पेगासस प्रकरण; मोदी सरकारविरोधात काँग्रेसचे राजभवनासमोर आंदोलन

मुंबई : केंद्र सरकार पेगाससचा वापर करून राजकीय नेते, पत्रकार यांचे फोन हॅक करून त्यांच्यावर पाळत ठेवत असल्याच्या आरोप काँग्रेसने केला आहे. याच्या निषेधार्थ प्रदेशाध्यक्ष नाना पटोले आणि विधीमंडळ पक्षनेते बाळासाहेब थोरात यांच्या नेतृत्वाखाली आज राजभवनासमोर आंदोलन करण्यात आले.

केंद्र सरकार पेगॅससचा वापर करून राजकीय नेते, पत्रकार यांचे फोन हॅक करून त्यांच्यावर पाळत ठेवत असल्याच्या निषेधार्थ प्रदेशाध्यक्ष नाना पटोले व विधीमंडळ पक्षनेते बाळासाहेब थोरात यांच्या नेतृत्वाखाली राजभवनासमोर आंदोलन करण्यात आले. pic.twitter.com/JcRwo24nwP

— Maharashtra Congress (@INCMaharashtra) July 22, 2021

फोन टॅपिंगप्रकरणावरून देशभरात खळबळ उडालेली असतानाच आता काँग्रेसचे प्रदेशाध्यक्ष नाना पटोले यांनी मोठा आणि गंभीर आरोप केला आहे. फोन टॅपिंग करूनच कर्नाटक आणि मध्य प्रदेशातील सरकार पाडण्यात आले. सरकार पाडण्यासाठी केंद्र सरकारने फोन टॅपिंगचा गैरवापर केल्याचा आरोप नाना पटोले यांनी केला आहे.

फोन टॅपिंगचा दुरुपयोग करून कर्नाटक आणि मध्य प्रदेशातील सरकार पाडल्याची माहिती समोर आली आहे. केंद्र सरकारने याचा गैरवापर केला. अनेकांचे फोन टॅप केले. ही गंभीर बाब आहे. संवैधानिक व्यवस्थेविरोधातील हे कृत्य आहे. त्यामुळे संबंधितांनी राजीनामा द्यायला हवा. तसेच या प्रकरणाची सखोल चौकशी करण्यासाठी सुप्रीम कोर्टाच्या न्यायाधीशाच्या अध्यक्षतेखाली समिती स्थापन केली पाहिजे, अशी मागणी पटोले यांनी केली.