पाटण्यात मोठा गौप्यस्फोट: खान सरांच्या सुरक्षारक्षकांकडूनच गोळीबार, नवा व्हिडिओ समोर आल्याने खळबळ

पुणे – पाटण्यात दोन जूनला खान सरांच्या कोचिंग सेंटरवर झालेल्या हल्ल्यात नेमक्या गोळ्या कोणी चालवल्या? सुरुवातीला हल्लेखोरांवर आरोप झाले, पण आता एका नव्या व्हिडिओने संपूर्ण प्रकरणाला नाट्यमय वळण दिले आहे.

ज्ञान बिंदू कोचिंगने एक व्हिडिओ जारी केला असून त्यात खुद्द खान सरांचे सुरक्षारक्षक गोळीबार करताना दिसत आहेत. या व्हिडिओची तातडीने दखल घेत कदमकुआं पोलिसांनी दोन सुरक्षारक्षकांना ताब्यात घेतले. सलग तीन तासांच्या कसून चौकशीनंतर त्यांनी खान सरांच्या (Khan Sir) सांगण्यावरूनच गोळीबार केल्याची धक्कादायक कबुली दिली आहे.

खान सर यांच्या अडचणीत वाढ: पोलिसांकडून शस्त्रास्त्रे जप्त

पोलिसांनी या सुरक्षारक्षकांना अटक करून त्यांची शस्त्रे जप्त केली आहेत. सूत्रांनी दिलेल्या माहितीनुसार, या गोळीबाराची पुष्टी झाल्यानंतर कदमकुआं पोलीस ठाण्यात नवा एफआयआर नोंदवण्यात आला आहे. या संपूर्ण घटनाक्रमात खुद्द खान सरांचीही पोलिसांनी त्यांच्या सेंटरवर जाऊन चौकशी केली.

दुसरीकडे, या वादात अटक झालेले ज्ञान बिंदू कोचिंगचे संचालक रोशन आनंद यांच्या समर्थनार्थ विद्यार्थी रस्त्यावर उतरले आहेत. रोशन आनंद यांच्या सुटकेची मागणी करत तब्बल पाच हजारांहून अधिक विद्यार्थ्यांनी कारगिल चौकापर्यंत कँडल मार्च काढला.

मूळ वाद दोन जूनच्या रात्री सुरू झाला होता. खान सरांच्या सेंटरवर काही अज्ञातांनी दगडफेक करत पोस्टर फाडले होते. त्यावेळी खान सरांनी हल्लेखोरांनी आठ ते दहा गोळ्या झाडल्याचा दावा केला होता. मात्र नंतर त्यांनी या दाव्यावरून घुमजाव केले.

याच हल्ल्याचा ठपका ठेवून रोशन आनंद आणि त्यांच्या दोन साथीदारांना पोलिसांनी आधीच अटक केली असून त्यांची रवानगी ब्युर तुरुंगात झाली आहे. आपण किडनीचे रुग्ण असून हा आपल्याला अडकवण्याचा मोठा कट असल्याचा दावा रोशन यांनी केला आहे. त्यामुळेच आता या नव्या व्हिडिओनंतर पोलिसांचा तपास कोणत्या दिशेने जातो याकडे सर्वांचे लक्ष लागले आहे.

या प्रकरणात सुरुवातीला हल्लेखोरांनी गोळीबार केल्याचा दावा करण्यात आला होता. मात्र आता नव्या व्हिडिओ आणि सुरक्षारक्षकांच्या जबाबावरून वेगळीच माहिती समोर येत आहे. दोन्ही बाजूंचे दावे परस्परविरोधी असून पोलीस तपास सुरू असल्याने अधिकृत अहवालानंतरच संपूर्ण सत्यता स्पष्ट होईल.

📌 महत्वाच्या बातम्या

• खरात प्रकरणात चाकणकरांचा बळी आणि तटकरेंच्या घरात तिसरं पद; रोहित पवारांचा मोठा गौप्यस्फोट
• जेवणात भेसळ किंवा गुटखा विक्री दिसल्यास थेट तुकाराम मुंढेंना करा कॉल, कारवाईचा धडाका सुरू
• बॉक्स ऑफिसवर १८०० कोटी लुटणारा ‘धुरंधर २’ अखेर OTT वर; थिएटरमध्ये न दिसलेले सीनही पाहायला मिळणार?