प्रतिनिधी, 19 ऑक्टोबर: भारतीय फलंदाज सरफराज खान आणि आरसीबीचा (RCB) कर्णधार रजत पाटीदार यांनी रणजी करंडक २०२६-२७ च्या हंगामात आपापल्या संघांसाठी शानदार शतके झळकावत दमदार सुरुवात केली आहे. एका बाजूला रजत पाटीदारने मध्य प्रदेशकडून पाँडिचेरीविरुद्ध नाबाद शतक झळकावले, तर दुसऱ्या बाजूला सरफराज खानने मुंबईसाठी खेळताना देशांतर्गत क्रिकेटमधील आपला उत्कृष्ट फॉर्म कायम राखत आणखी एक शतक ठोकले. दरम्यान, याआधी चिन्मय सुतारने रणजी करंडकात ४०० धावांच्या एलिट क्लबमध्ये भाऊसाहेब निंबाळकर यांच्या पंक्तीत स्थान मिळवले आहे.
थुटीपेट येथील सीएपी सीकेम (CAP Siechem) मैदानावर झालेल्या एलिट गटाच्या सामन्यात मध्य प्रदेशचा कर्णधार रजत पाटीदारने मिळालेल्या संधीचे सोने केले. सहाव्या क्रमांकावर फलंदाजीला येत त्याने पाँडिचेरीविरुद्ध अवघ्या ११४ चेंडूंत आपले शतक पूर्ण केले. दुसऱ्या दिवसाचा खेळ संपेपर्यंत पाटीदारने ९०.६८ च्या स्ट्राईक रेटने ११८ चेंडूंत १३ चौकारांच्या मदतीने नाबाद १०७ धावा केल्या. त्याच्या या महत्त्वपूर्ण खेळीमुळे मध्य प्रदेशने ५ गड्यांच्या मोबदल्यात ३०२ धावांपर्यंत मजल मारली.
या सामन्यात पाटीदारव्यतिरिक्त चंचल राठोडने (२०४ चेंडूंत ७८ धावा) आणि शुभम शर्माने (१०६ चेंडूंत ५८ धावा) शानदार अर्धशतके झळकावली. तत्पूर्वी, मध्य प्रदेशच्या गोलंदाजांनी पाँडिचेरीचा पहिला डाव अवघ्या १७७ धावांत गुंडाळला. पाँडिचेरीकडून केवळ रितेश अशोक गुडगेला अर्धशतक गाठता आले, तर इतर एकाही फलंदाजाला २५ धावांचा टप्पा ओलांडता आला नाही. मध्य प्रदेशकडून रवी किरणने ३, तर आर्यन पांडे, सारांश जैन आणि कुमार कार्तिकेय यांनी प्रत्येकी २ बळी घेतले. याच दरम्यान, आकाश चोप्राने न्यूझीलंड दौऱ्यापूर्वी भारताच्या प्लेइंग इलेव्हनमध्ये वैभव सूर्यवंशी ज्या ३ खेळाडूंची जागा घेऊ शकतो त्यांची नावे सुचवली आहेत.
दुसरीकडे, बिलासपूरच्या लुहनू क्रिकेट स्टेडियमवर हिमाचल प्रदेशविरुद्ध सुरू असलेल्या गटवारीतील सामन्यात सरफराज खानने प्रथम श्रेणी क्रिकेटमधील आपले १८ वे शतक साजरे केले. त्याने १५१ चेंडूंत आपली शंभर धावांची खेळी पूर्ण केली. दुसऱ्या दिवसाचा खेळ थांबला तेव्हा सरफराज ६५ हून अधिकच्या स्ट्राईक रेटने २१३ चेंडूंत १८ चौकारांसह १३९ धावांवर नाबाद होता.
या सामन्यात मुंबईची सुरुवात खराब झाली होती. सलामीवीर दिव्यांश सक्सेना (९) आणि अंगक्रिश रघुवंशी (२०) स्वस्तात बाद झाले. मात्र, मुशीर खान आणि कर्णधार सिद्धेश लाड यांनी शानदार अर्धशतके ठोकत डाव सावरला. त्यानंतर सरफराजच्या खेळीच्या जोरावर मुंबईने दुसऱ्या दिवसअखेर ४ बाद ३९८ अशी मजबूत धावसंख्या उभारली.
तत्पूर्वी, मुंबईच्या तुषार देशपांडेने १३.५ षटकांत ४६ धावा देत ४ बळी घेतले, तर सिल्वेस्टर डिसोझाने २ बळी घेत हिमाचल प्रदेशचा डाव १४० धावांत संपुष्टात आणला. हिमाचल प्रदेशकडून केवळ कर्णधार पुखराज मान (३५), यष्टीरक्षक वैभव कालटा (३३) आणि आकाश वशिष्ठ (३९) यांनाच ३० धावांचा टप्पा ओलांडता आला, तर उर्वरित सर्व फलंदाज एकेरी धावेवर बाद झाले.
📌 महत्वाच्या बातम्या
- राज्यात अवकाळी पावसाची हजेरी; हवामान विभागाकडून अनेक जिल्ह्यांना ‘यलो अलर्ट’ जारी
- टायगर श्रॉफवरील हल्ला: मुंबईतील रॅपिडो चालक निघाला शूटर; अल्पवयीनासह तिघे राजस्थानमधून ताब्यात
- टायगर श्रॉफ गोळीबार प्रकरण: १० दिवसांपूर्वीच रचला कट; हल्लेखोर ४५ मिनिटे मैदानाबाहेर दबा धरून होते
Quick Answers
रजत पाटीदारने पाँडिचेरीविरुद्ध अवघ्या ११४ चेंडूंत शतक पूर्ण केले. दुसऱ्या दिवसाचा खेळ संपेपर्यंत त्याने ११८ चेंडूंत १३ चौकारांच्या मदतीने नाबाद १०७ धावा केल्या.
सरफराज खानने हिमाचल प्रदेशविरुद्ध २१३ चेंडूंत १८ चौकारांच्या मदतीने नाबाद १३९ धावा केल्या आणि प्रथम श्रेणी क्रिकेटमधील आपले १८ वे शतक पूर्ण केले.
हिमाचल प्रदेशचा पहिला डाव अवघ्या १४० धावांत संपुष्टात आला. मुंबईकडून तुषार देशपांडेने १३.५ षटकांत ४६ धावा देत सर्वाधिक ४ बळी घेतले.
चिन्मय सुतारने रणजी करंडकात ४०० धावांच्या एलिट क्लबमध्ये भाऊसाहेब निंबाळकर यांच्या पंक्तीत स्थान मिळवले आहे.
टीप: खालील झटपट उत्तरे AI च्या सहाय्याने तयार करण्यात आली असून ती वरील मूळ बातमीतील माहितीनुसार आहेत. अधिक संदर्भासाठी संपूर्ण बातमी वाचा.
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
