‘मी येथे आल्याने अनेकांच्या पोटात दुखत आहे’, उद्धव ठाकरेंचा ‘जय गुजरात’चा नारा

टीम महाराष्ट्र देशा : भाजपध्यक्ष अमित शाह आपला उमेदवारी अर्ज गांधीनगर मधून दाखल करणार असून त्यासाठी महाराष्ट्रातून शिवसेना पक्षप्रमुख उद्धव ठाकरे यांनी हजेरी लावली आहे. यावेळी अमित शहा यांनी जोरदार शक्तीप्रदर्शन केले. सरदार वल्लभभाई पटेल यांच्या पुतळ्याला पुष्पहार अर्पण करुन अमित शाह यांच्या रोड शोला सुरुवात करण्यात आली.

यावेळी उद्धव ठाकरे यांनी आमच्यात मतभेद होते पण आता आमची मने जुळली आहेत. मी येथे आल्याने अनेकांच्या पोटात दुखत आहे, असा टोला लगावला आहे. आमच्यातली भांडणे पाहून काहींना आनंद झाला होता. आम्ही जनतेचे प्रश्न घेऊन भांडत होतो. पण आता आमच्यातले वाद संपले आहेत. कारण आमचे विचार सारखे आहेत. हिंदुत्व हा आमचा श्वास आहे. आम्हाला खुर्चीची ओढ नाही. २५ वर्षे आम्ही सत्तेशिवाय एकत्र होतो. एक भगवा घेऊन आम्ही वाटचाल केली. दिल्लीवर भगवा फडकावण्याचे आमचे स्वप्न होतं. ते २५ वर्षांनी पूर्ण झाले. अस देखील उद्धव ठाकरे म्हणाले आहेत.

तर, नेहमी गुजरात विरोधी भूमिका घेणारे उद्धव ठाकरे यांनी भाषणाच्या शेवटी जय गुजरात असा नारा दिल्याने अनेकांच्या भुवया उंचावल्या आहेत.