fbpx

पार्थ पवार आणि सुनील तटकरे यांना निवडणूक आयोगाकडून दणका

टीम महाराष्ट्र देशा : राष्ट्रवादी पक्षाचे मावळ लोकसभेचे उमेदवार पार्थ पवार आणि रायगड लोकसभेचे उमेदवार सुनील तटकरे यांना आचार संहितेचा भंग केल्या प्रकरणी निवडणूक आयोगाकडून नोटीस पाठवण्यात आली आहे. रायगड लोकसभा मतदारसंघात विना परवानगी सोशल मीडियावर जाहिरात पोस्ट केल्याने सुनील तटकरे यांना आचार संहिता भंगाची नोटीस पाठवण्यात आली आहे तर पार्थ पवार यांनी पेड न्यूज केल्याने त्यांना खुलासा करण्या बाबत निवडणूक आयोगा कडून नोटीस मिळाली आहे.

मावळचे राष्ट्रवादी काँग्रेस उमेदवार ‘पार्थ पवार यांच्या प्रचारार्थ पनवेल विधानसभा क्षेत्र दौरा’ ही बातमी व ‘पार्थ पवार यांच्या प्रचारार्थ गाव दौऱ्यांना सुरुवात’ ही एकसारखी बातमी वृत्तपत्रात प्रसिद्ध झाली आहे. या दोन्ही बातम्या पेड न्यूजमध्ये मोडत आहेत. या बातमीचा खर्च उमेदवारांच्या खर्चात समाविष्ट का करू नये असा खुलासा उमेदवारास विचारून कार्यवाहीचा अहवाल माध्यम सर्टिफिकेशन अँड मॉनिटरिंग कमिटीला लवकरात लवकर पाठवावा. याबाबत पार्थ पवार यांना नोटीस पाठविण्यात आली आहे.

तसेच खेडचे काँग्रेस पक्षाचे तालुकाध्यक्ष गौसभाई खतीब यांनी फेसबुक या सोशल साईटवर काँग्रेस, राष्ट्रवादी काँग्रेस आघाडीचे उमेदवार सुनील तटकरे यांना मतदान करण्याचे आवाहन मुस्लिम समाजातील बंधू भगिनींना केले आहे. विशिष्ट समाजाला, जातील उद्देशून आवाहन करणे हा आदर्श आचारसंहितेचा भंग आहे. या कारणास्तव खतीब याना दापोली सहायक निवडणूक निर्णय अधिकारी यांनी नोटीस पाठवली आहे.