पुण्यातील राष्ट्रवादी काँग्रेस नगरसेवकांचा केरळातील पूरग्रस्तांना मदतीचा हात

पुणे : केरळमध्ये आलेल्या महाप्रलयाने हजारो संसार उघड्यावर आले आहेत, तर पुरामुळे लाखो लोकांना बेघर होण्याची वेळ आली आहे, या पुरग्रस्तांच्या मदतीसाठी पुण्यातील राष्ट्रवादी काँग्रेस नगरसेवकांनी मदतीचा हात पुढे केला असून, पुणे महापालिकेतील राष्ट्रवादी नगरसेवक आपले एक महिन्याचे मानधन पुरग्रस्तांना देणार असल्याची माहिती, राष्ट्रवादीचे शहराध्यक्ष व विरोधी पक्षनेते चेतन तुपे यांनी दिली आहे.

केरळ राज्यामध्ये पावसाने थैमान घातले आहे, अतिवृष्टीमुळे निर्माण झालेल्या पूर परिस्थितीत लाखों संख्येत लोकांना आपले राहते घर सोडावे लागले आहे, तर 350 च्यावर लोकांना आपले प्राण गमवावे लागले आहेत. नैसर्गिक संकटात सापडलेल्या केरळच्या मदतीला अनेक राज्य – देश धावून आले आहेत. दोन दिवसांपूर्वीच राष्ट्रवादी काँग्रेसचे सर्व आमदार – खासदार आपले एक महिन्याचे मानधन पुरग्रस्तांच्या मदतीसाठी देणार असल्याचं पक्षाकडून जाहीर करण्यात आलं होतं.

दरम्यान, आता पुणे महापालिकेत असणारे राष्ट्रवादी कॉंग्रेसचे ४१ नगरसेवक आपले एक महिन्याचे मानधन केरळसाठी देणार आहेत. यामध्ये एका नगरसेवकाला २० हजार रुपयांचे मानधन मिळते, त्यानुसार गोळा होणारा ८ लाख २० हजारांचा निधी केरळ पुरग्रस्तांच्या मदतीसाठी दिला जाणार असल्याचं चेतन तुपे यांनी सांगितले. त्याचबरोबर पुरग्रस्तांना औषधोपचार व अन्य साहित्यांची गरज असल्याने, शहर राष्ट्रवादीच्या कार्यकर्त्यांच्या माध्यमातून औषधोपचार व अन्य साहित्याची मदत गोळा करून ती केरळला पाठविण्यात येणार असल्याचे तुपे म्हणाले.

भद्रावती नगरपरिषदेवर सेनेचा भगवा