‘मी घेतलेला अनुभव फार भयानक होता. अशी वेळ शत्रूवर सुद्धा येऊ नये,

amol mitkari

अकोला : करोनाच्या संसर्गानंतर गंभीर अवस्थेत असलेल्या व अन्य रुग्णांचेही कसे हाल होत आहेत याचा भयंकर अनुभव राष्ट्रवादी काँग्रेसचे विधान परिषदेचे आमदार अमोल मिटकरी यांना आला आहे. ‘मी घेतलेला अनुभव फार भयानक होता. अशी वेळ शत्रूवर सुद्धा येऊ नये,’ अशी भावना त्यांनी हा अनुभव सांगताना व्यक्त केली आहे.

मिटकरी यांनी आपल्या फेसबुक पेजवरून एक सविस्तर पोस्ट शेअर केली आहे. हा अनुभव त्यांना ज्या रात्री आला, त्या रात्रीचे वर्णन मिटकरी यांनी एक ‘निगरगट्ट रात्र’ असं केलं आहे. ‘माझ्या मित्रांचे वडील काल करोना पॉझिटिव्ह आले हे समजताच त्यांनी मला संपर्क केला. मित्राच्या वडिलांना ICU मध्ये दाखल करायला बेड आणि व्हेंटिलेटरची आवश्यकता होती. फोन करणारे आर्थिकदृष्ट्या अत्यंत सक्षम होते.

अकोल्यामध्ये आयकॉन आणि ओझोन अशी दोन हॉस्पिटल आहेत. तिथे त्यांची व्यवस्था होऊ शकली नाही. पैसा असतानासुद्धा अकोला जिल्ह्यात त्यांना बेड मिळाला नाही हे सर्वात मोठे दुर्दैव म्हणावे लागेल,’ अशी खंत मिटकरी यांनी व्यक्त केलीय.फेसबुक पोस्टमध्ये ते पुढं म्हणतात, ‘सर्वानुमते एका खासगी डॉक्टरच्या सल्ल्यावरून आम्ही पेशंटला रात्री एक वाजता एका वैद्यकीय अधिकाऱ्यासोबत नागपूरच्या वोकार्ड हॉस्पिटलला (बेड व्हेंटिलेटर उपलब्ध असल्याचे सांगितल्यावर) पाठवले.

रात्री साडे तीन वाजता पेशंट घेऊन ॲम्बुलन्स त्या हॉस्पिटल समोर पोहोचली. मला रात्री साडेतीन वाजता मित्रांनी कॉल केला व ॲम्बुलन्स बाहेर उभी आहे, मात्र आत बेड उपलब्ध नाहीत असे डॉक्टर सांगताहेत असे सांगितले. पेशंट फक्त ऑक्सिजनवर आहे आणि खासगी डॉक्टरच्या सांगण्यावरून आपण तिथपर्यंत पेशंट पाठवल्यानंतर सुद्धा समोरच्या हॉस्पिटलमध्ये अॅडमिट करत नसतील तर ही बाब फार गंभीर आहे.

त्याचवेळी मी व एका खासगी कोविड सेंटरवरील माझे काही डॉक्टर मित्र इतर डॉक्टरच्या संपर्कात राहिलो. मात्र रात्री साडेतीन वाजता कुठल्याच डॉक्टरांनी प्रतिसाद दिला नाही. नागपूरमधील लता मंगेशकर हॉस्पिटल, किंग वे हॉस्पिटल ऑरेंज सिटी हॉस्पिटल, ऍलेक्सीज हॉस्पिटल, ओअचार्ड हॉस्पिटल, 7 स्टार हॉस्पिटलमध्ये डॉ. मुंदडा, डॉ. मरार, डॉ. अग्रवाल, सुजाता मॅडम, कावेरी मॅडम यांच्याशी संपर्क केला, मात्र, या सर्व श्रीमंत डॉक्टरांपैकी कोणीही कुठलाही, कसलाही प्रतिसाद दिला नाही.’

नंतर वर्धा, सावंगी मेघे, या ठिकाणी फोन केले. पेशंटला परत इथे आणण्याचा विचार करून अकोल्यातील सर्व दवाखान्यात फोन केले. सरकारी दवाखाने हाउसफुल, प्रायव्हेट दवाखाने हाउसफुल, नागपूरमधील दवाखाने हाउसफुल, पेशंटकडे स्वतःच्या गाड्या आहेत, अनेक मोठ्या लोकांशी संपर्क आहेत, असे असताना सुद्धा पेशंटला एक व्हेंटिलेटर व बेड उपलब्ध नसणे हे फार धक्कादायक आहे. अखंड प्रयत्नानंतर शेवटी सरकारी दवाखान्यातच पेशंटला भरती करावे लागले आहे.’

आमदार असताना व पेशंट सुद्धा आर्थिक सक्षम असताना खासगी डॉक्टर असा जीवघेणा खेळ खेळून, रात्री फोन बंद करून प्रतिसाद देत नसतील तर सामान्य माणसाचं जगणं म्हणजे हा एक फक्त खेळ आहे असे समजायचे का? श्रीमंत लोकांची अशी अवस्था तर गोरगरिबांची अवस्था किती बिकट असेल,’ असा प्रश्न मिटकरी यांनी उपस्थित केला आहे.

‘ह्या साखळ्या शोधून काढाव्या लागतील. मग आमच्या जीवाशी खेळायची वेळ आली तरी बेहत्तर. मात्र हा माज, ही मस्ती अशीच सुरू राहिली तर येणाऱ्या काही दिवसांत प्रत्येकाच्या जीवनातील महत्वाच्या व्यक्ती जग सोडून गेलेल्या असतील,’ अशी भीती मिटकरी यांनी व्यक्त केली आहे. संकटात असणाऱ्यांना मदत मिळावी यासाठी त्यांनी काही नंबरही शेअर केले आहेत. आपण सर्वांनी मिळून आता संकट ओळखायला शिकलं पाहिजे. गरजवंताना मदत करा,’ असं आवाहनही त्यांनी केलं आहे.

महत्वाच्या बातम्या:-