मुंबई: ‘ओल्ड मॉन्क’च्या चाहत्यांसाठी एक मोठी आणि तितकीच निराश करणारी बातमी आहे. महाराष्ट्रात ओल्ड मॉन्कच्या विक्रीवर असलेली बंदी तूर्तास तरी कायम राहणार असल्याचं स्पष्ट झालं आहे. कारण, अन्न व औषध प्रशासनाच्या (FSSAI) बंदीविरोधात न्यायालयात गेलेल्या कंपनीला मुंबई उच्च न्यायालयाने कोणताही तातडीचा दिलासा देण्यास स्पष्ट नकार दिला आहे.
ओल्ड मॉन्कची निर्मिती करणाऱ्या ‘मोहन रॉकी स्प्रिंगवॉटर ब्रुअरीज’ या कंपनीने FSSAI च्या आदेशाला न्यायालयात आव्हान दिलं होतं. सुनावणीच्या वेळी कंपनीची बाजू मांडणारे ज्येष्ठ वकील नवरोज सीरवाई यांनी तडजोडीची तयारी दाखवत उत्पादनाचे तीन नवे लेबल्स कोर्टात सादर केले. पण या नव्या लेबल्सवर अभ्यास करून आपली भूमिका मांडण्यासाठी केंद्र सरकार आणि FSSAI च्या वकिलांनी वेळ मागून घेतला. त्यामुळे कोर्टाने कंपनीला विक्री सुरू करण्यासाठी कोणताही अंतरिम दिलासा दिला नाही.
Old Monk Ban: ‘ओल्ड मॉन्क’वर बंदी नेमकी का आली?
हा सगळा वाद रायगडमधल्या खोपोलीतल्या कंपनीच्या प्लांटमधून सुरू झाला. FSSAI च्या अधिकाऱ्यांनी तिथे तपासणी केली तेव्हा एक गंभीर बाब उघडकीस आली. या रममध्ये बाहेरून ‘रमचा स्वाद’ (Flavour) मिसळला जात होता. नियम असा आहे की, असं काही मिसळल्यास बाटलीच्या लेबलवर ‘फ्लेवर्ड रम’ असा स्पष्ट उल्लेख असायला हवा. पण तसं कोणतंही लेबल कंपनीने लावलेलं नव्हतं. ही थेट नियमांची पायमल्ली असल्याचा ठपका ठेवत FSSAI ने महाराष्ट्रात याच्या विक्रीवर कडक बंदी घातली.
कंपनीने कोर्टाकडे मागणी केली होती की जोपर्यंत या खटल्याचा अंतिम निकाल येत नाही, तोपर्यंत आम्हाला रम विकण्याची परवानगी द्यावी. पण उच्च न्यायालयाने ही मागणी फेटाळून लावली. सध्या दोन्ही बाजूने सविस्तर युक्तिवाद सुरू आहेत, अशा वेळी मध्येच विक्रीला परवानगी देणं म्हणजे अंतिम निकाल दिल्यासारखं होईल, असं निरीक्षण कोर्टाने नोंदवलं.
जोपर्यंत अंतिम निकाल लागत नाही तोपर्यंत ओल्ड मॉन्कला वेटिंगवरच राहावं लागणार आहे. आता या प्रकरणाची पुढची आणि महत्त्वाची सुनावणी ८ सप्टेंबर २०२६ रोजी होणार आहे. त्यामुळे या सुनावणीत नेमकं काय होतं, याकडे सगळ्यांचं लक्ष लागून आहे.
📌 महत्वाच्या बातम्या
- ‘डीजे-डॉल्बीवर बंदी आणताच येणार नाही’, साताऱ्याच्या एसपींचा मोठा गौप्यस्फोट; नेमकं कारण काय?
- धनंजय मुंडे यांचा जीममधला घाम आणि ‘ती’ पोस्ट; राजकारणात पुन्हा कमबॅकची जोरदार तयारी?
- ‘गणपती विसर्जनाला नाचून कसला आनंद साजरा करताय?’, राज ठाकरेंचा डीजेला कडाडून विरोध
बातम्यांसाठी YouTube चॅनेल Subscribe करा
Subscribe Now
