fbpx

सावधान : डेंगी, मलेरिया डासांची उत्पत्ती आढळल्यास होणार कारवाई

मुंबई : मान्सूनपूर्व पावसाच्या पार्श्वभूमीवर मुंबई शहरात सूरू असलेल्या मेट्रो प्रकल्पांच्या ठिकाणी डासांची उत्पत्ती नष्ट करण्यासाठी महानगरपालिका, मेट्रो प्रशासन आणि कंत्राटदारांकडून नियमित तपासणी व उपायोजना केल्या जात आहेत. या तपासणी दरम्यान शासकीय प्रकल्प किंवा खासगी प्रकल्पाच्या ठिकाणी रोग पसरविणाऱ्या डासांची उत्पत्ती आढळल्यास संबंधितांविरूद्ध कारवाई करणार असल्याची माहिती नगरविकास राज्यमंत्री योगेश सागर यांनी आज विधानपरिषदेत दिली.

मुंबईतील मेट्रो प्रकल्प बांधकामाच्या ठिकाणी गढूळ पाण्यामूळे आजार पसरविणाऱ्या डांसाच्या उत्पत्ती बाबत सदस्यांनी उपस्थ‍ित केलेल्या लक्षवेधी सूचनेला उत्तर देताना सागर बोलत होते.

सागर म्हणाले, मुंबई शहर व उपनगरात सुरू असलेल्या मेट्रो प्रकल्पाच्या ठिकाणी मुंबई मेट्रो रेल कॉर्पोरेशनच्या एजन्सीने डास प्रतिबंधाच्या कामांना सुरूवात केली आहे. यासाठी मुंबई महानगरपालिका आणि एमएमआरडीएनेही स्वतंत्र यंत्रणा नेमली आहे. त्यांच्यामार्फत मलेरिया व डेंगी आजाराच्या रूग्णांचे दैनंदिन सर्वेक्षण करण्यात येत असून महापालिकेच्या इतर विभागांशी समन्वयाने वस्तीपातळीवर साथीच्या आजाराच्या नियंत्रण व प्रतिबंधासाठी खबरदारी घेण्यात येत आहे. आतापर्यंत डेंगी डासांची उत्पत्ती आढळलेल्या सोसायट्या, खासगी बांधकाम व्यावसायिकांसह आदी १५१ जणांना नोटीसा जारी केल्या असून त्यांच्याकडून १४ हजार रूपयांचा दंडही वसूल करण्यात आला असल्याचे त्यांनी यावेळी सांगितले.

सागर म्हणाले, मुंबई मेट्रो लाईन-३ प्रकल्पांतर्गत स्थानकांच्या खोदकामा ठिकाणी जमिनीतून झिरपणाऱ्या पाण्याचा निचरा करण्यासाठी प्रत्येक स्थानकात आवश्यक क्षमतेच्या पंपांची व्यवस्था करण्यात आली आहे. या ठिकाणी डासांची उत्पत्ती होऊ नये यासाठी मुंबई महानगरपालिका, मेट्रो प्रशासन व संबधित कंत्राटदार यांच्या समन्वयाने नियमितरित्या डास अळीनाशक फवारणी व धुम्र फवारणी करणे अशा उपाययोजना करण्यात येत आहेत. प्रसंगी प्रत्येक सोसायटीतील लोकांचा मोहिमेत सहभाग घेण्याचा प्रयत्न केला जात असल्याचे त्यांनी यावेळी सांगितले.

एका उपप्रश्नाला उत्तर देताना श्री.सागर म्हणाले, मुंबई महानगरपालिकेच्या सर्वेक्षणात विधानभवन मेट्रो स्टेशनच्या बांधकामाच्या ठिकाणी जमिनीतून झिरपणाऱ्या पाण्यामध्ये मलेरिया पसविणाऱ्या ऍनॉफिलीस जातीच्या डासांची उत्पत्ती दोन ठिकाणी आढळून आली असून या ठिकाणी किटकनाशक फवारणी करून डासांची उत्पत्तीस्थाने नष्ट करण्यात आली आहेत. या परिसरामध्ये महानगरपालिकेमार्फत ताप सर्वेक्षण करण्यात आले असून सर्वेक्षणादरम्यान मलेरिया व डेंग्यूच्या आजाराची लागण झाल्याचे आढळून आले नाही. काही दिवसांअगोदर या भागातील गाडगीळ परिवाराला या आजाराची लागण झाल्याची घटना घडली होती. त्याची राज्य शासनाने गंभीर दखल घेतली असून तशी लागण यापुढे कोणत्याही परिवाराला होणार नाही याची दक्षता घेतली जाणार आहे. तसेच महानगरपालिका क्षेत्रात सुरू असलेल्या प्रकल्पाच्या परिसरात रोगांचा प्रादुर्भाव टाळण्यासाठी आरोग्य तज्ज्ञांची नेमणूक केली जाईल, अशी ग्वाही त्यांनी यावेळी दिली.