वाहन पासिंग प्रकरणात सावळा गोंधळ

औरंगाबाद : आरटीओ कार्यालयात वाहनाचे फिटनेस घेण्यासाठी वाहनधारकांनी ऑनलाइन नोंदणी केली आहे. मात्र, बॅकलॉगच्या नावाखाली या वाहनांच्या फिटनेसचे दिनांक बदलून, त्यांना ऑफलाइन फिटनेसची नवीन तारीख देऊन वाहनांची पासिंग करण्यात आली आहे. ऑनलाइन गाड्यांची वाहनांची पासिंग ऑफलाइन करण्याच्या या प्रकरणात मोठा घोटाळा असल्याचा आरोप तक्रारदात्यांनी केला आहे.

या प्रकरणात परिवहन आयुक्तांसोबत पोलिस आयुक्तालयातही संबंधितांनी तक्रार अर्ज सादर करून या प्रकरणाची चौकशी करण्याची मागणी केली आहे. ऑनलाइनवरील वाहने ऑफलाइन झाल्याच्या प्रकाराबाबत काही वाहनधारकांनी थेट परिवहन आयुक्तांकडे तक्रार नोंदविली आहे.

आरटीओ कार्यालयातून व्यावसायिक वापराच्या गाड्यांना तसेच प्रवासी वाहतूक करणाऱ्या वाहनांचे दरवर्षी फिटनेस टेस्ट करावी लागते. याशिवाय नवीन वाहनांचेही फिटनेस तपासणीनंतर त्यांना आरटीओ कार्यालयाकडून फिटनेस प्रमाणपत्र देण्यात येत असते. आरटीओ कार्यालयातील मोटारवाहन निरीक्षकांच्या संख्येप्रमाणे वाहन फिटनेस तपासणीचा कोटा ठरविण्यात येत असतो.

यासाठी राज्यभरात फिटनेस टेस्टसाठी ऑनलाइन अपॉइंटमेंट घेण्याचा नियम लागू करण्यात आलेला आहे. औरंगाबाद आरटीओ कार्यालयात काही दिवसांपूर्वी वाहनांची पासिंग करण्यासाठी ऑनलाइन अपॉइंटमेंट घेतलेल्या अनेक वाहनांना ऑफलाईन अपॉइंटमेंट देण्यात आलेली आहे. ऑफलाइन परवानगी देताना संबंधित अधिकाऱ्यांनी ही वाहने बॅकलॉगमध्ये तांत्रिक दोष असल्यामुळे केल्याचे स्पष्ट केले आहे.

बॅकलॉगच्या नावाखाली अपॉइंटमेंट घेतलेल्या वाहनधारकांना थेट अपॉइंटमेंट देऊन त्यांच्या वाहनांची पासिंग करण्यात आली आहे. यामुळे नियमित अपॉइंटमेंट घेतलेल्या वाहनधारकांना याचा फटका सोसावा लागला आहे. याबाबत परिवहन आयुक्तांकडे आरटीओ कार्यालयात ऑनलाइन कारभार ऑफलाइन करणाऱ्या अधिकाऱ्यांच्या विरोधात तक्रार करण्यात आली असून, याची चौकशी करण्यात यावी. अशी तक्रार भरतसिंह चौहान यांनी केली आहे.

महत्त्वाच्या बातम्या