प्रतिनिधी, 21 नोव्हेंबर: राजस्थानमध्ये नुकत्याच पार पडलेल्या पंचायत समिती आणि जिल्हा परिषद निवडणुकांमध्ये काँग्रेसने भाजपला मोठा धक्का दिला आहे. विशेष म्हणजे या निवडणुका ईव्हीएमऐवजी बॅलेट पेपरवर घेण्यात आल्या होत्या. या निकालामुळे काँग्रेसच्या बॅलेट पेपरवर निवडणुका घेण्याच्या मागणीला मोठे बळ मिळाले असून, ग्रामीण भागात भाजपला नामुष्कीकारक पराभवाचा सामना करावा लागला आहे.
पंचायत समितीच्या निवडणुकीत काँग्रेसने जबरदस्त मुसंडी मारत २,९९० जागांवर विजय मिळवला आहे, तर भाजपला १,७९५ जागांवर समाधान मानावे लागले. जिल्हा परिषदेच्या निकालांमध्येही काँग्रेसने १४३ जागा जिंकून आपले वर्चस्व सिद्ध केले असून, भाजपच्या खात्यात केवळ ८३ जागा आल्या आहेत.
काही महिन्यांपूर्वी झालेल्या महापालिका निवडणुकांमध्ये ३०१ पैकी १९७ ठिकाणी विजय मिळवणाऱ्या भाजपला ग्रामीण भागातील मतदारांनी मात्र साफ नाकारले आहे. याउलट, डिसेंबर २०२० मध्ये २१ जिल्ह्यांत झालेल्या पंचायत निवडणुकांमध्ये भाजपने ६३६ पैकी ३५३ जिल्हा परिषद जागा (१४-१५ जिल्ह्यांत सत्ता) जिंकून दबदबा निर्माण केला होता, तर काँग्रेसला केवळ २५२ जागा (५ जिल्ह्यांत सत्ता) मिळाल्या होत्या. यंदा मात्र काँग्रेसने मागील वेळेपेक्षा अतिशय सरस कामगिरी नोंदवली आहे.
या निवडणुकीत भाजपच्या अनेक दिग्गज नेत्यांच्या गडांना सुरुंग लागला आहे. सीकरमध्ये नगरविकास मंत्री झाबर सिंह खर्रा यांच्या पत्नी आणि दोन्ही मुलांचा पराभव झाला, तसेच पक्षाच्या माजी जिल्हाध्यक्षांनाही पराभवाचा धक्का बसला. मंत्री राज्यवर्धन सिंह राठोड यांच्या झोटवाडा विधानसभा मतदारसंघात पंचायत समितीच्या १५ पैकी केवळ एकाच जागेवर भाजपला विजय मिळवता आला.
दुसरीकडे, काँग्रेसचे प्रदेशाध्यक्ष गोविंद सिंह डोटासरा यांनी सीकरमध्ये, तर सचिन पायलट यांच्याशी संबंधित टोंक परिसरात काँग्रेसने भक्कम यश मिळवले. घराणेशाहीला संमिश्र प्रतिसाद मिळाला असून, भाजपचे ज्येष्ठ नेते राजेंद्र राठोड यांचे चिरंजीव पराक्रम सिंह यांनी जिल्हा परिषदेत १७,८६१ मते मिळवून विजय मिळवला, तर त्यांच्या सून कनिका सिंह याही २,३८४ मतांनी विजयी झाल्या. मात्र झाबर सिंह खर्रा यांच्या कुटुंबीयांना पराभव स्वीकारावा लागला.
राजधानी जयपूरच्या ग्रामीण भागातही काँग्रेसचा दबदबा पाहायला मिळाला. जयपूर जिल्ह्यातील २२ पैकी १४ पंचायत समित्यांवर काँग्रेसने झेंडा फडकवला. चौमू आणि सांभरमध्ये भाजपला बहुमत मिळाले, तर सांगानेरमध्ये भाजपचा सहयोगी पक्ष असलेल्या राष्ट्रीय लोकतांत्रिक पक्षाने (आरएलपी) विजय मिळवला.
पाच पंचायत समित्यांमध्ये कोणत्याही पक्षाला स्पष्ट बहुमत न मिळाल्याने अपक्षांची भूमिका सत्ता स्थापनेत निर्णायक ठरणार आहे. पंचायत समितीत अपक्षांनी ५१६ जागांवर बाजी मारून आपली ताकद दाखवून दिली. हनुमान बेनीवाल यांच्या आरएलपीने पंचायत समितीत ४३८ आणि जिल्हा परिषदेत ४ जागा जिंकल्या.
इतर प्रादेशिक पक्षांनीही या निवडणुकीत लक्षवेधी कामगिरी केली आहे. पंचायत समितीत भारत आदिवासी पार्टीला (BAP) २१५, भारतीय कम्युनिस्ट पार्टीला (मार्क्सवादी) ५०, बहुजन समाज पार्टीला (बीएसपी) ४४, तर आम आदमी पार्टीला २ जागा मिळाल्या. तसेच जिल्हा परिषदेत अपक्षांनी ५, सीपीएमने ३ आणि बीएसपीने एका जागेवर विजय नोंदवला असून, अनेक ठिकाणी हे छोटे पक्ष सत्तेची समीकरणे ठरवणार आहेत.
📌 महत्वाच्या बातम्या
- सलाईनमधून इंजेक्शन दिल्यानंतर १० महिन्यांच्या चिमुकलीचा मृत्यू; नातेवाईकांचे रुग्णालयावर गंभीर आरोप
- राजस्थानच्या स्थानिक स्वराज्य संस्थांच्या निवडणुकांमध्ये काँग्रेसची जोरदार मुसंडी; सत्ताधारी भाजपचा मोठा पराभव
- टोरंट प्रकल्पाला आता अजितदादा गटाचाही विरोध; सुनील तटकरे यांच्या मागणीने सरकारची डोकेदुखी वाढली








