मोहम्मद शमीला डावलून बुमराहला विशेष वागणूक का? मोहम्मद कैफने विचारला बीसीसीआयला जाब

प्रतिनिधी, 19 ऑक्टोबर: भारताचा माजी फलंदाज मोहम्मद कैफ याने राष्ट्रीय निवड समितीवर जोरदार टीका केली आहे. देशांतर्गत क्रिकेटमधील चमकदार कामगिरी आणि २०२३ च्या एकदिवसीय विश्वचषकातील महत्त्वपूर्ण योगदानानंतरही अनुभवी वेगवान गोलंदाज मोहम्मद शमीला संघातून वगळल्याने कैफने (Mohammad Kaif) नाराजी व्यक्त केली आहे. न्यूझीलंड दौऱ्यावर जाणाऱ्या भारतीय संघाची नुकतीच घोषणा करण्यात आली. या दौऱ्यात भारतीय संघ २ कसोटी, ५ एकदिवसीय आणि ५ टी-२० सामने खेळणार आहे. मात्र, निवड समितीने पुन्हा एकदा शमीकडे दुर्लक्ष केले असून इतकी चांगली कामगिरी असतानाही त्याला का वगळले जात आहे, याचे स्पष्टीकरण कैफने मागितले आहे.

मोहम्मद कैफने २०२३ च्या विश्वचषकात शमीने भारताला घरच्या मैदानावर अंतिम फेरीत पोहोचवण्यात बजावलेल्या मुख्य भूमिकेची आठवण निवडकर्त्यांना करून दिली. या स्पर्धेत केवळ सात सामन्यांत २४ बळी घेत तो सर्वाधिक विकेट घेणारा गोलंदाज ठरला होता. कैफच्या मते, हार्दिक पंड्या दुखापतीमुळे विश्वचषकातून बाहेर पडल्यानंतर शमीने संघातील पाच मुख्य गोलंदाजांचा भार उत्तमरीत्या सांभाळला आणि सहाव्या गोलंदाजाची उणीव भासू दिली नाही. त्यामुळे निवड समितीने शमीच्या योगदानाकडे दुर्लक्ष करू नये, असे कैफला वाटते.

क्रिकबझशी बोलताना कैफने बीसीसीआयच्या पारदर्शकतेवर प्रश्नचिन्ह उपस्थित केले. तो म्हणाला, “निर्णयांबाबत कोणीही प्रश्न विचारत नाही, कोणताही बीसीसीआय निवडकर्ता स्पष्टीकरण देत नाही आणि कोणतीही जबाबदारी निश्चित केली जात नाही. तुम्हाला पारदर्शकता ठेवावीच लागेल. हा मोहम्मद शमीचा मुद्दा आहे, जो २०२३ च्या विश्वचषकातील प्रमुख खेळाडू होता. जर तो नसता तर भारत अंतिम फेरीत पोहोचला नसता.”

कैफने पुढे स्पष्ट केले की, “जेव्हा हार्दिक पंड्या जखमी झाला, तेव्हा शमी संघात आला आणि त्याने सहाव्या गोलंदाजाची उणीव भासू दिली नाही. जर शमी नसता तर भारताला सहावा गोलंदाज शोधावा लागला असता. शमी बॅकअप असल्यामुळेच रोहित शर्माने पाच गोलंदाजांच्या जोरावर भारताला फायनलमध्ये नेले.” भारतीय खेळपट्ट्यांवर शमीने २२-२३ बळी घेतल्याचा संदर्भ देत कैफ म्हणाला की, तो प्रथम श्रेणी क्रिकेट आणि रणजी करंडक खेळून विकेट्सही घेत आहे. तो सर्व काही करत असल्यामुळे त्याला का डावलले याबाबत पारदर्शकता असायला हवी.

शमीच्या मॅच फिटनेसवर आणि कसोटी क्रिकेटच्या ताणाचा सामना करण्याच्या क्षमतेवर शंका असल्याने त्याला संघातून सतत वगळण्यात आल्याच्या बातम्या आहेत. देशांतर्गत सामन्यांमध्ये तो कमी षटकांचे स्पेल टाकत असल्याने त्याच्या तयारीवर प्रश्न उपस्थित केले जात होते. मात्र, लहान स्पेल टाकणे हे शमीला वगळण्याचे कारण असू नये असे कैफचे म्हणणे आहे. यावर त्याने जसप्रीत बुमराहचे उदाहरण दिले, ज्याचा इंग्लंड दौऱ्यासह कसोटी क्रिकेटमध्ये वर्कलोड काळजीपूर्वक मॅनेज केला गेला आहे.

याबाबत निवडकर्त्यांवर टीका करताना कैफ म्हणाला, “मी ऐकले आहे की शमी लहान स्पेल टाकत असल्याने त्याला निवडले गेले नाही. पण जसप्रीत बुमराहदेखील कसोटीत चार-षटकांचे स्पेल टाकतो. इंग्लंडमध्ये त्याचा वर्कलोड मॅनेज केला जात होता आणि शुभमन गिलनेही त्याचे पालन केले. जर एका गोलंदाजाला विशिष्ट वागणूक दिली जात असेल, तर तीच पद्धत इतरांसाठीही लागू केली जाऊ शकते. जर काम फत्ते होत असेल तर लहान स्पेल टाकण्यात काहीही गैर नाही. त्यामुळे पारदर्शकतेचा अभाव ही एक मोठी समस्या असून लवकरच कुणीतरी याबाबत स्पष्टीकरण द्यायला हवे.”

📌 महत्वाच्या बातम्या

• टायगर श्रॉफ गोळीबार प्रकरण: ‘ठाकरे सरकारच्या अडीच वर्षांत…’, संजय शिरसाटांचा संजय राऊतांना पलटवार
• मोदी सरकार कोसळून नवा पंतप्रधान येणार; संजय राऊत यांच्या दाव्याने खळबळ
• गोकुळ दूध महासंघाच्या निवडणुकीसाठी मतदानाला सुरुवात; उद्या कोण उधळणार गुलाल?