चौकशीदरम्यान क्रिकेट ऑस्ट्रेलियाने आपली कधीही विचारपूस केली नाही, असेही ख्वाजाने म्हटले आहे. दुसरीकडे, पॅट कमिन्स, मिचेल स्टार्क, जोश हेझलवूड आणि नॅथन लियॉन यांनी २०२१ मधील एका संयुक्त निवेदनाद्वारे या योजनेबाबत आपल्याला कोणतीही माहिती नसल्याचे म्हटले होते.

ग्रीनबर्ग यांनी सांगितले की, त्यांनी या वीकेंडला काही खेळाडूंशी चर्चा केली. २०१८ पासून अनेक खेळाडूंनी या घटनेबाबत अत्यंत वेगळी बाजू मांडली असून त्यांची ही भूमिका आजही ठाम आहे. “आठ वर्षांपूर्वी लोकांची या घटनांबाबतची बाजू एकमेकांहून वेगळी होती. मला स्वतःला ऑस्ट्रेलियन क्रिकेटमधील हा अध्याय बंद करायचा आहे, पण तसे होणे कठीण वाटते. खेळाडूंना त्यावेळीही आणि या गेल्या आठ वर्षांतही पुढे येऊन माहिती देण्याची संधी होती,” असे ग्रीनबर्ग यांनी नमूद केले.

येत्या काही दिवसांत किंवा आठवड्यांत ऑस्ट्रेलियाचा कर्णधार पॅट कमिन्स या वादावर भाष्य करेल, अशी माहिती ग्रीनबर्ग यांनी दिली. तसेच, पर्थ येथे इंग्लंडविरुद्धच्या पहिल्या एकदिवसीय सामन्यापूर्वी होणाऱ्या पत्रकार परिषदेत मिचेल मार्श या विषयावर बोलण्याची शक्यता आहे. २०१८ मधील सुरुवातीच्या चौकशीत, २०२१ च्या सार्वजनिक निवेदनात आणि आता वीकेंडला झालेल्या चर्चेतही गोलंदाजांची भूमिका तशीच राहिल्याचे ग्रीनबर्ग यांनी स्पष्ट केले.

या प्रकरणात तत्कालीन कर्णधार स्टीव्ह स्मिथ आणि उपकर्णधार डेव्हिड वॉर्नर यांच्यावर १२ महिन्यांची, तर कॅमेरॉन बॅनक्रॉफ्टवर ९ महिन्यांची बंदी घालण्यात आली होती. वॉर्नरवरील नेतृत्वाची बंदी क्रिकेट ऑस्ट्रेलियाने अलीकडेच, ऑक्टोबर २०२४ मध्ये उठवली आहे.

📌 महत्वाच्या बातम्या

• ऐन दिवाळीत राजकीय घडामोडी; मंत्री प्रताप सरनाईक यांची संजय राऊतांची अचानक भेट
• “विराटशी बोलताना आरशात पाहिल्यासारखं वाटलं” : निवृत्तीबाबत केन विल्यमसनचा मोठा खुलासा
• “१०० टक्के खरं”: सँडपेपरगेट प्रकरणी डेव्हिड वॉर्नरचा उस्मान ख्वाजाच्या दाव्यांना पाठिंबा