“उद्या यांना मुलं झाली तरी संजय राऊतांचे नाव घेतील”, ऑडिओ क्लिपवरून राऊतांचा भाजपवर घणाघात

प्रतिनिधी, 26 ऑक्टोबर: मनोज जरांगे यांच्याकडे असलेल्या कथित ऑडिओ क्लिपवरून राजकारण तापले असून, ठाकरे गटाचे नेते संजय राऊत (Sanjay Raut) यांनी भाजपवर जोरदार हल्लाबोल केला आहे. ही क्लिप आपणच बनवली असल्याचा आरोप करणारे भाजप नेते प्रसाद लाड यांना राऊतांनी खोचक टोला लगावला आहे. ‘भाजपच्या लोकांना काहीही काम उरलेले नाही. उद्या यांना मुलं झाली तरी संजय राऊतांमुळेच झाली म्हणून हे लोक बोंब मारतील,’ अशा जळजळीत शब्दांत राऊतांनी समाचार घेतला. माध्यमांशी संवाद साधताना त्यांनी हा पलटवार केला.

मनोज जरांगे पाटील यांच्याकडील क्लिप उबाठा गटाच्या वॉररुममध्ये तयार करण्यात आली असून, यामागे संजय राऊत यांचा हात असल्याचा दावा प्रसाद लाड यांनी केला होता. तसेच याप्रकरणी राऊतांच्या चौकशीची मागणीही त्यांनी केली होती. यावर बोलताना राऊत म्हणाले की, क्लिपमधील आवाज अत्यंत स्पष्ट आहेत. मात्र, तरीही भाजप नेते मूर्खपणाचे आणि हास्यास्पद आरोप करत आहेत. लोक त्यांच्या या बोलण्यावर हसत आहेत. पैसा आणि सत्तेच्या जोरावर हे लोक वळवळत असून त्यांच्याकडे मेंदू नाही, तर तो केवळ एक मातीचा गोळा असल्याची घणाघाती टीका राऊतांनी केली. तसेच, दिल्लीत बसलेल्या त्यांच्या बड्या नेत्यांचाही मेंदू चालत नसल्याचा टोला त्यांनी लगावला.

यावेळी संजय राऊत यांनी एका मोठ्या प्रकरणाला वाचा फोडल्याबद्दल आणि राजकारण्यांचा विद्रूप चेहरा देशासमोर आणल्याबद्दल मनोज जरांगे यांचे आभार मानले. टेप कुणाची आणि त्यातील आवाज कुणाचे हे स्पष्ट असतानाही भाजप नेते आपल्या अकलेचे प्रदर्शन करत असल्याचे ते म्हणाले.

दरम्यान, काँग्रेसचे राष्ट्रीय अध्यक्ष मल्लिकार्जुन खरगे यांच्या विधानावरून निर्माण झालेल्या वादावरही राऊतांनी भाष्य करत त्यांची पाठराखण केली. ग्रामीण भागात वडिलांना ‘बाप’ किंवा ‘म्हातारा’ म्हणण्याची पद्धत असल्याचे त्यांनी स्पष्ट केले. खरगे हे अनेक उन्हाळे-पावसाळे पाहिलेले अनुभवी नेते आहेत. त्यांच्या विधानाचा विपर्यास करून रस्त्यावर उतरल्याने भाजपला कोणतीही सहानुभूती मिळणार नाही. कुणीही पंतप्रधानांच्या वडिलांचा उद्धार केलेला नाही, असे राऊत यांनी ठणकावून सांगितले.

पंतप्रधान नरेंद्र मोदींवर निशाणा साधताना राऊत म्हणाले की, लहान मुलांसारखे भोकाड पसरण्याची आणि छाती बडवत ‘माझी आई काढली, माझा बाप काढला’, असे सांगण्याची मोदींना सवयच जडली आहे. प्रत्यक्षात कुणी कुणाचा बाप काढत नसून, या सरकारचा बाप सत्तेतून जाईल, असाच त्या म्हणण्याचा अर्थ असल्याचे राऊत यांनी स्पष्ट केले.

📌 महत्वाच्या बातम्या

• एकनाथ शिंदे यांचे नेत्यांना आदेश: ‘राजकारण थांबवा, थेट दुष्काळग्रस्त शेतकऱ्यांच्या बांधावर जा’
• आदित्य ठाकरे कर्जत वृक्षतोडीविरोधात आक्रमक; आज घेणार प्रकल्पाचा आढावा
• न्यूझीलंडविरुद्ध चौथ्या टी-२० सामन्यात इशान किशनचे पुनरागमन? वैभव सूर्यवंशीची घेणार जागा