पेटीयम वापरताय ! थांबा, आधी हे वाचा

टीम महाराष्ट्र देशा : पेटीयम (Paytm) वापरकर्त्यांनी केवायसी (KYC) अपडेट करताना काळजी घ्यावी,असा इशारा पेटीएम कंपनीकडून देण्यात आला आहे.केवायसी अपडेटसाठी अॅनिडेस्क किंवा क्विकसपोर्ट अॅप डाउनलोड करा, अशा एसएमएस किंवा कॉलद्वारे पेटीएम अकाउन्टची सर्व माहिती हॅक केली जात आहे, असे ट्विट सायबर पोलिसांनी केले आहे.

नागरिकांच्या मोबाईलवर नोटिफिकेशन एसएमएसद्वारे काही बँक मेसेज येतात. त्यामध्ये तुमच्या खात्यावरून काही ठराविक रक्कम वजा झाली आहे, अधिक माहितीसाठी या नंबरवरती संपर्क साधा किंवा दिलेली लिंक शेअर करा, असा मजकूर असतो. नागरिकांनी अशा प्रकारच्या मेसेजला पुन्हा उत्तर देऊ नये किंवा लिंक शेअर करू नये, अशी माहिती सायबरचे वरिष्ठ पोलीस निरीक्षक जयराम पायगुडे यांनी दिली.

अॅनिडेस्क किंवा क्विकसपोर्ट अॅप डाउनलोड केल्यास अथवा लिंक ओपन केल्यास आपल्या मोबाईलचा अॅक्सेस सायबर चोरट्याकडे जातो. आपल्या फोनमध्ये येणारे ओटीपी, मेसेज, बँकेचे ऑनलाईन अॅप ,पेटीयम, गुगल पे सारख्या अॅपचा अॅक्सेस त्यांच्याकडे जातो. त्यामुळे सहजासहजी चोरटे आपल्या अकाउन्टमधील रक्कम काढून घेतात. तसेच त्यांच्या वरती तत्काळ कारवाई केली जाऊ शकते, म्हणून आपल्याला पाठवण्यात आलेला मेसेजही ते डिलीट करून टाकतात.

अशा प्रकारे नकळत लोकांची फसवणूक केली जात असल्याचे निदर्शनास आले आहे, अशी माहिती सायबर पोलिसांनी दिली आहे.नागरिकांनी अशा प्रकारच्या एसएमएस किंवा फोनपासून सावधान रहावे, असे आवाहन वरिष्ठ पोलीस निरीक्षक जयराम पायगुडे यांनी केले आहे.