fbpx

सर्वोच्च न्यायालयाने मराठा आरक्षणासंदर्भातील याचिका फेटाळली

टीम महाराष्ट्र देशा : सर्वोच्च न्यायालयाने मराठा आरक्षणासंदर्भातील याचिका फेटाळली आहे. वैद्यकीय आणि दंतवैद्यकीयच्या पदव्युत्तर अभ्यासक्रमाच्या प्रवेशासाठी मराठा समाजाला १६ टक्के आरक्षण देण्यासंदर्भात महाराष्ट्र राज्य सरकारने अध्यादेश काढला होता. याविरोधात सर्वोच्च न्यायालयात याचिका दाखल करण्यात आली होती. परंतु, सर्वोच्च न्यायालयाने ही याचिका फेटाळली आहे. यामुळे मराठा विद्यार्थ्यांना मोठा दिलासा मिळाला असू पदव्युत्तर वैद्यकीय प्रवेशाचा मार्ग मोकळा झाला आहे.

उच्च न्यायालाने याचिका फेटाळताच याचिकेतील मुद्दे विचारात घेतले नसून केवळ सर्वोच्च न्यायालयाचा जुना आदेश ग्राह्य़ धरला. त्यामुळे ही याचिका विचारात घेऊन अध्यादेश रद्द करण्याची विनंती याचिकाकर्त्यांनी केली होती.गेल्या काही दिवसांपासून मराठा समाजाच्या विद्यार्थ्यांचा पदव्युत्तर वैद्यकीय अभ्यासक्रमाचा प्रवेश खोळंबला होता. मराठा समाजाच्या विद्यार्थ्यांनी आंदोलने करत आरक्षणाची मागणी लावून धरली होती. यासाठी राज्य सरकारने अध्यादेश काढत मराठा विद्यार्थ्यांसाठी प्रवेश मोकळा करून दिला होता. मात्र खुल्या प्रवर्गातील इतर नाराज घटकांनी याविरोधात न्यायालयात धाव घेत याचिका दाखल केली होती. मात्र सर्वोच्च न्यायालयाने याचिका फेटाळली आहे.

दरम्यान  मराठा आरक्षण लागू होण्याआधीच राज्यात वैद्यकीय प्रवेश प्रक्रिया सुरू झाली होती आणि कायदा नंतर लागू झाला होता. त्यामुळे यावर्षी प्रवेश होऊ नये, अशी याचिका दाखल करण्यात आली होती. याबाबत मुंबई उच्च न्यायालयाच्या नागपूर खंडपीठाने राज्य सरकारच्या निर्णयाची चालू वर्षापासून अंमलबजावणी करण्यास नकार देत वैद्यकीय प्रवेश प्रक्रियेला स्थगिती दिली होती. राज्य सरकारने सर्वोच्च न्यायालयात विशेष अनुमती याचिकेद्वारे आव्हान दिले होते. यानंतर, सरकारने अध्यादेश काढत आरक्षणाचा मार्ग मोकळा केला होता.