गजानन गंगामाई इंडस्ट्रीजच्या १३५ कोटींच्या बँक घोटाळ्याप्रकरणी ईडीचे छापे; सिंगापूरमधील ३५ कोटी गोठवले

Bank Fraud: १३५ कोटी रुपयांच्या बँक घोटाळ्याप्रकरणी सक्तवसुली संचालनालयाने (ED) गजानन गंगामाई इंडस्ट्रीज (GGI LLP) या कंपनीशी संबंधित मुंबई आणि छत्रपती संभाजीनगरमधील सहा ठिकाणांवर छापे टाकले आहेत. या कारवाईत इंडियन बँकेच्या सिंगापूर शाखेतील तब्बल ३५.७१ कोटी रुपयांची (३.७ दशलक्ष डॉलर्स) मुदत ठेव गोठवण्यात आली असून, एक आलिशान बीएमडब्ल्यू (BMW 320LD) कार जप्त करण्यात आली आहे.

बँक ऑफ इंडियाच्या नेतृत्वाखालील बँकांच्या समूहाकडून या कंपनीने कर्ज घेतले होते. हे कर्ज बुडीत खात्यात (NPA) गेल्यानंतर सुमारे १३५ कोटींची थकबाकी राहिली आणि बँकांनी हा व्यवहार फसवणुकीचा असल्याचे जाहीर केले. पुण्यातील सीबीआयच्या लाचलुचपत प्रतिबंधक विभागाने (ACB) दाखल केलेल्या गुन्ह्याच्या आणि आरोपपत्राच्या आधारे ईडीने ही कारवाई सुरू केली आहे.

ED raid at Gajanan Gangamai Industries locations for bank fraud

बनावट कंपन्यांद्वारे पैशांची अफरातफर

गजानन गंगामाई इंडस्ट्रीजचे माजी भागीदार नितीन रामचंद्र जाधव आणि इतरांनी मिळून या कर्ज रकमेची अफरातफर केल्याचा आरोप आहे. ईडीच्या तपासात उघड झाले आहे की, कर्जातून मिळालेली रक्कम बनावट कंपन्या आणि बोगस एन्ट्री देणाऱ्यांच्या माध्यमातून पद्धतशीरपणे वळवण्यात आली.

पैशांचा मूळ स्रोत आणि मार्ग लपवण्यासाठी या बनावट खात्यांमधून मोठ्या प्रमाणावर रोख रक्कम काढण्यात आली. या शोधमोहिमेदरम्यान ईडीच्या अधिकाऱ्यांना अनेक संशयास्पद कागदपत्रे आणि डिजिटल उपकरणेही सापडली असून ती जप्त करण्यात आली आहेत.

📌 महत्वाच्या बातम्या

• मनोज जरांगेंची मराठा महिलांना हाक: अमृता फडणवीस, लता शिंदेंना हळदी-कुंकू लावण्याचे आवाहन
• मनोज जरांगेंचे आंदोलन खोटे; अजय बारसकरांचे आर्थिक व्यवहारांवरून गंभीर आरोप
• सुनील तटकरे कंपन्यांना ब्लॅकमेल करतायत; शिवसेना आमदार महेंद्र थोरवेंचा गंभीर आरोप