माझ्या वक्तव्याचा विपर्यास; महाआघाडीत सहभागी होणार नाही – उद्धव ठाकरे

मुंबई : विधानसभा निवडणूक जवळ येऊन ठेपली असून, या निवडणुकीत युती करण्यासाठी भाजपकडून शिवसेनेची मनधरणी करण्याचे काम चालू आहे. तर दुसरीकडे येणाऱ्या लोकसभा आणि विधानसभा निवडणुकांसाठी सर्व विरोधी पक्ष भाजप विरोधात एकवटले असून, ते महाआघाडी करण्याच्या तयारीत आहेत .

ते शिवसेनेला देखील आपल्यासोबत घेण्यासाठी प्रयत्न करत असून, त्याचाच एक भाग म्हणून राष्ट्रवादीच्या वर्धापन दिन सोहळ्यात शरद पवारांनी शिवसेनेला सोबत घेण्याचं सूचक वक्तव्य केलंत. दरम्यान याबाबत उद्धव ठाकरे यांना विचारले असता सर्वांच्या ऑफर आल्यावर निर्णय घेऊ असं त्यांनी म्हंटलं होतं.

मात्र आता त्यांनी आपल्या वक्तव्यावरून युटर्न घेत,माझ्या वक्तव्याचा विपर्यास करण्यात आला असून,आपण कदापिही महाआघाडीत सहभागी होणार नसल्याचं त्यांनी म्हंटलं आहे. सहज गमतीने केलेल्या वक्तव्याचा विपर्यास झाल्याचं म्हणत उद्धव ठाकरेंनी महाआघाडीत सामील होण्याचा कोणताही विचार नसल्याचं म्हटलं आहे. शिवसेनेची पक्षांतर्गत भेट रंगशारदा सभागृहात आयोजित कऱण्यात आली होती. त्यावेळी पत्रकारांच्या प्रश्नाला उत्तर देताना नंतर बघू नाही तर नंतर बोलू असं म्हटल्याचं उद्धव ठाकरेंनी स्पष्ट केलं आहे.