प्रतिनिधी, 20 ऑक्टोबर: भारतीय क्रिकेट नियामक मंडळाने (BCCI) महेंद्रसिंग धोनीकडे नेतृत्व सोपवण्याचा घेतलेला निर्णय अत्यंत योग्य ठरला. धोनीच्या नेतृत्वाखाली भारतीय संघाने एकदिवसीय विश्वचषक आणि पहिल्या टी-२० विश्वचषकासह अनेक आयसीसी (ICC) जेतेपदे पटकावली. संघात अनेक अनुभवी खेळाडू असतानाही बीसीसीआयने अत्यंत तरुण असलेल्या धोनीकडे कर्णधारपद सोपवले होते.
भारताचा माजी फिरकीपटू हरभजन सिंग (Harbhajan Singh) याने याबाबत मोठा खुलासा केला. तरुण धोनीकडे नेतृत्व दिल्याने कोणत्याही वरिष्ठ खेळाडूला अडचण नव्हती, असे स्पष्ट करत हरभजनने धोनीसोबतच्या मतभेदांच्या सर्व अफवांचे खंडन केले.
माजी कर्णधार सौरव गांगुलीच्या नेतृत्वाखाली सचिन तेंडुलकर, वीरेंद्र सेहवाग, युवराज सिंग, झहीर खान आणि स्वतः हरभजन सिंग यांनी आंतरराष्ट्रीय क्रिकेटमध्ये आपली ओळख निर्माण केली होती. जेव्हा धोनीकडे कर्णधारपद आले, तेव्हा संघात गांगुलीच्या नेतृत्वात खेळलेले अनेक खेळाडू होते. कालांतराने वरिष्ठ खेळाडूंनी निवृत्ती घेतली आणि संघ स्थित्यंतराच्या टप्प्यातून गेला. यावेळी तरुण कर्णधारासोबत वरिष्ठ खेळाडूंचे मतभेद असल्याच्या चर्चा सुरू झाल्या होत्या.
यावर बोलताना हरभजनने सांगितले, “गांगुलीने जिथे संघ सोडला होता, तिथून धोनीने तो पुढे नेला. त्याने कधीही स्वतःची नेतृत्वशैली लादण्याचा प्रयत्न केला नाही. खेळाडूंकडून सर्वोत्तम कामगिरी कशी करून घ्यायची, यावरच धोनीचा भर होता आणि यात तो उत्कृष्ट होता. धोनी खूप तरुण असूनही तो कर्णधार झाल्याची आम्हाला कधीच अडचण वाटली नाही. कारण आम्हाला माहीत होते की कर्णधार म्हणजेच सर्वस्व नसते; धोनीला चांगला कर्णधार म्हणून सिद्ध होण्यासाठी सर्व ११ खेळाडूंना चांगली कामगिरी करणे आवश्यक होते.”
हरभजनने पुढे सांगितले की, “कर्णधारपद स्वीकारले तेव्हा धोनी तरुण होता. पण त्याच्याकडे गांगुलीच्या नेतृत्वात आधीपासून खेळलेले प्रस्थापित खेळाडू होते. धोनीचा सर्वात चांगला गुण म्हणजे त्याने कधीही खेळाडूंवर दबाव टाकला नाही किंवा त्यांना काय करावे हे सांगितले नाही. आपण अनेक वर्षे क्रिकेट खेळत आहोत आणि वेगवेगळ्या परिस्थितीत काय करावे लागते, याची आपल्याला जाणीव आहे, हे त्याला माहीत होते.”
धोनीच्या शांत स्वभावाचे कौतुक करताना हरभजनने नमूद केले की, याच स्वभावामुळे भारताने २००७ चा टी-२० विश्वचषक, २०११ चा एकदिवसीय विश्वचषक आणि २०१३ ची चॅम्पियन्स ट्रॉफी जिंकली. “धोनीची सर्वात मोठी ताकद म्हणजे प्रत्येक वेळी शांत राहणे. तो मैदानावर आणि मैदानाबाहेरही शांत असायचा. त्याचा चेहरा पाहून तुम्ही काहीच अंदाज लावू शकत नाही. तो एक उत्तम ‘पोकर’ खेळाडू होऊ शकला असता. तो एक अद्भुत कर्णधार होता,” असे हरभजन म्हणाला.
यासोबतच माजी फिरकीपटूने धोनीच्या यष्टिरक्षणाचेही भरभरून कौतुक केले. तो म्हणाला, “त्याचे यष्टिरक्षणाचे कौशल्य अद्वितीय होते. त्याच्यापेक्षा चांगला यष्टिरक्षक असू शकतो असे मला वाटत नाही. तो विजेपेक्षाही वेगवान होता.”
📌 महत्वाच्या बातम्या
- शिंदेंच्या दसरा मेळाव्यात बळीराजाला साद; ‘त्या’ लक्षवेधी बॅनरची जोरदार चर्चा
- मनोज जरांगे पाटील यांच्या 3 सर्वात मोठ्या घोषणा; अधिकाऱ्यांना दिला थेट इशारा
- मनोज जरांगेंनी लावली २०२९ च्या निवडणुकीची फिल्डिंग; नारायणगडावरील मेळाव्यातून मराठ्यांना दिला मोठा आदेश
Quick Answers
हरभजन सिंगने धोनीसोबतच्या मतभेदांच्या सर्व अफवांचे खंडन केले. तरुण धोनीकडे नेतृत्व सोपवल्याने कोणत्याही वरिष्ठ खेळाडूला अडचण नव्हती, असा खुलासा त्याने केला.
धोनीने कधीही खेळाडूंवर दबाव टाकला नाही किंवा त्यांना काय करावे हे सांगितले नाही, हा त्याचा सर्वात चांगला गुण होता. खेळाडू अनेक वर्षे खेळत असल्याने त्यांना परिस्थितीची जाणीव आहे, हे धोनी जाणून होता.
हरभजनच्या मते, प्रत्येक वेळी शांत राहणे ही धोनीची सर्वात मोठी ताकद होती. तसेच त्याचे यष्टिरक्षणाचे कौशल्य अद्वितीय होते आणि तो विजेपेक्षाही वेगवान होता.
टीप: खालील झटपट उत्तरे AI च्या सहाय्याने तयार करण्यात आली असून ती वरील मूळ बातमीतील माहितीनुसार आहेत. अधिक संदर्भासाठी संपूर्ण बातमी वाचा.
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
