प्रतिनिधी, 18 नोव्हेंबर: यष्टीरक्षक-फलंदाज महेंद्रसिंह धोनीने १७ नोव्हेंबर २०२६ रोजी इंडियन प्रीमियर लीग (IPL) मधून निवृत्ती जाहीर केली आहे. त्याच्या या निर्णयानंतर चेन्नई सुपर किंग्स (CSK) फ्रँचायझीने त्यांच्या या माजी कर्णधाराचा सन्मान करत त्याची ७ क्रमांकाची जर्सी निवृत्त केली आहे. त्यामुळे ही आयकॉनिक जर्सी यापुढे मैदानावर दिसणार नाही.
धोनीच्या या आयपीएल निवृत्तीनंतर जगभरातील चाहते आणि क्रिकेटपटूंनी सोशल मीडियावर आपल्या भावना व्यक्त केल्या आहेत. यामध्ये भारताचा महान फलंदाज सचिन तेंडुलकर, माजी क्रिकेटपटू सूर्यकुमार यादव आणि टीम इंडियाचा माजी फलंदाज सुरेश रैना यांनी त्यांच्या सोशल मीडिया अकाऊंटवरून धोनीसाठी भावुक संदेश शेअर केले आहेत.
धोनीच्या नेतृत्वाखाली २०११ चा आयसीसी क्रिकेट विश्वचषक जिंकणाऱ्या सचिन तेंडुलकरने धोनीसोबतच्या जुन्या आठवणींना उजाळा दिला. १८ नोव्हेंबर रोजी ‘एक्स’ (X) वर केलेल्या पोस्टमध्ये सचिनने धोनीच्या पॉवर-हिटिंगचे कौतुक केले. तो म्हणाला, “मला आजही आठवतंय, जेव्हा मी बांगलादेशमध्ये धोनीला फलंदाजी करताना पाहिलं होतं, तेव्हा मी सौरव (गांगुली) ला सांगितलं होतं की याच्या पॉवर-हिटिंगमध्ये काहीतरी खास आहे. त्याच्याकडे एक दुर्मिळ प्रतिभा होती, आणि त्याचा पुढचा प्रवास आपण पाहिलाच.” भारतीय क्रिकेटला अनेक संस्मरणीय क्षण देणाऱ्या धोनीसोबत ड्रेसिंग रूम शेअर करणे हा आपल्यासाठी एक ‘खरा आनंद’ (Real joy) होता, असेही सचिनने म्हटले आहे. “तू भारतीय क्रिकेटला तुझे सर्वोत्तम योगदान दिले आहेस आणि तुझ्यासोबत हा प्रवास शेअर करणे खूप छान होते. वेल प्लेड, एमएस,” असे सचिनने नमूद केले.
भारताला २०२६ चा टी-२० विश्वचषक जिंकून देणारा माजी कर्णधार सूर्यकुमार यादवनेही इन्स्टाग्रामवर एक भावुक पोस्ट शेअर करत धोनीला आपला प्रेरणास्रोत म्हटले आहे. सूर्यकुमारने लिहिले की, “सामना संपेपर्यंत हार मानायची नसते, हे ज्या माणसाने आम्हाला शिकवले. माही भाई, आयकॉनिक हेलिकॉप्टर शॉटपासून ते अत्यंत कठीण परिस्थितीत शांतपणे सामना संपवण्यापर्यंत, तू असा इतिहास रचला आहेस ज्याबद्दल आयुष्यभर बोलले जाईल.” तसेच, “माझ्या नव्या ट्रकमधून तुला ड्राईव्हवर घेऊन जाण्यासाठी मी उत्सुक आहे. अनेक पिढ्यांना प्रेरित केल्याबद्दल धन्यवाद आणि पुढच्या प्रवासासाठी, मेंटॉरला (मार्गदर्शक) शुभेच्छा,” असे सूर्यकुमारने आपल्या पोस्टमध्ये म्हटले आहे.
धोनीचा जवळचा सहकारी सुरेश रैनाने १७ नोव्हेंबर रोजी ‘एक्स’वर आपल्या भावना व्यक्त केल्या. धोनीसोबत ड्रेसिंग रूम शेअर करण्यापासून ते अनेक ट्रॉफी जिंकण्यापर्यंतचा प्रत्येक क्षण आयुष्याभरासाठी एक आठवण बनल्याचे त्याने म्हटले आहे. “७ क्रमांकाची जर्सी यापुढे मैदानावर दिसणार नाही, पण तुझा वारसा नेहमीच चेपॉकच्या हृदयाचा ठोका राहील,” असे रैनाने म्हटले आहे. तसेच, “सीएसकेचा मेंटॉर म्हणून तू आता नव्या इनिंगला सुरुवात करत आहेस. मला खात्री आहे की तुझे तेच शांत मन, निडर वृत्ती आणि अजोड शहाणपण भविष्यातील पिढ्यांनाही प्रेरित करत राहील,” असा विश्वास रैनाने व्यक्त केला.
📌 महत्वाच्या बातम्या
- बाळासाहेबांचा फोटो फाटलाच नाही; मणिशंकर अय्यर यांचं तोंड फाटलं, एकनाथ शिंदेंचे स्पष्टीकरण
- मनोज जरांगे पाटलांचा नवा गौप्यस्फोट: ‘विरोधकांना पैसे वाटले जात आहेत, पुरावे थेट फडणवीसांना देणार’
- IPL 2027: दिल्ली कॅपिटल्समधून बाहेर पडल्यानंतर अभिषेक पोरेलची प्रतिक्रिया, हार्दिक पांड्याकडून घेतोय प्रेरणा








