हॅमिल्टन, 1 नोव्हेंबर: हॅमिल्टनच्या सेडन पार्कवर खेळवण्यात आलेल्या पाचव्या आणि अंतिम टी-२० सामन्यात (IND vs NZ) न्यूझीलंडने भारताचा ७ विकेट्सने धुव्वा उडवला आहे. भारतीय संघाने विजयासाठी ठेवलेले १९२ धावांचे आव्हान किवी फलंदाजांनी टिम सायफर्ट आणि ग्लेन फिलिप्स यांच्या धडाकेबाज फलंदाजीच्या जोरावर सहज पूर्ण केले. या पराभवामुळे भारतीय संघाचा मालिकेचा शेवट निराशाजनक झाला.
कर्णधार श्रेयस अय्यरच्या नेतृत्वाखालील टीम इंडियाने या मालिकेत सुरुवातीचे तीन सामने जिंकून ३-० अशी अभेद्य आघाडी घेतली होती. त्यामुळे भारतीय संघ न्यूझीलंडला व्हाईटवॉश देईल अशी शक्यता निर्माण झाली होती. मात्र, त्यानंतर किवी संघाने जबरदस्त पुनरागमन करत सलग दोन सामने जिंकले आणि भारताच्या विजयी घोडदौडीला ब्रेक लावला. अखेर भारताने ही मालिका ३-२ अशा फरकाने खिशात घातली.
या अंतिम लढतीत भारताची सुरुवात अत्यंत खराब झाली. सलामीवीर संजू सॅमसन १० चेंडूंत अवघ्या ४ धावा करून बाद झाला, तर अभिषेक शर्माला दोन चेंडूंत केवळ एक धाव करता आली. या दोघांनाही वेगवान गोलंदाज अॅडम मिल्नेने माघारी धाडले. अवघ्या ३.१ षटकांत १९ धावांवर २ बाद आणि चार षटकांनंतर २१ धावांवर २ बाद अशी भारताची बिकट अवस्था झाली होती.
सुरुवातीच्या पडझडीनंतर इशान किशन आणि श्रेयस अय्यर यांनी आक्रमक पवित्रा घेत न्यूझीलंडच्या गोलंदाजांची जोरदार धुलाई केली. इशानने ३२ चेंडूंत ५ चौकार आणि ५ षटकारांच्या मदतीने ६१ धावांची वादळी खेळी केली. तर कर्णधार श्रेयसने २३ चेंडूंत ३ चौकार व ४ षटकार ठोकत ५० धावा कुटल्या. याशिवाय नमन धीरने ३३ आणि नितीश कुमार रेड्डीने २२ धावांचे योगदान दिले. तरीही एकापाठोपाठ विकेट्स गेल्याने भारताला मोठी धावसंख्या उभारण्यात अपयश आले. न्यूझीलंडकडून अॅडम मिल्नेने भेदक मारा करत ४ षटकांत केवळ १९ धावा देऊन ४ बळी घेतले. नॅथन स्मिथ आणि ब्लेअर टिकनर यांनीही प्रत्येकी दोन विकेट्स मिळवल्या.
भारताच्या १९२ धावांच्या लक्ष्याचा पाठलाग करताना न्यूझीलंडचीही सुरुवात खराब झाली. स्फोटक फलंदाज फिन ॲलन ३ चेंडूंत अवघ्या २ धावा करून अर्शदीप सिंगचा शिकार ठरला. मात्र, सुरुवातीचा हा धक्का पचवत टिम सायफर्ट आणि डॅरिल मिचेल यांनी दुसऱ्या विकेटसाठी अवघ्या काही चेंडूंत ७३ धावांची वेगवान भागीदारी रचली आणि भारतीय गोलंदाजांवर दबाव आणला.
यानंतर मालिकेत सर्वाधिक धावा करणारा ग्लेन फिलिप्स फलंदाजीला आला. त्याने टिम सायफर्टच्या साथीने भारतीय गोलंदाजांची पिसे काढली. सायफर्टने ९३ धावांची तुफानी खेळी साकारली, तर फिलिप्सने ६५ धावा कुटत न्यूझीलंडच्या विजयावर शिक्कामोर्तब केले.
या सामन्यात भारतीय गोलंदाजांना किवी फलंदाजांवर अंकुश ठेवण्यात पूर्णपणे अपयश आले. भुवनेश्वर कुमारने ४ षटकांत ४१ धावा, अर्शदीप सिंगने ४ षटकांत ४० धावा तर प्रिन्स यादवने ३ षटकांत ३५ धावा खर्च केल्या. मिस्ट्री स्पिनर वरुण चक्रवर्तीने पहिल्या दोन षटकांत केवळ १४ धावा दिल्या होत्या, मात्र पुढच्या दोन षटकांत किवी फलंदाजांनी त्याला लक्ष्य करत ३१ धावा लुटल्या. त्यामुळे त्याच्या ४ षटकांचा एकूण खर्च ४५ धावांवर पोहोचला. गोलंदाजांच्या या सुमार कामगिरीमुळे न्यूझीलंडला हे लक्ष्य सहज गाठता आले.
📌 महत्वाच्या बातम्या
- राज्यातील शेतकऱ्यांना सरकार वाऱ्यावर सोडणार नाही; उपमुख्यमंत्री एकनाथ शिंदेंची भरघोस मदतीची ग्वाही
- ग्लेन फिलिप्सचा जागतिक विक्रम; द्विपक्षीय टी-२० मालिकेत केल्या सर्वाधिक धावा
- “निकाल वेगळाही असू शकला असता”: भारताकडून ३-२ ने मालिका गमावल्यानंतर मिचेल सँटनरची प्रतिक्रिया
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
