राष्ट्रवादीचा ‘पॉवरफुल्ल’ स्ट्रोक,उज्ज्वल निकम राष्ट्रवादीकडून लोकसभेच्या रिंगणात?

मुंबई :आगामी लोसाभेसाठी काल राष्ट्रवादीने काही उमेदवार निश्चितही केले आहेत. तसेच काही उमेदवारांच्या नावावर गांभीर्याने चर्चा झाली. याच चर्चा झालेल्या नावांमध्ये सर्वांच्या भुवया उंचावणारे नाव होते सुप्रसिद्ध वकील उज्ज्वल निकम याचं. देशभरात नावाजलेले सुप्रसिद्ध वकील उज्ज्वल निकम यांना लोकसभेच्या रिंगणात उतरवण्याचे ‘पॉवरफुल्ल’ प्रयत्न सुरू असल्याचं सूत्रांकडून माहिती मिळाली आहे. जळगाव मतदारसंघातून त्यांना उमेदवारी देण्याबाबत राष्ट्रवादीच्या बैठकीत चर्चाही झाल्याची माहिती सूत्रांनी दिली.

उज्ज्वल निकम यांना निवडणुकीच्या रिंगणात उतरवण्यासाठी दस्तुरखुद्द शरद पवार आग्रही असल्याचं बोललं जात आहे. मात्र, निकम यांच्याशी चर्चा करून आणि त्यांची सहमती घेऊनच अंतिम निर्णय घेतला जाणार आहे

तत्पूर्वी शुक्रवारी झालेल्या बैठकीत राष्ट्रवादीकडून लोकसभा उमेदवारीसाठी काही नावे निश्चितही करण्यात आली. त्यानुसार रायगडमधून सुनील तटकरे तर कोल्हापूरमधून धनंजय महाडिक लोकसभेची निवडणूक लढवतील. राष्ट्रवादीकडून राज्यातील अन्य मतदारसंघातील उमेदवारांचीही चाचपणी करण्यात आली.

त्यानुसार उस्मानाबादमधून माजी मंत्री दिलीप सोपल, पद्मसिंह पाटील आणि राणाजगजितसिंह पाटील यांची नावे चर्चेत आहेत. तर बीडमधून जयदत्त क्षीरसागर, अमरसिंह पंडित आणि बजरंग सोनवणे यांच्या नावाचा विचार सुरु आहेत. परभणी मतदारसंघातील उमेदवारीसाठी बाबाजानी दुर्राणी आणि विजय भांबळे यांच्यात चुरस आहे. गेल्या लोकसभा निवडणुकीत राज्यात राष्ट्रवादीचे केवळ चार उमेदवार निवडून आले होते.

You might also like
Comments
Loading...