एनडीएच्या डोकेदुखीत वाढ ; आता सर्वात जुना मित्र देखील नाराज

टीम महाराष्ट्र देशा : ”अटल बिहारी वाजपेयी जेव्हा पंतप्रधान होते, तेव्हा ते मित्रपक्षांना सोबत घेऊन चालत होते. मात्र मोदी मित्रपक्षांना महत्त्व देत नाहीत,” अकाली दलचे खासदार सुखदेव ढींढसा यांनी असा आरोप करत मोदी सरकारवर निशाना साधला आहे.

सुखदेव ढींढसा हे केवळ खासदारच नाही, तर अटल बिहारी वाजपेयी यांच्या सरकारमध्ये क्रीडा आणि रसायनमंत्री होते. पक्षाच्या हरसिमरत कौर मोदी सरकारमध्ये मंत्री असतानाही अकाली दलने मोदी सरकारवर हा आरोप केला आहे. शिवसेना, टीडीपी, भारतीय समाज पार्टी यांच्यानंतर या यादीत आता पंजाबमधील अकाली दलचाही समावेश झाला आहे.

पंजाबमध्ये लोकसभेच्या एकूण १३ जागा आहेत. त्यापैकी सध्या चार जागांवर अकाली दलचे खासदार आहेत. तर एका जागेवर भाजपचा विजय झाला होता. आता इतर मित्रपक्षाप्रमाणे पंजाबमधील मोठा पक्षही आता भाजपवर नाराज असल्याने २०१९ च्या लोकसभा निवडणुकीपूर्वी मोदींच्या अडचणी वाढणार आहेत.