प्रतिनिधी, 14 नोव्हेंबर: १९ वर्षांखालील आशिया चषक (Under-19 Asia Cup) स्पर्धेत भारतीय संघाने पाकिस्तानवर १ गडी राखून थरारक विजय मिळवला आहे. पाकिस्तानने विजयासाठी दिलेल्या ३३७ धावांच्या विशाल आव्हानाचा पाठलाग करताना भारतीय संघ हरेल असेच सर्वांना वाटत होते. मात्र, युवा खेळाडूंनी शेवटपर्यंत हार न मानता पाकिस्तानच्या हातातोंडाशी आलेला विजय खेचून आणला आणि नवव्यांदा आशिया चषकावर आपले नाव कोरले.
या मोठ्या लक्ष्याचा पाठलाग करताना भारताची सुरुवात चांगली झाली होती. लक्ष्य रायचंदानी आणि आर्यवीर सेहवाग या सलामीवीरांनी पहिल्या विकेटसाठी ९४ धावांची भागीदारी केली. मात्र, आर्यवीर ५८ धावांवर बाद झाल्यानंतर भारताचा डाव गडगडायला सुरुवात झाली. विके विनीथ (२४), अर्जुन राजपूत (१६) आणि यशबर्धन चव्हाण (९) झटपट माघारी परतले. एका बाजूने विकेट्स पडत असताना शतकवीर ठरण्याची चिन्हे असलेला आणि विजयाची एकमेव आशा असलेला लक्ष्य रायचंदानी ८० धावांवर बाद झाला.
लक्ष्य बाद झाल्यानंतर अन्वय द्रविडकडून अपेक्षा होत्या, पण तो १९ धावांवर धावबाद (रनआऊट) झाला. त्यानंतर आर्यन सहानी ९ तर काव्या पटेल शून्यावर बाद झाल्याने भारताची अवस्था ८ बाद २५२ अशी अत्यंत बिकट झाली होती. या संकटातून भारतीय संघ जिंकेल असे कोणालाही वाटत नव्हते.
अशा दबावाच्या परिस्थितीत मनल चव्हाण आणि मोहित उल्वा यांनी डाव सावरत ५७ धावांची महत्त्वपूर्ण भागीदारी रचली. मनलने केलेल्या ४७ धावांमुळे भारताला विजयाच्या समीप आणले. मात्र, तो बाद झाल्याने भारतीय संघाच्या ड्रेसिंग रूममध्ये पुन्हा तणाव निर्माण झाला.
मनल बाद झाला तेव्हा (४७.२ षटकांत ९ विकेट पडलेल्या असताना) भारताला विजयासाठी १६ चेंडूंमध्ये २९ धावांची आवश्यकता होती. यावेळी दहाव्या क्रमांकावर चिंगुरूपता वेंकटा मैदानात उतरला. सामना अत्यंत अटीतटीच्या वळणावर असताना मोहित उल्वाने अवघ्या २६ चेंडूत ४९ धावांची वादळी खेळी केली. त्याला चिंगुरूपता वेंकटाने ११ धावांची मोलाची साथ दिली आणि १६ चेंडूत सामना फिरवत भारताने ऐतिहासिक विजय मिळवला.
📌 महत्वाच्या बातम्या
- मोहित उलवाचा विजयी चौकार! U19 आशिया कप फायनलमध्ये भारताचा पाकिस्तानवर ऐतिहासिक विजय, चाहत्यांचा जल्लोष
- पुणे: जावयाची हत्या करून सासरच्यांचा अपघाताचा बनाव; पोलिसांच्या तपासात भांडाफोड
- हैदराबाद क्रिकेटला ऊर्जितावस्था मिळवून देण्यासाठी अंबाती रायुडूंचे मोठे प्रयत्न; स्वतःचा ट्रॅक्टर आणून सुधारली मैदानाची स्थिती
