मुंबई इंडियन्सचा नाइके सोबत बहुवार्षिक करार; आयपीएल २०२७ साठी बनणार अधिकृत किट पार्टनर

प्रतिनिधी, 22 ऑक्टोबर: आयपीएल २०२७ च्या हंगामापूर्वी मुंबई इंडियन्सने जागतिक स्पोर्ट्सवेअर ब्रँड ‘नाईक’ (Nike) सोबत बहुवार्षिक करार केल्याची घोषणा केली आहे. २०२७ च्या हंगामापासून नाईक मुंबई इंडियन्सच्या पुरुष आणि महिला संघांचा अधिकृत किट पार्टनर असेल. या करारामुळे जागतिक क्रीडा क्षेत्रातील दोन मोठी नावे एकत्र आली आहेत.

तब्बल १९ वर्षांनंतर नाईकचे आयपीएलमध्ये पुनरागमन होत आहे. यापूर्वी २००८ च्या पहिल्यावहिल्या आयपीएल हंगामात नाईक डेक्कन चार्जर्स फ्रँचायझीसोबत जोडले गेले होते. या नव्या कराराअंतर्गत नाईक खेळाडू, प्रशिक्षक आणि सपोर्ट स्टाफसाठी सामने, सराव सत्रे आणि इतर सांघिक उपक्रमांसाठी पोशाख पुरवणार आहे.

या भागीदारीतून संघ आणि मुंबईच्या संस्कृतीची सांगड घातली जाणार आहे. तसेच, मुंबई इंडियन्सची ओळख असलेल्या ‘ब्लू अँड गोल्ड’ रंगांसह चाहत्यांसाठी नवीन मर्चंडाइजही उपलब्ध होणार आहेत. लवकरच पुरुष आणि महिला संघांचे नवे किट लाँच केले जाणार असून, खेळाडू आणि कर्मचारी नव्या पोशाखात दिसणार आहेत. तसेच चाहत्यांनाही मुंबईची ओळख आणि ऊर्जा दर्शवणारे नवे पोशाख उपलब्ध होतील.

नाईक इंडियाचे सरव्यवस्थापक तरुणदीप सिंग यांनी याविषयी बोलताना सांगितले की, मुंबई इंडियन्सची ऊर्जा आणि महत्त्वाकांक्षा यामुळे ही फ्रँचायझी ब्रँडसाठी एक नैसर्गिक भागीदार ठरली. ते म्हणाले, “क्रिकेट हा भारताचा श्वास आहे आणि मुंबई इंडियन्ससारखी ऊर्जा फार कमी संघांकडे आहे.”

“हा क्लब महत्त्वाकांक्षा आणि विश्वासाचे प्रतिनिधित्व करतो, ज्यामुळे खेळ इतका शक्तिशाली बनतो. याच गोष्टीने नाईकला या भागीदारीकडे खेचून आणले, जे खेळाडूंची सेवा करण्याच्या, खेळाचा आनंद साजरा करण्याच्या आणि पुढच्या पिढीला प्रेरित करण्याच्या आमच्या प्रयत्नांचा एक भाग आहे,” असेही सिंग यांनी स्पष्ट केले.

मुंबई इंडियन्स फ्रँचायझी पुरुष आणि महिला क्रिकेटमध्ये गुणवत्ता हेरण्यासाठी आणि खेळाडूंना पाठिंबा देण्यासाठी ओळखली जाते. त्यांच्या ‘पलटन’ नावाच्या चाहत्यांच्या मोठ्या समूहासोबत असलेले नातेही या करारातून दिसून येईल, असे रिलायन्स स्पोर्ट्सचे प्रमुख देवांग भीमज्यानी यांनी सांगितले.

भीमज्यानी म्हणाले, “मुंबई इंडियन्स नेहमीच फक्त क्रिकेटपुरती मर्यादित राहिलेली नाही. आम्ही एक कुटुंब आहोत—ज्यात आमचे खेळाडू आणि आमची पलटन आहे. हे कुटुंब गुणवत्तेला खंबीर पाठिंबा देण्यावर आणि कधीही न थांबणाऱ्या शहरासाठी खेळण्यावर आधारलेले आहे.”

मुंबई इंडियन्सचा फलंदाज आणि नाईकचा ॲथलीट तिलक वर्मा याने या कराराला वैयक्तिक पातळीवर विशेष म्हटले आहे. “मुंबई इंडियन्सने मला पाठिंबा दिला आणि मोठ्या मंचावर स्वतःला व्यक्त करण्याची संधी दिली. नाईक देखील माझ्या प्रवासाचा एक भाग राहिला आहे, त्यामुळे या दोन कुटुंबांना एकत्र आणणे माझ्यासाठी खूप खास आहे,” असे तिलक म्हणाला.

“नाईकचा लोगो (Swoosh) असलेली मुंबई इंडियन्सची जर्सी घालताना मला माझ्या आतापर्यंतच्या प्रवासाची आणि भविष्यातील ध्येयांची आठवण राहील. कुठेतरी नेट्समध्ये एक लहान मूल ‘ब्लू अँड गोल्ड’ रंगात खेळण्याचे स्वप्न पाहत असेल. त्याने आमच्याकडे पाहावे आणि ‘मी पण असा बनू शकतो’ असा विचार करावा, असे मला वाटते,” अशी भावना तिलकने व्यक्त केली.

एकीकडे हा करार झाला असला तरी, २०२७ च्या आयपीएल हंगामापूर्वी मुंबई इंडियन्सचा संघ अनिश्चिततेच्या काळातून जात आहे. २०२० नंतर संघाला आयपीएलचे विजेतेपद मिळवता आलेले नाही आणि मागील तीन वर्षे त्यांच्यासाठी कठीण राहिली आहेत. मुख्य प्रशिक्षकपदावरून महेला जयवर्धनेने पायउतार झाल्याने फ्रँचायझी सध्या नव्या प्रशिक्षकाच्या शोधात आहे.

त्यातच संघाच्या नेतृत्वातही बदल होण्याची शक्यता आहे. चालू असलेल्या चर्चांनुसार, हार्दिक पंड्या २०२७ च्या हंगामापूर्वी संघ सोडू शकतो. जर पंड्याने संघ सोडला, तर मुंबईला नवीन कर्णधार आणि नवीन मुख्य प्रशिक्षक अशा दोन्ही पदांवर नियुक्ती करावी लागेल. या बदलांमुळे मागील काही निराशाजनक हंगामानंतर संघाच्या कामगिरीत सुधारणा होईल, अशी फ्रँचायझीला आशा आहे.

📌 महत्वाच्या बातम्या

• ‘आम्ही तारीख देत नाही, थेट ऑपरेशन करतो’; दसरा मेळाव्यात एकनाथ शिंदेंचा विरोधकांवर घणाघात
• झोपेतून उठल्यावर हात सुन्न का होतात? जाणून घ्या यामागची कारणे आणि धोके
• मी पुराव्याशिवाय बोलत नाही, शिंदेंनी ५०० कोटींच्या देवाणघेवाणीवर सत्य सांगावे: मनोज जरांगेंचा इशारा