प्रतिनिधी, 11 ऑक्टोबर: जागतिक हवामान संघटनेने (WMO) पावसाबाबत आणि एल निनोच्या प्रभावाबाबत अत्यंत महत्त्वाचा अंदाज वर्तवला आहे. ऑक्टोबर ते डिसेंबर या काळात एल निनोचे संकट अधिक गडद होणार असून, त्याचा थेट फटका पर्जन्यमानाला बसणार आहे. तसेच, फेब्रुवारी २०२७ पर्यंत या एल निनोचा प्रभाव कायम राहण्याची शक्यता हवामान विभागाने वर्तवली आहे.
डब्ल्यूएमओच्या अंदाजानुसार, आगामी काही महिन्यांत भारतात पावसाचे प्रमाण अत्यंत कमी आणि असमान असेल. काही भागात पाऊस पडेल तर काही ठिकाणी कोरडेठाक परिस्थिती राहील. यामुळे आधीच संकटात असलेल्या शेतकऱ्यांसमोरील अडचणी आणखी वाढणार आहेत. पावसाअभावी रब्बी हंगामातील पिकांना मोठा फटका बसण्याची शक्यता असून पेरण्यांवरही प्रश्नचिन्ह निर्माण झाले आहे.
यंदा देशभरात पावसाने मोठी दडी मारली असून अनेक राज्यांत पावसाची मोठी तूट आहे. महाराष्ट्रात तर जून आणि जुलैनंतर पावसाने पूर्णपणे पाठ फिरवली. यामुळे खरीप हंगाम वाया गेला असून पिण्याच्या पाण्याचाही अत्यंत गंभीर प्रश्न निर्माण झाला आहे. परिस्थितीचे गांभीर्य ओळखून राज्य सरकारने दुष्काळ जाहीर केला आहे. परतीच्या पावसावर आणि रब्बी हंगामावर शेतकऱ्यांची थोडीफार आशा होती, मात्र आता जागतिक हवामान विभागाच्या नव्या इशाऱ्याने ही आशाही मावळण्याची शक्यता आहे.
समुद्राच्या तापमानात सरासरीपेक्षा १.६ अंश सेल्सिअसने वाढ झाल्याने हे एल निनोचे संकट जागतिक पातळीवर ओढवले आहे. जागतिक हवामान संघटनेच्या महासचिव सेलेस्ट साउलो यांनी दिलेल्या माहितीनुसार, १९५० नंतर निर्माण झालेली एल निनोची ही आतापर्यंतची सर्वात मजबूत स्थिती आहे.
पुढील वर्षीदेखील म्हणजेच फेब्रुवारी २०२७ पर्यंत या एल निनोचा प्रभाव कायम राहणार असल्याचे स्पष्ट करण्यात आले आहे. त्यानंतर मात्र पावसाचे प्रमाण पूर्वपदावर येऊन ते सामान्य स्वरूपात राहील, असा अंदाज आहे. एल निनोचे हे संकट फेब्रुवारीपर्यंत कायम राहणार असल्याने, त्यानंतरच भारतातील पावसाच्या नेमक्या स्थितीचा आणि प्रमाणाचा सुधारित अंदाज वर्तवणे शक्य होणार आहे.
📌 महत्वाच्या बातम्या
- पोलिसांच्या ताब्यात असलेल्या अभिजीत दिपकेंचा मानसिक छळ? सीजेपीच्या आरोपाने खळबळ
- राज ठाकरेंचा मोदी-शाहांवर घणाघात, म्हणाले- ‘या देशाने सगळ्यांचा माज उतरवलाय!’
- पांढऱ्या शर्टच्या कॉलरवरील पिवळे डाग कसे काढायचे? जाणून घ्या सोप्या ट्रिक्स
Ask Maharashtra Desha
आधी महाराष्ट्र देशाच्या उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
