उज्ज्वल निकम यांच्या जीवनावर तयार होणार बायोपिक

मुंबई : विधीतज्ज्ञ आणि सरकारी वकील उज्ज्वल निकम यांच्या जीवनावर बायोपिकची निर्मिती करण्यात येणार असून या चित्रपटाचे दिग्दर्शन ‘ओह माय गॉड’ चित्रपटाचे दिग्दर्शक उमेश शुक्ला हे करणार आहेत. या बायोपिकचे ‘निकम’ असे नाव असणार आहे.

याच पार्श्वभूमीवर उज्ज्वल निकम या बायोपिकबाबत बोलताना म्हणाले, की मला माझ्या आयुष्यावर पुस्तक किंवा चित्रपट तयार करण्यासाठी मागील बऱ्याच दिवसांपासून विचारणा करण्यात येत होती. मी याबद्दल आश्वासक नव्हतो. कारण, माझ्यावर फार मोठी जबाबदारी आहे. पण, अखेर मी प्रतिभाशाली टीमसोबत जुळून या बायोपिकसाठी तयार झालो. या टीमवर मला विश्वास आहे. ते या बायोपिकला योग्य तो न्याय देतील.

तसेच ‘निकम’ या बायोपिकमध्ये उज्वल निकम यांच्या करिअरमधील महत्त्वाच्या घडामोडी पडद्यावर दाखवण्यात येणार आहेत. उमेश शुक्ला यांच्यासोबतच सेजल शाह, आशिष वाघ, गौरव शुक्ला आणि भावेश मंडलिया हे या चित्रपटाची निर्मिती करणार आहेत.

‘निकम’ नावाच्या या चित्रपटाची घोषणा करण्यात आली आहे. हा चित्रपट अशा एका व्यक्तीची कथा आहे, ज्याने मुंबईमधील 1993 मधला साखळी बॉम्बस्फोट, 26/11 दहशतवादी हल्ला, गुलशन कुमार हत्या प्रकरण आणि भाजपा नेते प्रमोद महाजन हत्या प्रकरणांसारखी हाय प्रोफाइल केसेससाठी त्यांनी लढल्या आहेत.

दरम्यान, उज्वल निकम यांच्यावरील आधारित ‘निकम’ या बायोपिकच्या शूटिंगला लवकरच सुरुवात होणार आहे. यामध्ये कोणते कलाकार भूमिका साकारणार आहेत हे अद्याप गुलदस्त्यात आहे.